5 ປີ ສາລະວັນມີ 162 ໂຄງການ ສ້າງພື້ນຖານໂຄງລ່າງ

   ກອງປະຊຸມວຽກງານກວດກາທົ່ວແຂວງສາລະວັນ 5 ປີ (20 16-20 20) ແລະປະຈໍາປີ 2020 ໄດ້ໄຂຂຶ້ນໃນວັນທີ 7 ມິຖຸນາ 2021 ທີ່ສະໂມສອນໃຫຍ່ຂອງແຂວງໂດຍເປັນປະທານຂອງ ສະຫາຍ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ, ປະ ທານອົງການກວດກາແຫ່ງ ລັດ, ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ສະຫາຍ ໂພໄຊ ໄຊຍະສອນ ກໍາມະການສູນກາງພັກ, ເລຂາພັກແຂວງ-ເຈົ້າແຂວງສາລະວັນ, ສະຫາຍ ວິຊຽນ ນະວິກຸນ ຄະນະປະຈໍາພັກແຂວງ, ປະທານຄະນະກວດກາພັກ-ປະທານອົງການກວດກາລັດແຂວງສາລະວັນ, ມີຄະນະປະຈໍາພັກ ແຂວງ, ກໍາມະການພັກແຂວງ, ເລຂາຄະນະພັກຮາກຖານ ແລະປະ ທານຄະນະກວດກາ 08 ຕົວເມືອງເຂົ້າຮ່ວມ.

 ສະຫາຍ ເລີດສະໝີ ຈັນສີຍະວົງ ຮອງປະທານຄະນະກວດກາແຂວງໄດ້ສະຫຼຸບການເຄື່ອນໄຫວວຽກງານກວດກາ 5 ປີ (2016-2020) ປະຈໍາປີ 2020 ແລະທິດ ທາງແຜນການປີ 2021 ໄລຍະຜ່ານມາຄະນະກວດກາແຂວງກໍ່ໄດ້ເອົາໃຈໃສ່ຊີ້ນໍາ-ນໍາພາໃນການຄົ້ນຄວ້າເຊື່ອມຊຶມ: ຜັນຂະຫຍາຍ ແລະຈັດຕັ້ງປະຕິບັດມະຕິກອງປະ ຊຸມໃຫຍ່ຄັ້ງທີ X ຂອງພັກ, ມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງ ແລະມະຕິກອງປະຊຸມໃຫຍ່ຂັ້ນຂອງຕົນໂດຍຫັນເປັນແຜນງານໂຄງການ ອັນລະອຽດ, ເອົາໃຈໃສ່ໃນການປັບປຸງກໍ່ສ້າງພັກຕາມ 5 ຫຼັກການ, 3 ທິດນໍາຂອງພັກ, ໄດ້ຕິດຕາມກວດກາການຈັດຕັ້ງປະຕິບັດແຜນພັດທະນາເສດຖະກິດສັງຄົມ 5 ປີ ຄັ້ງທີ VIII ຜ່ານການຈັດຕັ້ງປະຕິບັດເຫັນວ່າເສດຖະກິດມີການຂະຫຍາຍຕົວຢ່າງຕໍ່ເນື່ອງ ແລະສະເລ່ຍ 7% ຕໍ່ປີ, ລາຍຮັບສະເລ່ຍຕໍ່ຫົວຄົນບັນລຸໄດ້ 9,72 ລ້ານກີບ ຫຼືເທົ່າກັບ 1.147 ໂດລາ, ສາມາດຈັດເກັບລາຍຮັບເຂົ້າງົບປະມານໄດ້ 806 ຕື້ກີບ, ທຽບໃສ່ແຜນການ 5 ປີ ປະຕິບັດ 103, 96% ມີໂຄງການກໍ່ສ້າງພື້ນຖານໂຄງລ່າງທັງໝົດ 162 ໂຄງການ,ລວມມູນຄ່າ 1.301,27 ຕື້ກີບ, ສາມາດຈັດຕັ້ງປະຕິບັດສໍາເລັດ 100%, ຈໍານວນ 131 ໂຄງການ ແລະຍັງສືບຕໍ່ປະຕິບັດ 31 ໂຄງ ການ.

