ຫຼວງພະບາງ ເສດຖະກິດໄດ້ຮັບການພັດທະນາຫຼາຍດ້ານ

 ການປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020) ຂອງແຂວງຫຼວງພະບາງໄດ້ດໍາເນີນໄປໃນສະພາບການທີ່ປະເທດເຮົາມີຄວາມຫຍຸ້ງຍາກ ແລະສິ່ງທ້າທາຍຫຼາຍຢ່າງເປັນຕົ້ນສະພາບດ້ານການເງິນແມ່ນພົບຄວາມຫຍຸ້ງຍາກໂດຍສະເພາະງົບປະມານການລົງທຶນຂອງລັດນັບມື້ນັບຫຼຸດລົງບວກໃສ່ກັບໄພນໍ້າຖ້ວມ,ໄພແຫ້ງແລ້ງ,ສັດຕູພືດ (ຕັກແຕນ) ທຳລາຍຜົນລະປູກ, ການລະບາດຂອງພະຍາດສັດ (ອະຫິວາໝູ) ແລະ ໄພທຳມະຊາດອື່ນໆຊຶ່ງໄດ້ສ້າງຄວາມເສຍ ຫາຍຕໍ່ກັບຜົນຜະລິດ ແລະ ຊັບສິນຂອງປະຊາຊົນຫຼາຍພໍສົມຄວນ, ນອກຈາກນັ້ນເລີ່ມແຕ່ທ້າຍ ປີ 2019 ມາຮອດປະຈຸບັນແຂວງຫຼວງພະບາງກໍໄດ້ຮັບຜົນກະທົບຈາກການລະບາດຂອງພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ (COVID 19) ຊຶ່ງໄດ້ສົ່ງຜົນກະທົບໃຫ້ອັດຕາການຂະຫຍາຍຕົວຂອງເສດຖະກິດ, ໃນປີ 2016 ບັນລຸໄດ້ 8,4% ແລະຫຼຸດລົງມາເປັນ 7,7% ໃນປີ 2019 ແລະໃນປີ 2020 ນີ້ຢູ່ໃນລະດັບ 4,4%; ນອກຈາກນັ້ນຄາດໝາຍທາງດ້ານສັງຄົມຫຼາຍຄາດ ໝາຍກໍບໍ່ບັນລຸຕາມແຜນການທີ່ວາງໄວ້.

  ເພື່ອແກ້ໄຂສະພາບດັ່ງທີ່ກ່າວມານັ້ນ, ອົງການປົກຄອງທຸກຂັ້ນຂອງແຂວງຫຼວງພະບາງໄດ້ນໍາພາທະຫານ-ຕໍາຫຼວດ ແລະປະຊາຊົນ, ໄດ້ຮັບການຮ່ວມມືຊ່ວຍເຫຼືອຈາກການຈັດຕັ້ງສາກົນ ແລະ ສະຖາບັນການເງິນ, ປະເທດເພື່ອນມິດພ້ອມທັງທຸກພາກສ່ວນຂອງ ແຂວງໄດ້ສຸມກໍາລັງແຮງ ແລະ ທຶນຮອນເຂົ້າໃສ່ເພື່ອຟື້ນຟູບັນດາພື້ນຖານໂຄງລ່າງ ແລະການຜະລິດທີ່ໄດ້ຮັບຜົນກະທົບຈາກໄພພິບັດຕ່າງໆ, ນອກຈາກນັ້ນ, ຍັງໄດ້ອອກນະໂຍບາຍ ແລະມາດຕະການຕ່າງໆເພື່ອຊຸກຍູ້ການພັດທະນາເສດຖະກິດ-ສັງຄົມ ແລະການຫຼຸດຜ່ອນຜົນກະທົບຕ່າງໆ, ຍ້ອນຄວາມບຸກບືນ ແລະ ສູ້ຊົນຈຶ່ງເຮັດໃຫ້ເສດຖະກິດຂອງແຂວງຫຼວງພະບາງຂະຫຍາຍຕົວໃນລະດັບທີ່ດີສົມຄວນ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນ ໂດຍສະເພາະໃນເຂດຊົນນະບົດ ແລະເຂດຫ່າງໄກສອກຫຼີກ, ສັງຄົມມີຄວາມສະຫງົບ ແລະມີຄວາມເປັນລະບຽບຮຽບຮ້ອຍໂດຍພື້ນຖານ.

