5 ເດືອນ ສາລະວັນ ເກັບລາຍຮັບໄດ້ 46,26 ຕື້ກີບ

  ໄລຍະ 5 ເດືອນຜ່ານມາ ແຂວງສາລະວັນ ປະຕິບັດໄດ້ການຈັດເກັບລາຍຮັບໄດ້ທັງໝົດ 46,26 ຕື້ກີບ ເທົ່າກັບ 26,74% ຂອງແຜນການປີທຽບໃສ່ໄລຍະດຽວກັນກັບປີແລ້ວຫຼຸດ 6,46% ໃນນັ້ນລາຍຮັບພູດສູນກາງປະຕິບັດ ໄດ້11,07 ຕື້ກີບ ເທົ່າກັບ 17,07% ຂອງແຜນການປີ, ລາຍຮັບພູດທ້ອງຖິ່ນປະຕິບັດໄດ້ 35,19 ຕື້ກີບ ເທົ່າກັບ 32,57% ຂອງແຜນການປີ, ໃນນັ້ນສ່ວຍສາອາກອນ 31,43 ຕື້ກີບ, ເທົ່າກັບ 31,43%, ຄຸ້ມຄອງຊັບສິນ 3,75 ຕື້ກີບ ເທົ່າກັບ 47,93% ແລະຄຸ້ມຄອງລັດວິສາຫະກິດ 3,8 ລ້ານກວ້າກີບ, ດ້ານການເບີກຈ່າຍປະຕິບັດໄດ້ 166,56 ຕື້ກີບ ເທົ່າກັບ 42,46% ອີກ 7 ເດືອນຕໍ່ໜ້າຈະສູ້ຊົນເກັບລາຍຮັບໃຫ້ໄດ້ 71 ຕື້ກວ່າກີບ.

  ຂໍ້ມູນດັ່ງກ່າວພະແນການເງິນແຂວງສາລະວັນໄດ້ເປີດເຜີຍເນື່ອງໃນໂອກາດຮ່ວມກອງປະຊຸມທາງໄກກັບກະຊວງການເງິນ ແລະພະແນກການເງິນຕ່າງແຂວງໃນທົ່ວປະເທດຈັດຂຶ້ນໃນວັນທີ 3 ມິຖຸນາ 2021 ຢູ່ທີ່ຫ້ອງປະຊຸມກະຊວງການເງິນໂດຍການເປັນປະທານຂອງ ທ່ານ ບຸນໂຈມ ອຸບົນປະເສີດ ລັດຖະມົນຕິກະຊວງການເງິນ, ເຂົ້າຮ່ວມມີບັນດາທ່ານຮອງລັດຖະມົນຕິກະຊວງການເງິນ, ຫົວໜ້າກົມສ່ວຍສາອາກອນ ແລະຫົວໜ້າງົບປະມານ, ແຂວງສາລະວັນ ເຂົ້າຮ່ວມໂດຍທ່ານ ຂັນທະລັກ ໂພ ໄຊ ຫົວໜ້າພະແນກການເງິນແຂວງສາລະວັນພ້ອມດ້ວຍຄະນະ ແລະພະນັກງານວິຊາການທີ່ກ່ຽວຂ້ອງ.

 ກອງປະຊຸມຄັ້ງນີ້ໄດ້ຕີລາຄາຄືນກ່ຽວກັບການຈັດຕັ້ງປະຕິບັດການຈັດເກັບລາຍຮັບເຂົ້າງົບປະມານໃນໄລຍະ 5 ເດືອນຜ່ານມາພ້ອມທັງວາງທິດທາງ 7 ເດືອນຕໍ່ໜ້າ,ຊຶ່ງແຕ່ລະແຂວງກໍ່ໄດ້ມີການປະກອບຄຳຄິດຄຳເຫັນເພື່ອເຮັດໃຫ້ວຽກງານດັ່ງກ່າວໄດ້ຮັບການຈັດຕັ້ງປະຕິບັດໄດ້ຕາມແຜນການ ແລະຖືກຕ້ອງເປັນຕົ້ນ: ການຈັດເກັບລາຍຮັບ, ການສັງລວມສະຖິຕິຫົວໜ່ວຍວິສາຫະກິດ, ການຄຸ້ມຄອງຕິດຕາມ ແລະການເກັບຄ່າທຳນຽມຕ່າງໆ, ກວດກາຂຶ້ນການຄິດໄລ່ອາກອນທີ່ຕິດພັນກັບງົບປະມານໃຫ້ຖືກຕ້ອງຕາມແຈ້ງການຂອງກະຊວງລັດຖະມົນຕິການເງິນວາງອອກໃຫ້ເປັນເອກະພາບກັບໃນທົ່ວປະເທດ,ພ້ອມທັງເກັບກຳຂໍ້ມູນສະຖິຕິສັນຍາເຊົ່າສຳປະທານດິນ, ມາດຕະການແກ້ໄຂໜີ້ຄ້າງມອບເຊົ່າສຳປະທານ, ການຄຸ້ມຄອງການສົ່ງອອກແຮ່ທາດຕ່າງໆ, ການຈັດຊື້-ຈັດຈ້າງດ້ວຍທຶນຂອງລັດ ແລະການແກ້ໄຂຜົນການກວດສອບຂອງອົງການກວດສອບແຫ່ງລັດ ແລະຜົນການກວດສອບພາກທີ່ກວດເຫັນລາຍຊັບສິນທີ່ຍັງຄ້າງມອບ ແລະຜົນການກວດສອບອື່ນໆ.

ຂ່າວ: ສິດຕາ ເພັດວົງສາ

แชร์