LaoVietBank ຊ່ວຍເຫຼືອນັກສຶກສາຄະນະວິທະຍາສາດທຳມະຊາດ ຕ້ານໂຄວິດ-19.
ທະນາຄານ ຮ່ວມທຸລະກິດ ລາວ-ຫວຽດ ຈໍາກັດ (LaoVietBank) ໄດ້ສະໜັບສະໜູນນໍ້າດື່ມ ແລະເງິນສົດຈໍານວນໜຶ່ງເພື່ອຊ່ວຍເຫຼືອໃຫ້ແກ່ບັນດານັກສຶກສາທີ່ອາໃສຢູ່ຫໍພັກ,ນັກສຶກສາທີ່ຖືກຜົນກະທົບໃນໄລຍະການແຜ່ລະບາດຂອງພະຍາດໂຄວິດ-19 ທີ່ຢູ່ພາຍໃຕ້ການຄຸ້ມຄອງຂອງຄະນະວິທະຍາສາດທໍາມະຊາດ, ມະຫາວິທະ ຍາໄລແຫ່ງຊາດ.
ໃນຫຼາຍປີຜ່ານມາ, ທະນາຄານຮ່ວມທຸລະກິດ ລາວ-ຫວຽດ ຈໍາກັດ ພວກເຮົາໄດ້ໃຫ້ການສະໜັບສະໜູນທາງດ້ານວັດຖຸ-ອຸປະກອນຮັບໃຊ້ແກ່ວຽກງານການສຶກສາຢູ່ມະຫາວິທະຍາໄລແຫ່ງຊາດຫຼາຍຄັ້ງ. ສໍາລັບຄັ້ງນີ້, ກໍ່ໄດ້ສືບຕໍ່ໃຫ້ການຊ່ວຍເຫຼືອ ແລະເຫັນໄດ້ເຖິງຄວາມຈໍາເປັນຂອງນ້ອງໆນັກສຶກສາຕ່າງແຂວງອາໃສຢູ່ຫໍພັກທີ່ໄດ້ຮັບຜົນກະທົບຈາກການລະບາດຮອບໃໝ່ຂອງພະຍາດໂຄວິດ-19.
ອາຈານຜູ້ຕາງໜ້າຂອງຄະນະວິທະຍາສາດທໍາມະຊາດທ່ານໜຶ່ງໃຫ້ຮູ້ວ່າ: ສໍາລັບນໍ້າດື່ມ ແລະເຄື່ອງຮັບໃຊ້ຈໍານວນໜຶ່ງທີ່ທາງທະນາຄານຮ່ວມທຸລະກິດ ລາວ-ຫວຽດ ຈໍາກັດ ໄດ້ຈັດສົ່ງມາໃຫ້ກ່ອນໜ້ານີ້, ພວກເຮົາໄດ້ຂົນເອົາໄປໄວ້ບ່ອນຈຸດແຈກຢາຍເປັນທີ່ຮຽບຮ້ອຍເພື່ອກະກຽມແຈກຢາຍໃຫ້ແກ່ນັກສຶກສາຕໍ່ໄປ. ສ່ວນເງິນສົດແມ່ນຈະໄດ້ຈັດແບ່ງໃຫ້ຕາມຄວາມເໝາະສົມເລື່ອງອາຫານການກິນ ແລະເຂົາເຈົ້າຕ້ອງໄດ້ຈ່າຍຄ່າອິນເຕີເນັດໃນການຮຽນອອນລາຍນໍາອີກ.
ພິທີມອບເຄື່ອງຊ່ວຍເຫຼືອດັ່ງກ່າວ, ຈັດຂຶ້ນໃນວັນທີ 02 ມິຖຸນາ 2021 ຜ່ານມາ, ຢູ່ຄະນະວິທະຍາສາດທໍາມະຊາດມະຫາວິທະຍາໄລແຫ່ງຊາດ. ຕາງໜ້າ LaoVietBank ໃຫ້ກຽດມອບໂດຍທ່ານ ຫງວຽນ ຈ່ຽວ ນາມ, ຫົວໜ້າພະແນກຂໍ້ມູນຂ່າວສານ ແລະຮັບໂດຍ ທ່ານ ຮສ.ປອ. ບຸນຜັນ ຕົ້ນແພງ, ຄະນະບໍດີ-ຄະນະວິທະຍາສາດທໍາມະຊາດ, ມະຫາວິທະຍາໄລແຫ່ງຊາດ.
