ສະຫວັນ ປະຊຸມຄັ້ງປະຖົມມະລືກຂອງ ສພຂ ຊຸດທີ II

  ກອງປະຊຸມຄັ້ງປະຖົມມະລືກຂອງສະພາປະຊາຊົນແຂວງສະຫວັນນະເຂດຊຸດທີ ll ໄດ້ໄຂຂຶ້ນຢ່າງເປັນທາງການໃນຄັ້ງວັນທີ 3 ມິຖຸນາ 2021 ນີ້ຢູ່ທີ່ຫໍວັດທະນະທຳ ໄກສອນ ພົມວິຫານ, ແຂວງສະຫວັນນະເຂດໂດຍການເປັນປະທານຂອງທ່ານ ຄຳເຜີຍ ຜັນທະຈອນ ປະທານສະພາປະຊາຊົນແຂວງ, ເຂົ້າຮ່ວມມີທ່ານ ສັນຕິພາບ ພົມວິຫານ ກຳມະການສູນກາງພັກ ເລຂາພັກແຂວງເຈົ້າແຂວງສະຫວັນນະເຂດບັນດາທ່ານສະມາຊິກສະພາແຫ່ງຊາດປະຈຳເຂດເລືອກຕັ້ງທີ 13 ແລະ ສະມາຊິກສະພາປະຊາຊົນແຂວງເຂົ້າຮ່ວມ.

