5 ປີບໍລິຄຳໄຊ ໄພພິບັດເກີດ 56 ຄັ້ງ ເສຍຫາຍ 269,37 ຕື້ກີບ.

  ປະທານຄຸ້ມຄອງໄພພິບັດຂັ້ນແຂວງເມືອງເຂົ້າຮ່ວມ.

  ກອງປະຊຸມຄັ້ງນີ້ ທ່ານ ນາງ ໂສພາ ຈັນທະວົງ ຮອງຫົວໜ້າພະແນກແຮງງານ ແລະສະຫວັດດີການ-ສັງຄົມແຂວງໄດ້ຂຶ້ນຜ່ານຮ່າງບົດລາຍງານການຈັດຕັ້ງປະຕິບັດວຽກງານໃນໄລຍະ 5 ປີຜ່ານມາ ແລະວາງທິດທາງແຜນການ 5 ປີໃນຕໍ່ໜ້າໃຫ້ບັນດາທ່ານທີ່ເຂົ້າຮ່ວມໄດ້ຮັບຟັງຊຶ່ງ 5 ປີ ຜ່ານມາແຂວງບໍລິຄຳໄຊໄດ້ມີເຫດການໄພພິບັດຕ່າງໆ (ນໍ້າຖ້ວມ,ອັກຄີໄພ, ລົມພາຍຸ,ແຫ້ງແລ້ງ) ເກີດຂຶ້ນທັງໝົດ 56 ຄັ້ງ ສົ່ງຜົນກະທົບໂດຍກົງຕໍ່ປະຊາຊົນຈຳນວນ 51,9 ພັນຄົນ ຄິດເປັນມູນຄ່າເສຍຫາຍທັງໝົດປະມານ 188,32 ຕື້ກີບ ສຳລັບຜົນເສຍຫາຍຕໍ່ໂຄງລ່າງພື້ນຖານເປັນຕົ້ນແມ່ນເສັ້ນທາງຫຼວງແຫ່ງຊາດ, ທາງຫຼວງຂອງແຂວງ ແລະທາງຊົນນະບົດໃນ 7 ຕົວເມືອງແຕ່ປີ 2016-2020 ມີມູນຄ່າເສຍຫາຍທັງໝົດ 74,86 ຕື້ກີບ,ສະເພາະຂົງເຂດກະສິກໍາແມ່ນມີມູນ ຄ່າເສຍຫາຍ 6,18 ຕື້ກີບ ລວມມູນຄ່າການເສຍ ຫາຍທັງໝົດ 269,37 ຕື້ກີບ.

   ເຫດການໄພພິບັດທີ່ພົ້ນເດັ່ນເກີດຂຶ້ນໃນຊ່ວງໄລຍະປີ 2016-2020 ແມ່ນເຫດການໄພພິບັດນໍ້າຖ້ວມທີ່ເກີດຈາກພາຍຸຊັນຕິນ, ພາຍຸເບບິນກ່າ ແລະນໍ້າຖ້ວມຢ່າງໜັກ ໜ່ວງໃນປີ 2018 ໄດ້ສົ່ງຜົນກະທົບຕໍ່ການພັດທະນາເສດຖະກິດສັງຄົມຢ່າງຫຼວງຫຼາຍໃນນີ້ສະເພາະ ແຕ່ປີ 2018 ມູນຄ່າການເສຍຫາຍລວມຈາກໄພນໍ້າຖ້ວມຄາດຄະເນແມ່ນ 178 ຕື້ກີບ ຕໍ່ກັບຜົນກະທົບດັ່ງກ່າວທາງການນຳແຂວງໄດ້ສຸມໃສ່ຫຼາຍວຽກງານການກຽມພ້ອມຕອບໂຕ້ ແລະຟື້ນຟູຫຼັງໄພພິບັດຢ່າງແຂງແຮງເປັນຕົ້ນແມ່ນພະແນກແຮງງານ ແລະສະຫວັດດີການສັງຄົມມອບເຮືອກູ້ໄພພ້ອມຈັກ 4 ລຳ ໃຫ້ແກ່ເມືອງປາກຊັນ, ປາກກະດິງ, ທ່າພະບາດ ແລະບໍລິຄັນ, ມອບອຸປະກອນກໍ່ສ້າງ,ເຄື່ອງນຸ່ງຫົ່ມເຄື່ອງອຸປະໂພກ-ບໍລິໂພກ ແລະເງິນຊ່ວຍເຫຼືອຟື້ນຟູຜູ້ໄດ້ຮັບຜົນກະທົບລວມມູນຄ່າ 313,19 ລ້ານກີບ.

   ສຳລັບທິດແຜນຈັດຕັ້ງປະຕິບັດວຽກງານການຄຸ້ມຄອງໄພພິບັດ 5 ປີຕໍ່ໜ້າຈະໄດ້ສຸມໃຫ້ຫຼາຍວຽກງານສຳຄັນເປັນຕົ້ນແມ່ນການປັບປຸງຂໍ້ມູນຂອງບັນດາບ້ານ ແລະ ເມືອງທີ່ມີຄວາມສ່ຽງຕໍ່ໄພພິບັດ, ສ້າງແຜນຍຸດທະສາດຫຼຸດຜ່ອນຄວາມສ່ຽງ, ຈັດຝຶກອົບຮົມໃຫ້ຄວາມຮູ້ດ້ານວຽກງານຄຸ້ມຄອງໄພພິບັດ, ປັບປຸງຍົກລະດັບການແຈ້ງເຕືອນ, ຈັດຕັ້ງຫັດແອບວິທີປ້ອງກັນ ແລະຄວບຄຸມໄພພິບັດ, ວິທີການຊອກຄົ້ນ ແລະກູ້ໄພຜູ້ທີ່ຖືກຜົນກະທົບ, ແຜນການຟື້ນຟູຊີວິດການເປັນຢູ່ຂອງພໍ່ແມ່ປະຊາຊົນ ແລະໂຄງຮ່າງພື້ນຖານຫຼັງເກີດໄພພິບັດ ແລະວຽກງານອື່ນໆ.

แชร์