ເຊກອງ ຮັບເງິນ ແລະເຄື່ອງຊ່ວຍເຫຼືອຕ້ານໂຄວິດ-19

  ວັນທີ 2 ມິຖຸນາ 2021 ທີ່ຫ້ອງວ່າການແຂວງເຊກອງ ບໍລິສັດ ເອັນທີເອັບອາກຣີພັດທະນາ ຈໍາກັດ ໄດ້ນໍາເອົາເງິນຈໍານວນ 20 ລ້ານກີບມອບໃຫ້ອົງການປົກຄອງ ແຂວງເຊກອງ ເພື່ອນໍາໃຊ້ເຂົ້າໃນວຽກງານປ້ອງກັນ, ຄວບຄຸມ ແລະແກ້ໄຂການແຜ່ລະບາດຂອງພະຍາດໂຄວິດ-19 ຊຶ່ງຕາງໜ້າບໍລິສັດກ່າວມອບແມ່ນ ທ່ານ ບຸນສະ ດາ ໄຊບານນາ ຜູ້ຈັດການກະສິກໍາ ແລະເປັນກຽດກ່າວຮັບແມ່ນທ່ານ ເຫຼັກໄຫຼ ສີວິໄລ ເຈົ້າແຂວງໆເຊກອງ ໂດຍມີຄະນະສະເພາະກິດຂັ້ນແຂວງ ແລະຂະແໜງການກ່ຽວຂ້ອງເຂົ້າຮ່ວມ.

  ໃນໂອກາດນີ້ ທ່ານ ເຫຼັກໄຫຼ ສີວິໄລ ໄດ້ກ່າວສະແດງຄວາມຂອບໃຈມາຍັງບໍລິສັດທີ່ປະກອບສ່ວນມອບການຊ່ວຍເຫຼືອເຂົ້າໃນວຽກງານປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ຊຶ່ງການປະກອບສ່ວນດັ່ງກ່າວແມ່ນສອດຄ່ອງກັບຄວາມຮຽກຮ້ອງຕ້ອງການຕົວຈິງ ແລະທ່ານເຈົ້າແຂວງຍັງໄດ້ແນະນໍາໃຫ້ບໍລິສັດສືບຕໍ່ປະຕິບັດໜ້າທີ່ວຽກງານຂອງຕົນໃຫ້ບັນລຸຕາມຈຸດປະສົງ, ເປົ້າໝາຍ ແລະແຜນການທີ່ວາງໄວ້; ຊຶ່ງເຊື່ອໝັ້ນວ່າຫາກໂຄງການນີ້ເກີດແມ່ນຈະປະກອບສ່ວນສໍາຄັນເຂົ້າໃນການພັດທະນາເສດຖະກິດ-ສັງຄົມຂອງແຂວງໂດຍສະເພາະແມ່ນຈະເຮັດໃຫ້ປະຊາຊົນມີວຽກເຮັດງານທໍາ ແລະມີລາຍໄດ້ທີ່ໝັ້ນຄົງ.

  ໃນວັນດຽວກັນນີ້ ທ່ານ ເພັດສະຫງ່າ ສຸດທິຈັກ ຫົວໜ້າບໍລິສັດລາວໂທລະຄົມມະຫາຊົນສາຂາແຂວງເຊກອງພ້ອມຄະນະກໍ່ໄດ້ນໍາເອົາໂທລະສັບວິນໂຟນ 12 ໜ່ວຍ ພ້ອມມູນຄ່າໂທຟຣີ 3 ເດືອນ ລວມມູນຄ່າທັງໝົດ 7 ລ້ານກວ່າກີບ ມອບໃຫ້ຄະນະສະເພາະກິດຂັ້ນແຂວງນໍາໃຊ້ເຂົ້າໃນວຽກງານປ້ອງກັນພະຍາດໂຄວິດ-19 ໂດຍແມ່ນທ່ານ ຄໍາໄຫຼ ສັນຕິພູມ ຫົວໜ້າພະແນກສາທາລະນະສຸກແຂວງ, ຮອງຫົວໜ້າຄະນະສະເພາະກິດປ້ອງກັນພະຍາດໂຄວິດ-19 ຂັ້ນແຂວງເປັນຜູ້ກ່າວຮັບ.

ຂ່າວ: ແກ້ວໄຊຍະວົງ 

แชร์