ໄໝຄຳ ທັນບຸນເຮືອງ ຈາກເຄີຍໝົດໂຕກາຍເປັນຜູ້ຊ່ວຍຄົນຂາດເຂີນ

  ນັບແຕ່ພະຍາດໂຄວິດ-19 ລະບາດຂຶ້ນເທື່ອທີ່ສອງເຫັນວ່າສັງຄົມລາວຫຼາຍໆພາກສ່ວນໄດ້ອອກມາຮ່ວມໃຈຊ່ວຍເຫຼືອເຊິ່ງກັນ ແລະກັນເປັນຕົ້ນແມ່ນການມອບເຄື່ອງ ຊ່ວຍເຫຼືອໃຫ້ກັບປະຊາຊົນຜູ້ທຸກຍາກ ແລະ ນັກສຶກສາຊຶ່ງໃນນັ້ນກໍ່ມີທ່ານ ນາງໄໝຄຳ ທັນບຸນເຮືອງ ເຈົ້າຂອງບໍລິສັດ ດີເວີ້ ຂາເຂົ້າ-ຂາອອກ ຈຳກັດຜູ້ດຽວ ຊຶ່ງເປັນຜູ້ທີ່ເຄີຍໝົດໂຕທາງດ້ານຊັບສິນກໍ່ໄດ້ໃຫ້ການຊ່ວຍເຫຼືອສັງຄົມເຊັ່ນດຽວກັນ.

  ທ່ານ ນາງໄໝຄຳ ທັນບຸນເຮືອງ ເຈົ້າຂອງບໍລິສັດ ດີເວີ້ ຂາເຂົ້າ-ຂາ ອອກຈຳກັດຜູ້ດຽວ ໃຫ້ຮູ້ວ່າ: ໃນປີ 2016 ຄອບຄົວໄດ້ລົ້ມລະລາຍ ແລະ ເກີດມີໜີ້ສິນຈໍານວນຫຼາຍທັງນີ້ກໍ່ຍ້ອນເອົາເງິນໄປຄໍ້າປະກັນໃຫ້ພີ່ນ້ອງຈໍານວນ 200 ລ້ານກີບ, ເອົາເງິນໄປຝາກນໍາບໍລິສັດພີເອັດ 100 ລ້ານກີບ, ປ່ອຍເງິນນອກລະບົບໃຫ້ກັບພີ່ນ້ອງຊຶ່ງໃນໄລຍະທໍາອິດກໍ່ໄດ້ດອກເບ້ຍປົກກະຕິຈາກນັ້ນທາງຄອບຄົວໄດ້ໄປຢືມຕໍ່ນຳຄົນອື່ນມາໃຫ້ລູກຄ້າຢືມຕໍ່ອີກສຸດທ້າຍບໍ່ໄດ້ທັງດອກເບ້ຍ ແລະເງິນຕົ້ນທຶນ ແລະ ຍັງເອົາເຮືອນໄປຈຳທະນາຄານເພື່ອເອົາເງິນມາໝູນຮ້ານເສື້ອຜ້າແຕ່ໄລຍະນັ້ນເສື້ອຜ້າກໍບໍ່ໄດ້ຂາຍປານໃດເຮັດໃຫ້ທາງຄອບຄົວໝູນເງິນບໍ່ທັນ ແລະກາຍເປັນໜີ້ສິນຫຼາຍກວ່າ 1ຕື້ກີບ,

ຊຶ່ງໃນໄລຍະນັ້ນເຈົ້າໜີ້ບາງຄົນຈະມາຂົນເອົາເຄື່ອງເຮືອນ ແລະທາງຄອບຄົວໄດ້ຂາຍທຸກຢ່າງທີ່ມີຄ່າຢູ່ໃນເຮືອນເພື່ອມາໃຊ້ໜີ້ແຕ່ກໍບໍ່ພໍ, ຈາກໜີ້ສິນດັ່ງກ່າວເຮັດໃຫ້ ນາງໄໝຄຳ ທັນບຸນເຮືອງ ຕັດສິນໄຈລຸກຂຶ້ນສູ້ລອງຜິດລອງຖືກກັບການຄ້າຂາຍເຄື່ອງອອນລາຍຕອນຂາຍໃໝ່ກະບໍ່ໄດ້ຂາຍແຕ່ກໍ່ບໍ່ທໍ້ຖອຍແຖມຍັງມີຄວາມອົດທົນສູງໃນການຊອກຫາທຸກວິທີເພື່ອໃຫ້ຄອບຄົວຫຼຸດພົ້ນຈາກໜີ້ສິນ, ຊຶ່ງໃນ ປີ 2017 ໄດ້ສຶກສາຂໍ້ມູນເຮັດທຸລະ ິດເຄື່ອງສຳອາງ ແລະ ໃນປີ 2018 ໄດ້ຜະລິດ ແລະ ຈໍາໜ່າຍເຄື່ອງສຳອາງພາຍໃຕ້ຍີ່ຫໍ້ດີເວີ້, ຊຶ່ງສິນຄ້າດັ່ງກ່າວເລີ່ມໄດ້ຂາຍດີຂຶ້ນເລື່ອຍໆ ໂດຍປີ 2019 ສາມາດຊໍາລະໜີ້ສິນສໍາເລັດ ແລະນໍາພາຊີວິດຄອບຄົວດີຂຶ້ນຈົນມາຮອດທຸກວັນນີ້.

  ຍ້ອນເຫັນໄດ້ເຖິງຄວາມລຳບາກໂດຍສະເພາະໃນໄລຍະການແຜ່ລະບາດພະຍາດໂຄວິດ-19 ຊຶ່ງລັດຖະບານໄດ້ປະກາດໃຫ້ປະຊາຊົນທຸກຄົນກັກບໍລິເວນຕົນເອງຢູ່ເຮືອນ ຊຶ່ງບັນຫານີ້ໄດ້ສົ່ງຜົນກະທົບໂດຍກົງຕໍ່ປະຊາຊົນຜູ້ຫາເຊົ້າກິນຄໍ່າດັ່ງນັ້ນທ່ານ ນາງໄໝຄຳ ທັນບຸນເຮືອງ ຈຶ່ງໄດ້ນໍ້າເອົາເຄື່ອງບໍລິໂພກປະເພດເຂົ້າສານ ແລະໄຂ່ ແຈກຢາຍໃຫ້ປະຊາຊົນຜູ້ທຸກຢາກຂາດເຂີນ, ນັກສຶກສາທີ່ຢູ່ຫໍພັກ ແລະ ໜ່ວຍງານສະເພາະກິດ, ນອກຈາກນັ້ນຍັງຊ່ວຍລະດົມທຶນຈາກສັງຄົມ ແລະ ສົມທົບທຶນໂຕເອງສ້າງເຮືອນໃຫ້ຜູ້ທຸກຢາກນໍາອີກ.

แชร์