ຖວທ ປະກາດການນໍາຂັ້ນສູງຂອງກະຊວງພັກການ-ຮັບອຸດໜູນບໍານານ

  ໃນຕອນເຊົ້າວັນທີ 10 ມິຖຸນາ 2021 ທີ່ຫໍວັດທະນະທໍາແຫ່ງຊາດ, ນະຄອນຫຼວງວຽງຈັນກະຊວງຖະແຫຼງຂ່າວວັດທະນະທໍາ ແລະທ່ອງທ່ຽວ (ຖວທ) ຈັດພິທີປະກາດພະນັກງານການນໍາຂັ້ນສູງອອກພັກການ-ຮັບອຸດໜູນບໍານານໂດຍມີທ່ານ ນາງ ສວນສະຫວັນ ວິຍະເກດ, ລັດຖະມົນຕີກະຊວງ ຖວທ, ພ້ອມດ້ວຍຕາງໜ້າຈາກບັນດາກົມອ້ອມຂ້າງກະຊວງ ຖວທ ເຂົ້າຮ່ວມ.

  ທ່ານ ສີອຳພອນ ຈັນລາຕີ ຕາງໜ້າຈາກຄະນະຈັດຕັ້ງສູນກາງພັກໄດ້ຂຶ້ນຜ່ານສອງດຳລັດຂອງນາຍົກລັດຖະມົນຕີວ່າດ້ວຍການອະນຸມັດໃຫ້ພະນັກງານການນຳຂັ້ນສູງ ອອກພັກການ-ຮັບອຸດໜູນບໍານານຄື: ດຳລັດສະບັບເລກທີ 260, ລົງວັນທີ 1 ເມສາ 2021 ອະນຸມັດໃຫ້ ທ່ານ ບົວເງິນ ຊາພູວົງ, ຮອງລັດຖະມົນຕີກະຊວງ ຖວທ ອອກພັກການ-ຮັບອຸດໜູນບໍານານ ແລະ ດຳລັດສະບັບເລກທີ 300, ລົງວັນທີ 26 ເມສາ 2021 ອະນຸມັດໃຫ້ ທ່ານ ສະຫວັນຄອນ ຣາຊມຸນຕີ ຮອງລັດຖະມົນຕີກະຊວງ ຖວທ ອອກພັກການ-ຮັບອຸດໜູນບໍານານ.

  ຫຼັງຈາກນັ້ນ ທ່ານ ລືໄຊ ສິນທະວົງ, ຮອງຫົວໜ້າກົມຈັດຕັ້ງ, ກະຊວງ ຖວທ ໄດ້ຂຶ້ນຜ່ານດຳລັດຂອງນາຍົກລັດຖະມົນຕີສະບັບເລກທີ 309, ລົງວັນທີ 11 ພຶດສະ ພາ 2021 ອະນຸມັດໃຫ້ທ່ານ ທອງໃບ ໂພທິສານ, ຫົວໜ້າກົມມໍລະດົກອອກພັກການ-ຮັບອຸດໜູນບໍານານ.

  ໃນໂອກາດນີ້ ທ່ານ ນາງ ສວນສະຫວັນ ວິຍະເກດ, ກໍ່ໄດ້ໃຫ້ກຽດໂອ້ລົມທ່ານໄດ້ສະແດງຄວາມຍ້ອງຍໍຊົມເຊີຍຕໍ່ທັງ 3 ທ່ານ ທີ່ອອກພັກການ-ຮັບອຸດໜູນບໍານານໃນຄັ້ງນີ້ຊຶ່ງເວົ້າໄດ້ວ່າເປັນຮຸ່ນບຸກເບີກໃນວຽກງານຖະແຫຼງຂ່າວ, ວັດທະນະທໍາ ແລະທ່ອງທ່ຽວໃນໄລຍະໃໝ່ຂອງລາວເຮົາ, ພວກທ່ານດັ່ງກ່າວ ໄດ້ເອົາໃຈໃສ່ປະຕິບັດໜ້າທີ່ຂອງຕົນຕາມທີ່ພັກ ແລະລັດຖະບານມອບໝາຍໃຫ້ຢ່າງໄດ້ຮັບຜົນສຳເລັດ ແລະປະກອບສ່ວນສໍາຄັນເຮັດໃຫ້ວຽກງານຖະແຫຼງຂ່າວ,ວັດທະນະທຳ ແລະທ່ອງທ່ຽວຂອງ ລາວໄດ້ຮັບການພັດທະນານັບມື້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງຊຶ່ງກາຍເປັນບົດຮຽນສຳຄັນໃຫ້ແກ່ຄົນຮຸ່ນໃໝ່ໄດ້ສືບທອດ ແລະຮໍ່າຮຽນເອົາເປັນແບບຢ່າງ.

 ທ່ານ ນາງ ສວນສະຫວັນ ວິຍະເກດ ກ່າວຕື່ມວ່າ: ໃນ 5 ປີຕໍ່ໜ້າກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວໄດ້ວາງຫຼາຍຄາດໝາຍຕ້ອງບັນລຸໃຫ້. ສະນັ້ນຮຽກຮ້ອງໃຫ້ຄະນະພັກ-ຄະນະນຳກະຊວງທຸກຂັ້ນຕ້ອງສືບຕໍ່ເອົາໃຈໃສ່ປະຕິບັດວຽກງານຂອງຕົນໃຫ້ດີຂຶ້ນກວ່າເກົ່າ, ວຽກງານໃດທີ່ສາມາດປະຕິບັດໄດ້ໃຫ້ຮີບຮ້ອນຈັດ ຕັ້ງປະຕິບັດນັບແຕ່ນີ້ເປັນຕົ້ນໄປ, ສິ່ງໄດ້ທີ່ພົວພັນເຖິງຫຼາຍພາກສ່ວນຕ້ອງໄດ້ຄົ້ນຄວ້າ, ວິເຄາະ ແລະວິໄຈຢ່າງລະອຽດເພາະຖ້າຈະລໍຖ້າໃຫ້ພະຍາດ ໂຄວິດ-19 ຢຸດຕິການລະບາດແມ່ນເປັນໄປໄດ້ຍາກ. ຢ່າງ ໃດກໍ່ຕາມເພື່ອບັນລຸຄາດໝາຍທີ່ວາງໄວ້ຄະນະພັກ-ຄະນະນຳກະຊວງມີຄວາມຈຳເປັນຕ້ອງໄດ້ຖອດຖອນບົດຮຽນ ແລະສືບຕໍ່ຂໍ ຄຳແນະນຳຕ່າງໆຈາກທັງ 3 ທ່ານ ໄດ້ອອກພັກການ-ຮັບອຸດໜູນບໍານານໃນຄັ້ງນີ້ເພື່ອແນໃສ່ເຮັດໃຫ້ການປະຕິບັດທຸກວຽກງານໄດ້ຮັບຜົນສຳເລັດຕາມທີ່ວາງໄວ້.

ຂ່າວ: ບຸນຕຽງ ຈັນທະວົງ 

แชร์