  ທ່ານ ຄຳເຜີຍ ຜັນທະຈອນ ປະທານສະພາປະຊາຊົນແຂວງໄດ້ກ່າວສູນທອນພົດໄຂກອງປະຊຸມຢ່າງເປັນທາງການວ່າ: ກອງປະຊຸມພວກເຮົາເປີດຂຶ້ນໃນບັນຍາກາດທີ່ແຂວງສະຫວັນນະເຂດເອົາໃຈໃສ່ຈັດຕັ້ງປະຕິບັດບັນດາມາດຕະການຕ່າງໆທີ່ຄະນະສະເພາະກິດຂັ້ນສູນກາງ ແລະຂັ້ນແຂວງວາງອອກເພື່ອຄວບຄຸມ ແລະແກ້ໄຂພະຍາດໂຄວິດ-19 ຢ່າງເຂັ້ມງວດຊຶ່ງກອງປະຊຸມຄັ້ງປະຖົມມະລືກຂອງສະພາປະຊາຊົນແຂວງ ຊຸດທີ II ຈະໄດ້ພິຈາລະນາ ແລະຕົກລົງບັນຫາສຳຄັນພື້ນຖານຂອງແຂວງເປັນ ຕົ້ນແມ່ນ: ຮັບຟັງການລາຍງານຜົນສຳເລັດການເລືອກຕັ້ງ ແລະການຢັ້ງຢືນຄຸນລັກສະນະຂອງສະມາຊິກສະພາປະຊາຊົນແຂວງສະຫວັນນະເຂດ ຊຸດທີ II, ພິຈາລະ ນາ, ຮັບຮອງໂຄງປະກອບກົງຈັກ ແລະບຸກຄະລາກອນຂອງສະພາປະຊາຊົນແຂວງສະຫວັນນະເຂດຊຸດທີ II ເປັນຕົ້ນການເລືອກຕັ້ງປະທານສະພາປະຊາຊົນແຂວງ ຫຼື ປະທານຄະນະປະຈຳສະພາປະຊາຊົນແຂວງສະຫວັນນະເຂດ ຊຸດທີ II,ການເລືອກຕັ້ງຮອງປະທານສະພາປະຊາຊົນແຂວງ ຫຼືຮອງປະທານຄະນະປະຈຳສະພາປະຊາຊົນແຂວງ ຊຸດທີ II, ການເລືອກຕັ້ງກຳມະການຄະນະປະຈຳສະພາປະຊາຊົນແຂວງ ຊຸດທີ II ເພີ່ມເຕີມ, ພິຈາລະນາຮັບຮອງເອົາກົງຈັກ ແລະຮັບຮອງເອົາການແຕ່ງຕັ້ງປະທານຄະນະກຳມະການ, ເລຂາທິການສະພາປະຊາຊົນແຂວງ ແລະຮອງປະທານຄະນະກຳມະການຂອງສະພາປະຊາຊົນ ແຂວງຊຸດທີ II, ພິຈາລະນາ, ຮັບຮອງໂຄງປະກອບກົງຈັກ ແລະບຸກຄະລາກອນຂອງອົງການປົກຄອງແຂວງເປັນຕົ້ນ: ການເລືອກຕັ້ງເຈົ້າແຂວງ,ຮອງເຈົ້າແຂວງ,ການພິຈາລະນາຮັບຮອງເອົາກົງຈັກ ແລະຮັບຮອງເອົາການແຕ່ງຕັ້ງບັນດາທ່ານຫົວໜ້າພະແນກ, ອົງການລັດທຽບເທົ່າພະແນກຂັ້ນແຂວງຂອງອົງການປົກຄອງແຂວງ, ພິຈາລະນາ, ຮັບຮອງເອົາການເລືອກຕັ້ງຫົວໜ້າອົງການໄອຍະການປະຊາຊົນແຂວງ ແລະປະທານສານປະຊາຊົນແຂວງ, ພິຈາລະນາ,ຮັບຮອງເອົາແຜນພັດທະນາເສດຖະກິດສັງຄົມ ແລະແຜນງົບປະມານແຫ່ງລັດ 5 ປີ (2021-2025) ຂອງອົງການປົກຄອງແຂວງ,ພິຈາລະນາ,ຮັບຮອງເອົາແຜນການເຄື່ອນໄຫວວຽກງານ 5 ປີ (2021-2025) ຂອງອົງການໄອຍະການປະຊາ ຊົນແຂວງ ແລະສານປະຊາຊົນແຂວງ, ພິຈາລະນາ, ຮັບຮອງເອົາແຜນການເຄື່ອນໄຫວວຽກງານ 5 ປີ (2021-2025) ຂອງສະພາປະຊາຊົນແຂວງ ຊຸດທີ II. ບັນ ດາເນື້ອໃນຂອງກອງປະຊຸມຄັ້ງນີ້ແມ່ນມີຄວາມໝາຍສຳຄັນເປັນຢ່າງຍ່ິງຕໍ່ຂະບວນວິວັດແຫ່ງການພັດທະນາແຂວງພວກເຮົາ 5 ປີຕໍ່ໜ້າ, ສະນັ້ນຂ້າພະເຈົ້າຂໍຮຽກຮ້ອງມາຍັງບັນດາທ່ານສະມາຊິກສະພາແຫ່ງຊາດຊຸດທີ IX ປະຈຳເຂດເລືອກຕັ້ງທີ 13, ບັນດາທ່ານສະມາຊິກສະພາປະຊາຊົນແຂວງ ຊຸດທີ II ຈົ່ງພ້ອມກັນສຸມສະຕິປັນ ຍາ, ຄວາມຮູ້ຄວາມສາມາດເຂົ້າໃນການຄົ້ນຄວ້າ, ປະກອບຄຳເຫັນໃຫ້ເລີກເຊິ່ງ, ຖິ່ຖ້ວນ ແລະມີຈຸດສຸມເຂົ້າໃສ່ແຕ່ລະເນື້ອໃນທີ່ຈະໄດ້ນຳມາພິຈາລະນາໃນກອງປະຊຸມຄັ້ງນີ້, ອັນສຳຄັນທີ່ສຸດແມ່ນທຸກບັນຫາທີ່ໄດ້ພິຈາລະນາຮັບຮອງແລ້ວແມ່ນສາມາດຈັດຕັ້ງປະຕິບັດໄດ້ຢ່າງມີປະສິດທິຜົນ, ຮັບປະກັນເຖີງສິດ ແລະຜົນປະໂຫຍດຂອງປະຊາ ຊົນຊາວແຂວງສະຫວັນນະເຂດບັນດາເຜົ່າຢ່າງແທ້ຈິງ.

  ກອງປະຊຸມຄັ້ງປະຖົມມະລືກຂອງສະພາປະຊາຊົນແຂວງສະຫວັນນະເຂດ ຊຸດທີ ll ໄດ້ຮັບຮອງເອົາການແຕ່ງຕັ້ງທ່ານ ກົງແກ້ວ ມີວໍລະຈັກ ຮອງເລຂາພັກແຂວງສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 13 ເປັນປະທານສະພາປະຊາຊົນແຂວງ, ຮັບຮອງເອົາການແຕ່ງຕັ້ງທ່ານ ຄຳຜັນ ຄູນສະຫວັນ ກຳມະການ ປະຈຳພັກແຂວງສະມາຊິກສະພາແຫ່ງຊາດປະຈຳເຂດເລືອກຕັ້ງທີ 13 ເປັນຮອງປະທາສະພາປະຊາຊົນແຂວງ ແລະຮັບຮອງເອົາການແຕ່ງຕັ້ງທ່ານ ນາງ ພູທອນ ແກ້ວພູວົງ ສະມາຊິກສະພາປະຊາຊົນແຂວງເປັນຮອງປະທານສະພາປະຊາຊົນແຂວງ.

แชร์