ນະຄອນຫຼວງວຽງຈັນ ຕັ້ງເປົ້າຜະລິດເຂົ້ານາປີ 2,35 ແສນໂຕນ

 ພະແນກກະສິກຳ ແລະປ່າໄມ້ນະຄອນຫຼວງວຽງຈັນສຸມໃສ່ຜັນຂະຫຍາຍຕາມ 3 ວິໄສທັດ 4 ຍຸດທະສາດ 8 ຄາດໝາຍ ແລະ 18 ແຜນວຽກຈຸດສຸມເຂົ້າສູ່ການຈັດຕັ້ງປະຕິບັດຕົວຈິງຢູ່ບັນດາເມືອງທົ່ວ ນວ ໂດຍສະເພາະເຂດຊານເມືອງ 7 ເມືອງຄື: ສັງທອງ,ນາຊາຍທອງ,ໄຊທານີ, ໄຊເສດຖາ, ຫາດຊາຍຟອງ ແລະປາກງື່ມເປັນຫຼັກ.

   ຕາມການລາຍງານຂ່າວຂອງໜັງສືພິມວຽງຈັນໃໝ່ໂດຍຢັ້ງຢືນຂໍ້ມູນຈາກ ທ່ານ ຫຼ້າສາຍ ນວນທາສິງ ຫົວໜ້າພະແນກກະສິກຳ ແລະປ່າໄມ້ນະຄອນຫຼວງວຽງຈັນ ໃຫ້ຮູ້ວ່າແຜນການຜະລິດເຂົ້ານາປີ 2021 ຄາດໝາຍໃນເນື້ອທີ່ 52.050 ເຮັກຕາ ຄາດຄະເນຜະລິດຕະພາບ 4,53 ໂຕນຕໍ່ເຮັກຕາ ໃຫ້ໄດ້ຜົນຜະລິດ 235.820 ໂຕນ ໃນນັ້ນ ເຂົ້າອິນຊີ 407 ເຮັກຕາ ຜົນຜະລິດ 1.683 ໂຕນ ເຂົ້າຈ້າວ 3.321 ເຮັກຕາ ຜົນຜະລິດ 13.635 ໂຕນ ພ້ອມກັນນັ້ນ ກໍໄດ້ກະກຽມສະໜອງແນວພັນເຂົ້າທ່າດອກຄຳ 8 11 ວຽງຈັນ 45 ປີ-1 ວຽງ ຈັນ 450 ປີ 2 ເຊບັ້ງໄຟ 2 ເຂົ້າ ເຊແອ 203 ແລະ ອື່ນໆ 174 ໂຕນ ຝຸ່ນອົງຄະ ທາດ 41.640 ໂຕນ ຝຸ່ນເຄມີ 8.833 ໂຕນ ເພື່ອສະໜອງຮັບໃຊ້ການຜະລິດນາ ປີນີ້.

    ນອກຈາກນັ້ນຍັງໄດ້ກະກຽມແຜນການຜະລິດຜັກລະດູຝົນ 3.779 ເຮັກຕາ ຜົນຜະລິດປະມານ 38.225 ໂຕນ ໃນນີ້ມີຜັກອິນຊີ 1.022 ໂຕນ ຜັກ GAP 4.052 ໂຕນ ພືດອຸດສາຫະກໍາ (ມັນຕົ້ນສາລີອາຫານສັດຖົ່ວດິນ) 3.146 ເຮັກຕາ ຜົນຜະລິດ 41.321 ໂຕນ ໝາກໄມ້ 2.532 ເຮັກຕາ ຜົນຜະລິດ 44.079 ໂຕນ ຕົ້ນຕໍແມ່ນມີກ້ວຍຫອມ, ໝາກມີ້, ມັງກອນ, ຖົ່ວລຽນ, ໝາກພ້າວຫອມ ແລະໝາກໄມ້ຕາມລະດູການອື່ນໆ, ສຳລັບເຂດຈຸດສຸມປູກເຂົ້າແມ່ນທົ່ງພຽງລຽບຕາມແມ່ນໍ້າຂອງ, ນໍ້າງື່ມ ແລະເມືອງສັງທອງ ໃນນີ້ມີໄຊທານີ 15.300 ເຮັກຕາ ປາກງື່ມ 11.202 ເຮັກຕາ ສັງທອງ 8.500 ເຮັກຕາ ນາຊາຍທອງ 7.994 ເຮັກຕາ ຫາດຊາຍຟອງ 6.050 ເຮັກຕາ ແລະເມືອງອື່ນໆອີກຈໍານວນໜຶ່ງ.

แชร์