  ພ້ອມນີ້ຍັງໄດ້ດໍາເນີນການກວດກາໂຄງການລົງທຶນຂອງລັດຕາມມະຕິຂອງສະພາແຫ່ງຊາດ ແລະລັດຖະບານຮ່ວມກັບໜ່ວຍງານສະເພາະກິດກວດກາຂັ້ນສູນກາງ ແລະຂັ້ນແຂວງທັງໝົດ 43 ໂຄງການ, ໄດ້ດໍາເນີນການກວດກາໂຄງການລົງທຶນຂອງລັດທີ່ມີ ມູນຄ່າ 10 ຕື້ກີບລົງມາ ຈໍານວນ 14 ໂຄງການ, ຕິດຕາມ-ກວດກາ ທຶນພັດທະນາຊົນນະບົດ-ລຶບລ້າງຄວາມທຸກຍາກ ແລະເງິນກອງທຶນບູລະນະທາງຫຼວງແຫ່ງຊາດ, ທົ່ວແຂວງໄດ້ຮັບທຶນທັງໝົດ 9 ໂຄງການລວມມູນຄ່າ 70,14 ຕື້ກີບ, ຍັງສືບຕໍ່ຂັດຕັ້ງປະຕິບັດ 1 ໂຄງການ ມູນຄ່າ 3,25 ຕື້ກີບ, ຕິດຕາມ ກວດກາຂຸດຄົ້ນແຮ່ທາດຊະນິດຕ່າງໆ, ຕິດຕາມກວດກາການຈັດຕັ້ງປະຕິບັດຄໍາສັ່ງເລກທີ 15/ນຍ ກ່ຽວກັບການຄຸ້ມຄອງປ່າໄມ້-ທຸລະກິດໄມ້ໃນທົ່ວແຂວງ.

  ນອກຈາກນັ້ນຍັງໄດ້ເພີ່ມທະວີເອົາໃຈໃສ່ຕໍ່ວຽກງານສະກັດກັ້ນຕ້ານການສໍ້ລາດບັງຫຼວງ ແລະບັນດາປາກົດການຫຍໍ້ທໍ້ພຶດຕິກໍາທີ່ເປັນການສໍ້ລາດບັງຫຼວງຢ່າງປົກກະຕິແລະຕໍ່ເນື່ອງ,ສ້າງເງື່ອນໄຂອໍານວຍຄວາມສະດວກໃຫ້ສະມາຊິກພັກພະນັກງານ-ລັດຖະກອນ ແລະປະຊາຊົນບັນດາເຜົ່າຍື່ນຄໍາຮ້ອງຄໍາສະເໜີຕໍ່ການຈັດຕັ້ງພັກ-ລັດທີ່ລະເມີດມະຕິຄໍາສັ່ງ, ຂໍ້ກໍານົດ, ກົດລະບຽບຂອງພັກ, ກົດໝາຍ ແລະລະບຽບການຕ່າງໆຂອງລັດ.

  ນອກຈາກນີ້ຜູ້ເຂົ້າຮ່ວມກອງປະຊຸມຍັງໄດ້ຮັບຟັງການລາຍງານລົງເລິກກ່ຽວກັບວຽກງານຕິດຕາມ-ກວດກາພັກ, ວຽກງານກວດກາຕາມຜົນຂອງການກວດສອບ,ວຽກ ງານສະກັດກັ້ນການສໍ້ລາດບັງຫຼວງ ແລະສືບສວນ-ສອບສວນ, ວຽກງານຄົ້ນຄວ້າຄໍາຮ້ອງ-ຄໍາສະເໜີ ແລະ ວຽກງານຕິດຕາມກວດກາການປະຕິບັດຜົນຂອງການກວດສອບຈາກພະແນກການທີ່ກ່ຽວຂ້ອງ ແລະບັນດາຜູ້ແທນກອງປະຊຸມກໍ່ໄດ້ປະກອບຄໍາເຫັນຕາມການເຈາະຈີ້ມຂອງປະທານກອງປະຊຸມ.

ຂ່າວ: ກິນດາວັນ ອ້ວນນາຄຸ

แชร์