ຊຽງແຕງ ຊ່ວຍຈໍາປາສັກຕ້ານໂຄວິດ

 ແຂວງຊຽງແຕງ ຣາຊະອານາຈັກ ກໍາປູເຈຍມອບເຄື່ອງອຸປະໂພກ-ບໍລິໂພກ, ອຸປະກອນການແພດໃຫ້ແຂວງຈໍາປາສັກເພື່ອຮັບໃຊ້ເຂົ້າໃນວຽກງານສະກັດກັ້ນ ແລະແກ້ໄຂການລະບາດຂອງພະຍາດໂຄວິດ-19 ມູນຄ່າ 128 ລ້ານກວ່າກີບ.

  ພິທີມອບ-ຮັບ ດັ່ງກ່າວ, ມີຂຶ້ນໃນວັນທີ 9 ມິຖຸນາ 2021 ທີ່ດ່ານສາກົນໜອງນົກຂຽນແຂວງຈຳປາສັກ ສປປ ລາວ ດ່ານສາກົນຕະປຽງຣຽນແຂວງຊຽງແຕງ ຣາຊະ ອານາຈັກກໍາປູເຈຍຝ່າຍ ແຂວງຊຽງແຕງ ຣາຊະອານາຈັກກໍາປູເຈຍນຳໂດຍ ທ່ານ ມົມຊາ ເຣືອນເຈົ້າແຂວງຊຽງເເຕງພ້ອມດ້ວຍຄະນະ, ເບື້ອງແຂວງຈຳປາສັກນຳໂດຍທ່ານ ວິໄລວົງ ບຸດດາຄຳ ເຈົ້າແຂວງຈໍາປາສັກມີທ່ານຮອງເຈົ້າແຂວງ, ທ່ານ ກົງສູນໃຫຍ່ ແຫ່ງ ສປປ ລາວ ປະຈຳແຂວງຊຽງແຕງຣາຊະອານາຈັກກໍາປູເຈຍ, ທ່ານກົງ ສູນໃຫຍ່ແຫ່ງຣາຊະອານາຈັກກໍາປູເຈຍປະຈໍາແຂວງຈໍາປາສັກ, ມີຄະນະຄຸ້ມຄອງດ່ານ, ຄະນະຜູ້ແທນ, ພະແນກການທີ່ກ່ຽວຂ້ອງຂອງສອງຝ່າຍເຂົ້າຮ່ວມ.

  ເຄື່ອງທີ່ນໍາມາຊ່ວຍຄັ້ງນີ້ປະກອບມີ: 1. ເຂົ້າສານ ຈຳນວນ 5 ໂຕນ, 2. ປາກະປ໋ອງ ຈຳນວນ 3.000 ປ໋ອງ (30 ແກັດ). 3. ໝີ່ ສຳເລັດຮູບ ຈໍານວນ 3OO ແກັດ, 4. ຜ້າອັດປາກ-ດັງ ຈຳນວນ 30 ພັນອັນ (30ແກັດ). 5. ອັງໂກນ ຈໍານວນ 300 ຂວດ (15 ແກັດ) ແລະ 6. ນໍ້າຢາລ້າງປາກ ຈໍານວນ 1.000 ຂວດ (50 ແກັດ) ລວມມູນຄ່າ 128 ລ້ານກວ່າກີບ.

   ໃນໂອກາດດັ່ງກ່າວ, ທ່ານ ມົມ ຊາເຣືອນ ເຈົ້າແຂວງຊຽງເເຕງໄດ້ກ່າວຈຸດປະສົງ ແລະ ຄວາມຕັ້ງໃຈຂອງອົງການປົກຄອງແຂວງຊຽງແຕງທີ່ເຫັນໄດ້ຄວາມສຳຄັນລະ ຫວ່າງສອງປະເທດ, ເວົ້າສະເພາະແມ່ນ ແຂວງຊຽງແຕງກັບ ແຂວງຈຳປາສັກ ທີ່ມີສາຍພົວພັນຊ່ວຍເຫຼືອເຊິ່ງກັນ ແລະກັນໃນຍາມທຸກຍາກ.

  ໂອກາດນີ້, ທ່ານ ວິໄລວົງ ບຸດດາຄຳ ຕາງໜ້າໃຫ້ອົງການປົກຄອງ ແລະປະຊາຊົນລາວບັນດາເຜົ່າຊາວແຂວງຈຳປາສັກສະແດງຄວາມຂອບໃຈ ແລະຕີລາຄາສູງຕໍ່ນໍ້າໃຈໃນການປະກອບສ່ວນຊ່ວຍເຫຼືອແບ່ງເບົາໃນຍາມປະສົບຄວາມຫຍຸ້ງຍາກລຳບາກ. ທັງເປັນການເພີ່ມທະວີການຮ່ວມມື, ສາຍພົວພັນການທູດກໍ່ຄື 65 ປີ (15 ມິຖຸນາ 1956-15 ມິຖຸນາ 2021) ຂອງການສ້າງສາຍພົວພັນການທູດລະຫວ່າງລາວ ແລະກຳປູເຈຍທີ່ຈະມາເຖິງໃຫ້ແໜ້ນແຟ້ນຍິ່ງໆຂຶ້ນ.

ຂ່າວ: ທັດຊະນະ

แชร์