2021 ຫຼວງພະບາງຈະປູກໄມ້ໃຫ້ໄດ້ 121 ກ່ວາເຮັກຕາ

  ເນື່ອງໃນໂອກາດ ວັນທີ 1 ມິຖຸນາ ກໍຄືວັນປູກຕົ້ນໄມ້ແຫ່ງຊາດທາງພະແນກກະສິກໍາ ແລະປ່າໄມ້ ແຂວງຫຼວງພະບາງ ມີແຜນການຈະປູກຕົ້ນໄມ້ທັງໝົດ 85, 500 ຕົ້ນ, ໃນເນື້ອທີ່ປູກ 121,5 ເຮັກຕາ ໃນທົ່ວແຂວງ.

  ທ່ານ ສີວອນ ວົງຄໍາຈັນ ຫົວໜ້າພະແນກກະສິກໍາ ແລະປ່າໄມ້ ແຂວງຫຼວງພະບາງ ໄດ້ໃຫ້ສໍາພາດຕໍ່ນັກຂ່າວພວກເຮົາ ໃນ ວັນທີ 1 ມິຖຸນາ 2021 ນີ້ວ່າ: ແນໃສ່ໃຫ້ການປູກໄມ້ໃຫ້ເປັນປ່າປົກຫຸ້ມໄປດ້ວຍພື້ນທີ່ສີຂຽວທົ່ວແຂວງທາງພະແນກກະສິກໍາ ແລະປ່າໄມ້ແຂວງຫຼວງພະບາງໄດ້ປະສານງານກັບ 11 ເມືອງ ແລະ 1 ນະຄອນໃນການປຸກລະດົມໃຫ້ທຸກພາກສ່ວນທີ່ມີເງື່ອນໄຂປູກຕົ້ນໄມ້ ໃນໂອກາດ ວັນທີ 1 ມິຖຸນາ ກໍຄືວັນປູກຕົ້ນໄມ້ແຫ່ງຊາດໃຫ້ເປັນຂະບວນຟົດຟື້ນ ແລະສໍາລັບການກະກຽມເບ້ຍໄມ້ເພື່ອລົງປູກໃນວັນປູກຕົ້ນໄມ້ປີ 2021 ນີ້ ມີທັງໝົດ 85, 500 ຕົ້ນ, ໃນເນື້ອທີ່ປູກ 121,5 ເຮັກຕາ ໃນທົ່ວແຂວງ. ສ່ວນໃຫຍ່ ແມ່ນເປັນເບ້ຍໄມ້ດູ່, ໄມ້ດູລາຍ, ຍົມຫີນ, ໄມ້ຈໍາປາອິນເດຍ, ສົ້ມຝາດ, ໄມ້ໝາກກໍ່, ໄມ້ສະໂກ ແລະໄມ້ສັກອີກຈໍານວນໜຶ່ງແມ່ນປະເພດໄມ້ປະດັບເປັນຕົ້ນແມ່ນຕົ້ນຝາງແດງ,ຕົ້ນດອກຄູນ ແລະຕົ້ນກະເລົາກະກຽມປູກຕາມໂຮງຮຽນ, ຫ້ອງການ ແລະຕາມແຄມເສັ້ນທາງສາຍຕ່າງໆ. 

ຫາກທຽບໃສ່ປີ 2020 ການປູກຕົ້ນໄມ້ໃນປີ 2021 ນີ້ມີທ່າອ່ຽງຫຼຸດ. ໃນປີ 2020 ໄດ້ປູກໄມ້ທັງໝົດ 146,8 ເຮັກຕາ ແລະໃນປີນີ້ຈະປູກໃຫ້ໄດ້ 121,5 ເຮັກຕາ, ຊຶ່ງຫຼຸດຈາກປີຜ່ານມາ 25,3 ເຮັກຕາ.

   ທ່ານກ່າວຕື່ມອີກວ່າຈາກບັນຫາການປູກຕ້ອງຄຽງຄູ່ກັບການບົວລະບັດປົກປັກຮັກສາເພື່ອໃຫຕົ້ນມັນເຕີບໃຫຍ່ຂຶ້ນກາຍເປັນພື້ນທີ່ສີຂຽວປົກຫຸ້ມຜືນປ່ານັ້ນຈຶ່ງຂໍຮຽກ ຮ້ອງໃຫ້ບັນດາພະນັກງານ, ທະຫານ, ຕໍາຫຼວດ, ຫົວໜ່ວຍທຸລະກິດຕະຫຼອດຮອດພໍ່ແມ່ປະຊາຊົນຈົ່ງເພີ່ມທະວີໃນການປູກໄມ້ໃສ່ພື້ນທີ່ມີເງື່ອນໄຂໃຫ້ຫຼາຍຂຶ້ນ, ປູກແລ້ວຕ້ອງມີການບົວລະບັດຮັກສາເປັນຕົ້ນແມ່ນຖາງຫຍ້າຢ່າງໜ້ອຍ 2-3 ປີ ເພື່ອໃຫ້ຕົ້ນໄມ້ມີການຈະເລີນເຕີບໂຕ ແລະ ມີເປີເຊັນລອດຕາຍ ຫຼື ຈົນກວ່າຕົ້ນໄມ້ສາມາດຈະເລີນເຕີບໂຕດ້ວຍໂຕເອງໄດ້ ແລະ ຊ່ວຍກັນຟື້ນຟູປ່າໄມ້ໃຫ້ມີຄວາມອຸດົມສົມບູນ ແລະ ປະກອບສ່ວນໃນການປົກປັກຮັກສາສິ່ງແວດລ້ອມທັງເປັນການຫຼຸດຜ່ອນມົນລະພິດທາງອາກາດ.

 ສໍາລັບການປູກເບ້ຍໄມ້ໃນປີ 2021 ນີ້ຢູ່11 ເມືອງ 1 ນະຄອນ ຄື: ນະຄອນຫຼວງພະບາງຈະປູກໃຫ້ໄດ້ 4,30 ເຮັກຕາ. ຊຽງເງິນ 2,7 ເຮັກຕາ, ນານ 5 ເຮັກຕາ, ປາກອູ 18 ເຮັກຕາ,ນໍ້າບາກ 2 ເຮັກຕາ,ງອຍ 2 ເຮັກຕາ, ປາກແຮງ 1,5 ເຮັກຕາ, ໂພນໄຊ 10ເຮັກຕາ, ຈອມເພັດ 6 ເຮັກຕາ, ວຽງຄໍາ 35 ເຮັກຕາ, ພູຄູນ 15 ເຮັກຕາ, ແລະເມືອງໂພນທອງ 20 ເຮັກຕາ.

ຂ່າວ: ສີສຸວັນ

แชร์