   ໃນ 5 ປີຜ່ານມາໂຄງລ່າງພື້ນຖານຫຼາຍດ້ານໄດ້ຮັບການພັດທະນາດີຂຶ້ນ, ການຜະລິດໃນຂະແໜງກະສິກໍາ, ອຸດສາຫະກໍາ ແລະການບໍລິການໄດ້ເພີ່ມຂຶ້ນໃນລະດັບທີ່ເພິ່ງພໍໃຈ, ການລົງທຶນທັງພາກລັດ ແລະເອກະຊົນກໍຢູ່ໃນລະດັບດີສົມຄວນ, ການເກັບລາຍຮັບງົບປະມານປະຕິບັດໄດ້ຕາມຄາດໝາຍ, ສາມາດຮັບປະກັນການຈ່າຍ ເງິນເດືອນໃຫ້ພະນັກງານ-ລັດຖະກອນໄດ້ປົກກະຕິຄົບທຸກເດືອນ, ລວມຍອດມູນຄ່າຜະລິດຕະພັນພາຍໃນ (GDP) ໃນ 5 ປີ ບັນລຸໄດ້ 35.042 ຕື້ກວ່າກີບ, ສະເລ່ຍ 7.008 ຕື້ກວ່າກີບຕໍ່ປີ; ອັດຕາການ ຂະຫຍາຍຕົວຂອງເສດຖະກິດ ເພີ່ມຂຶ້ນສະເລ່ຍ 7,3% ຕໍ່ປີ, ເທົ່າ ກັບ 81,11% ຂອງແຜນການ (ແຜນການ 9%); ໂຄງປະກອບລວມຍອດມູນຄ່າຜະລິດຕະພັນພາຍໃນໄດ້ຫັນປ່ຽນໄປຕາມທ່າແຮງເສດຖະກິດຂອງແຂວງຄືການບໍລິການ ແລະອຸດສາຫະກຳຫຼາຍຂຶ້ນຊຶ່ງສະແດງອອກຄື: ຂົງ ເຂດກະສິກຳ-ປ່າໄມ້ ເພີ່ມຂຶ້ນສະເລ່ຍ 3,96% ຕໍ່ປີ, ຂົງເຂດອຸດສາຫະກຳເພີ່ມຂຶ້ນສະເລ່ຍ 8,83% ຕໍ່ປີ, ຂົງເຂດການບໍລິການເພີ່ມຂຶ້ນສະເລ່ຍ 8,88% ຕໍ່ປີ, ການສົ່ງອອກສິນຄ້າປະຕິບັດໄດ້ 1.349 ຕື້ກວ່າກີບ, ເທົ່າກັບ 67,09% ຂອງແຜນການ ແລະນໍາເຂົ້າປະຕິບັດໄດ້ 1.698 ຕື້ກວ່າກີບ ເທົ່າກັບ 104,55% ຂອງ ແຜນການ;ດຶງດູດນັກທ່ອງທ່ຽວພາຍໃນ ແລະຕ່າງປະເທດເຂົ້າມາທ່ຽວຊົມແຂວງຫຼວງພະບາງໄດ້ທັງໝົດ 3.521.409 ເທື່ອຄົນ, ລື່ນແຜນການ 0,61%, ເຫັນວ່າແຕ່ລະປີນັກທ່ອງທ່ຽວແມ່ນເພີ່ມຂຶ້ນຈາກ 577.822 ເທື່ອຄົນໃນປີ 2015 ມາເປັນ 875.564 ເທື່ອຄົນໃນປີ 2020 ຜ່ານມາ.

ຂ່າວ: ຕະວິນຍານ

แชร์