ເບີ່ງເງື່ອນໄຂກ່ອນເດີນທາງເຂົ້າ-ອອກ ນະຄອນຫຼວງວຽງຈັນ

   ນະຄອນຫຼວງວຽງຈັນແມ່ນເຂດດຽວຂອງລາວທີ່ຍັງມີການລະບາດຂອງພະຍາດໂຄວິດ-19 ໃນຊຸມຊົນສະນັ້ນ, ຄະນະສະເພາະກິດປ້ອງກັນ, ຄອບຄຸມ ແລະແກ້ໄຂການລະບາດຂອງພະຍາດ COVID-19 ນະຄອນຫຼວງວຽງຈັນໄດ້ອອກແຈ້ງການກ່ຽວກັບເງື່ອນໄຂໃນການອະນຸຍາດໃຫ້ບຸກຄົນ, ນິຕິບຸກຄົນ, ການຈັດຕັ້ງພາຍໃນແລະຕ່າງປະເທດທີ່ມີຄວາມຈຳເປັນເດີນທາງເຂົ້າ-ອອກ ນະຄອນຫຼວງວຽງຈັນນັບແຕ່ວັນທີ 5-19 ມິຖຸນາ 2021 ຕ້ອງມີເງື່ອນໄຂດັ່ງນີ້:

ການຂໍອະນຸຍາດ.

  1. 1. ຂະບວນລົດຜູ້ນໍາ, ລົດສະຫຼາມ, ລົດສົ່ງຄົນເຈັບ, ລົດກູ້ໄພ, ລົດດັບເພີງ ແລະລົດຄະນະສະເພາະກິດ, ລົດຂົນສົ່ງສິນຄ້າ, ຂົນສົ່ງໂຄງການ, ແລະເຄື່ອງຮັບໃຊ້ການຜະລິດບໍ່ຈຳເປັນຂໍອະນຸຍາດ;
  2. 2. ນັກການທູດ, ຊ່ຽວຊານ, ວິຊາການຈາກອົງການຈັດຕັ້ງສາກົນ: ໃຫ້ມີໃບສະເໜີຈາກສະຖານທູດ ຫຼືອົງການຂອງຕົນເພື່ອອະນຸຍາດເດີນທາງຈາກ ຂະນະສະເພາະກິດສູນກາງ.
  3. 3. ພະນັກງານຂອງລັດຂັ້ນສູນກາງ ແລະກຳລັງ ປກຊ-ປກສ ໃຫ້ຂໍອະນຸຍາດການຈັດຕັ້ງຂອງຕົນ.
  4. 4. ພະນັກງານຂັ້ນທ້ອງຖິ່ນ, ພະນັກງານວິສາຫະກິດ ແລະພາກສ່ວນເອກະຊົນ (ນິຕິບຸກຄົນ) ໃຫ້ມີໃບສະເໜີຈາກພາກສ່ວນຂອງຕົນ.
  5. 5. ນັກບວດ: ໃຫ້ມີໃບສະເໜີຈາກວັດ, ໂບດ ຫຼືອົງການປົກຄອງບ້ານຂອງຕົນ;
  6. 6. ປະຊາຊົນ: ໃຫ້ມີໃບສະເໜີຂອງຕົນໂດຍຜ່ານອົງການປົກຄອງບ້ານ.
  7. 7. ຄົນຕ່າງດ້າວ ແລະຊາວຕ່າງປະເທດ (ບຸກຄົນ): ໃຫ້ມີໃບສະເໜີຂອງຕົນ.
  8. 8. ບໍ່ອະນຸຍາດໃຫ້ບຸກຄົນທີ່ເປັນກຸ່ມສ່ຽງຢູ່ເຂດ/ບ້ານແດງ, ຜູ້ສຳຜັດກ້ຊິດກັບຜູ້ຕິດເຊື້ອພະຍາດ COVID-19, ບຸກຄົນທີ່ຖືກກຳຈັດບໍລິເວນ ແລະບຸກຄົນທີ່ປິ່ນປົວຫາຍດີທີ່ກຳຈັດບໍລິເວນບໍ່ຄົບ 14 ມື້ ເດີນທາງເຂົ້າ-ອອກນະຄອນຫຼວງວຽງຈັນເດັດຂາດ.

ການປະກອບເອກະສານ

  1. 1. ໃບສະເໜີຂໍອະນຸຍາດໃຫ້ມີຂໍ້ມູນຈະແຈ້ງ: ຊື່ ແລະນາມສະກຸນ, ອາຍຸ, ອາຊີບ, ທີ່ຢູ່ປະຈຸບັນ (ບ້ານ, ເມືອງ, ແຂວງ) ຫຼືບ່ອນເຮັດວຽກ, ຈຸດປະສົງການເດີນທາງ (ໄປປະຕິບັດໜ້າທີ່ທາງການ, ໄປວຽກໂຄງການໄປທຳການຜະລິດ, ໄປຂົນສົ່ງສິນຄ້າ-ສະບຽງອາຫານ, ພີ່ນ້ອງເຈັບເປັນ-ເສຍຊີວິດ, ໄປໂຮງໝໍ,ກັບຄືນພູມລຳເນົາສຳລັບ ຄົນຕ່າງແຂວງທີ່ຄ້າງຢູ່ນະຄອນຫຼວງ), ສະຖານທີ່ຈະເດີນທາງໄປ (ບ້ານ, ເມືອງ, ແຂວງ) ພາຫະນະທີ່ຈະນຳໃຊ້ (ຍີ່ຫໍ້, ປະເພດ, ສີ ແລະເລກທະບຽນ);
  2. 2. ເອກະສານເພີ່ມເຕີມ: ສຳເນົາບັດປະຈໍາຕົວ ຫຼື ປຶ້ມສຳມະໂນຄົວ ຫຼື ໃບຢັ້ງຢືນທີ່ຢູ່ ຫຼື ຂໍ້ຕົກລົງແຕ່ງຕັ້ງໄປວຽກທາງການ, ໃບຢັ້ງຢືນການຮັບວັກແຊງ ປ້ອງກັນ COID-19 ຄົບ 2 ເຂັມ, ສຳເນົາໃບທະບຽນລົດ, ສຳລັບຄົນຕ່າງປະເທດຕ້ອງມີເອກະສານຢັ້ງຢືນການອະນຸຍາດເຂົ້າມາ ສປປ ລາວ, ສຳເນົາ PA SSPORT, ໃບຢັ້ງຢືນການຈຳກັດບໍລິເວນຄົບ 14 ວັນ, ໃບຢັ້ງຢືນຜົນກວດ COVID-19 ແລະໃບຢັ້ງຢືນການຮັບວັກແຊງປ້ອງກັນ COVID-19 ຄົບ 2 ເຂັມ.

ການຮັບເອກະສານຂໍອະນຸຍາດເດີນທາງເປີດທຸກວັນ ເວລາ 8:00-16:00 ໂມງ.

   ໃຫ້ສົ່ງເອກະສານຂໍອະນຸຍາດຜ່ານທາງ WhatsApp ຂອງພະແນກສາທາລະນະສຸກນະຄອນຫຼວງວຽງຈັນ 020 9591 7490, 020 9285 3909, 020 2322 2592, 020 9514 4492; ເບີໂທສອບຖາມ: 020 9261 8918, 020 9657 3058, 020 5889 4533, 020 9857 6462, 020 2928 8977, 020 9535 3453, 020 2980 4250.

แชร์