ຈີນ ສືບຕໍ່ຊ່ວຍວັກແຊງປ້ອງກັນໂຄວິດແກ່ລາວ 5 ແສນໂດສ

    ວັກແຊງດັ່ງກ່າວໄດ້ມາຮອດນະຄອນຫຼວງວຽງຈັນ ໃນຕອນແລງວັນທີ 14 ມິຖຸນາ ແລະໄດ້ມີພິທີມອບ-ຮັບທາງການຂຶ້ນໃນວັນທີ 15 ມິຖຸນານີ້, ທີ່ກະຊວງສາທາລະນະສຸກຕາງໜ້າມອບໂດຍທ່ານ ຈ່ຽງ ຈາຍຕຸ່ງ ເອກອັກຄະລັດຖະທູດແຫ່ງ ສປ ຈີນ ປະຈຳ ສປປ ລາວ ແລະໃຫ້ກຽດກ່າວຮັບໂດຍ ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ, ໂດຍມີພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.

   ໂອກາດດັ່ງກ່າວ,ທ່ານ ກິແກ້ວ ໄຂຄຳພິທູນ ໄດ້ຕາງໜ້າໃຫ້ລັດຖະບານ ແລະປະຊາຊົນລາວ, ຕີລາຄາສູງຕໍ່ການຊ່ວຍເຫຼືອອັນສະເໝີຕົ້ນສະເໝີປາຍຈາກລັດຖະບານ ແລະປະຊາຊົນຈີນຕະຫຼອດໄລຍະຜ່ານມາພ້ອມທັງສະແດງຄວາມຂອບໃຈຢ່າງຈິງໃຈໄປຍັງລັດຖະບານ ແລະປະຊາຊົນຈີນອ້າຍນ້ອງ, ໂດຍຜ່ານສະຫາຍ ຈ່ຽງ ຈາຍຕຸ່ງ, ເອກອັກຄະລັດຖະທູດ ສປ ຈີນ ປະຈຳ ສປປ ລາວ ທີ່ເວລາໃດກໍ່ເປັນຫ່ວງເປັນໄຍອັນແທດເຖິງ ແລະມອບການຊ່ວຍເຫຼືອອັນລໍ້າຄ່າໃຫ້ແກ່ລັດຖະບານກໍຄືປະຊາຊົນລາວ, ອັນໄດ້ສະແດງ ໃຫ້ເຫັນແຈ້ງເຖິງນໍ້າໃຈເອື້ອເຟື້ອເພື່ອແຜ່ຂອງລັດຖະບານ ແລະປະຊາຊົນຈີນ, ຊຶ່ງໄດ້ຢັ້ງຢືນເຖິງການເປັນເພື່ອນມິດສະຫາຍອ້າຍນ້ອງທີ່ເປັນມູນເຊື້ອ, ສາຍພົວພັນແບບຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານຕາມທິດ 4 ດີ ແລະການເປັນຄູ່ຮ່ວມຊາຕາກໍາ ລາວ-ຈີນ, ຈີນ-ລາວ ທີ່ນັບມື້ນັບໄດ້ຮັບການເສີມຂະຫຍາຍ ແລະຫັນເຂົ້າສູ່ລວງເລິກຢ່າງບໍ່ຢຸດຢັ້ງ. 

   ການຊ່ວຍເຫຼືອຂອງສປຈີນໃນຄັ້ງນີ້ເປັນການປະກອບສ່ວນອັນສໍາຄັນໃຫ້ແກ່ລັດຖະບານລາວເພື່ອນຳໄປບໍລິການສັກໃຫ້ປະຊາຊົນໃຫ້ໄດ້ 50% ຂອງຈຳນວນພົນລະ ເມືອງລາວຕາມຄາດໝາຍທີ່ລັດຖະບານວາງໄວ້ແນໃສ່ໃນການຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19 ຮອບໃໝ່ຢູ່ລາວໃຫ້ຫຼຸດລົງ ແລະກັບຄືນສູ່ສະພາບປົກກະຕິໂດຍໄວ ແລະຫວັງວ່າໃນຕໍ່ໜ້າຝ່າຍ ສປ ຈີນ ຈະສືບຕໍ່ໃຫ້ການຊ່ວຍເຫຼືອລາວໃຫ້ມີຄວາມເຂັ້ມແຂງຕະຫຼອດໄປ.

ຂ່າວ-ພາບ: ພູວັນ

แชร์