ທາງຮ່ອມເບຕົງບ້ານຫ້ອຍນົກກົດຈະສຳເລັດທ້າຍປີນີ້

 ຕອນບ່າຍວັນທີ 7 ມິຖຸນາ 2021 ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ພ້ອມດ້ວຍຄະນະໄດ້ລົງຊຸກຍູ້ການກໍ່ສ້າງເສັ້ນທາງຮ່ອມເບຕົງບ້ານຫ້ອຍນົກກົດ ເມືອງຄອບ, ໂດຍມີ ທ່ານ ແພງຊ້ອຍ ແພງເມືອງ ເຈົ້າເມືອງຄອບ ພ້ອມດ້ວຍພະນັກງານທີ່ກ່ຽວຂ້ອງ ແລະ ອຳນາດການປົກຄອງບ້ານດັ່ງກ່າວໃຫ້ການຕ້ອນຮັບຢ່າງອົບອຸ່ນ.

  ການກໍ່ສ້າງເສັ້ນທາງຮ່ອມປູດ້ວຍເບຕົງບ້ານຫ້ວຍນົກກົດແມ່ນຈະໄດ້ສ້າງທັງໝົດພາຍໃນບ້ານ 3 ເສັ້ນຄື: ເສັ້ນທີ 1 ມີຄວາມຍາວ 100 ແມັດ, ລວງກວ້າງ 3,5 ແມັດ,ຄວາມໜາ 15 ຊັງຕີແມັດ, ເສັ້ນທີ 2 ມີຄວາມຍາວ 85 ແມັດ, ລວງກວ້າງ 4 ແມັດ, ຄວາມໜາ 15 ຊັງຕີແມັດ ແລະເສັ້ນທີ 3 ມີຄວາມຍາວ 360 ແມັດ, ລວງກວ້າງ 7 ແມັດ, ຄວາມໜາ 15 ຊັງຕີແມັດ, ຮອດປະຈຸບັນແມ່ນສ້າງສໍາເລັດແລ້ວ 1 ເສັ້ນຄືເສັ້ນທີ 1, ການກໍ່ສ້າງທາງດັ່ງ ກ່າວແມ່ນທືນສົມທົບລະຫວ່າງລັດ ແລະ ປະຊາຊົນໂດຍແມ່ນລັດໄດ້ສະໜອງປູນ ຈຳນວນ 150 ກວ່າໂຕນ, ສ່ວນປະຊາຊົນແມ່ນປະກອບສ່ວນແຮ່, ຊາຍ ແລະ ແຮງງານໃນການກໍ່ສ້າງ, ຄາດວ່າການກໍ່ ສ້າງທາງທັງ 3 ເສັ້ນຈະໃຫ້ສຳເລັດໃນທ້າຍປີ 2021ນີ້.

  ໂອກາດດັ່ງກ່າວ, ທ່ານເຈົ້າແຂວງກໍ່ໄດ້ຍ້ອງຍໍຊົມເຊີຍຕໍ່ອໍານາດການປົກຄອງບ້ານທີ່ມີຄວາມສາມັກຄີເປັນຈິດໜຶ່ງໃຈດຽວກັນໃນການປຸ້ມລຸມສ້າງເສັ້ນທາງຮ່ອມເບຕົງພາຍໃນບ້ານຈົນສໍາເລັດແລ້ວ 1 ເສັ້ນ ແລະໄດ້ຮຽກຮ້ອງໃຫ້ອໍານາດການປົກຄອງບ້ານຈົ່ງສືບຕໍ່ກໍ່ສ້າງເສັ້ນທາງທີ່ຍັງບໍ່ທັນແລ້ວອີກ 2 ເສັ້ນໃຫ້ສໍາເລັດຕາມແຜນການ, ການປະສົມປູນກໍ່ຕ້ອງໃຫ້ຖືກຕາມມາດຕະຖານທີ່ກໍານົດ, ທັງນີ້ກໍ່ເພື່ອເຮັດໃຫ້ໄດ້ຄຸນນະພາບດີ, ນໍາໃຊ້ໄດ້ຍາວນານ.

ຂ່າວ-ພາບ: ອຸ່ນເຮືອນ ໂພທິລັກ

แชร์