ສຳເລັດ 85% ໂຄງການປ້ອງກັນຕາຝັ່ງເຈື່ອນບ້ານນາວາງໃຫຍ່

 ວັນທີ 1 ມິຖຸນາ 2021 ທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄຳມ່ວນພ້ອມດ້ວຍການນຳຈາກພະແນກການທີ່ກ່ຽວຂ້ອງຂອງແຂວງໄດ້ລົງຊຸກຍູ້, ຕິດຕາມໂຄງການກໍ່ສ້າງປ້ອງກັນຕາຝັ່ງເຈື່ອນຕິດພັນກັບສະຖານທີ່ທ່ອງທ່ຽວພຣະທາດຕູມພະວັງ ບ້ານນາວາງໃຫຍ່ ເມືອງໜອງບົກ ໂດຍໄດ້ຮັບການຕ້ອນຮັບຈາກການນຳຂອງເມືອງພ້ອມດ້ວຍອຳນາດການປົກຄອງ ແລະພໍ່ແມ່ປະຊາຊົນບ້ານນາວາງໃຫຍ່.

  ໂອກາດນີ້ຕາງໜ້າບໍລິສັດຜູ້ຮັບເໝົາກໍ່ສ້າງກໍ່ໄດ້ລາຍງານກ່ຽວກັບການຈັດຕັ້ງປະຕິບັດການກໍ່ສ້າງປ້ອງກັນຕາຝັ່ງເຈື່ອນວັດພຣະທາດຕູມພະວັງຊຶ່ງໄດ້ເລີ່ມລົງມືການກໍ່ ສ້າງໃນຕົ້ນເດືອນເມສາ ມາຮອດປະຈຸບັນການກໍ່ສ້າງແມ່ນປະຕິບັດໄດ້ແລ້ວ 85% ແລະຄາດວ່າຈະໃຫ້ສຳເລັດ 100% ໃນທ້າຍເດືອນມິຖຸນາ 2021 ນີ້ຊຶ່ງມີຄວາມຍາວທັງໝົດປະມານ 300 ແມັດ. 

   ພ້ອມດຽວກັນນີ້ຜູ້ຕາງໜ້າການນຳຂອງເມືອງກໍ່ຍັງໄດ້ລາຍງານກ່ຽວກັບແຜນການຊຸກຍູ້ການທ່ອງທ່ຽວດ້ານວັດທະນະທຳຕິດພັນກັບພຣະທາດຕູມພະວັງໂດຍການ ຊຸກຍູ້ໃຫ້ມີຂະບວນການກີລາ, ການສະແດງສີລະປະວັນນະຄະດີ ແລະການສົ່ງເສີມການຂາຍຜະລິດຕະພັນທາງດ້ານກະສິກຳ-ຫັດຖະກຳ ຂອງທ້ອງຖິ່ນຕິດພັນກັບການ ຈັດງານບຸນເພື່ອດຶງດູດນັກທ່ອງທ່ຽວໃຫ້ເຂົ້າມາທ່ອງທ່ຽວຫຼາຍຂຶ້ນພາຍຫຼັງທີ່ມີການຜ່ອນຄາຍຂອງພະຍາດໂຄວິດ-19.

   ໃນໂອກາດດຽວກັນທ່ານຮອງເຈົ້າແຂວງຄຳມ່ວນກໍ່ໄດ້ມີຄຳເຫັນໃຫ້ອໍານາດການປົກຄອງບ້ານ ແລະ ພໍ່ແມ່ປະຊາຊົນໃຫ້ເອົາໃຈໃສ່ ແລະ ເປັນເຈົ້າການຕໍ່ກັບວຽກງານ ການຄວບຄຸມ, ປ້ອງກັນ ແລະສະກັດກັ້ນການແຜ່ລະບາດຂອງພະຍາດໂຄວິດ-19 ທີ່ເປັນໄພອັນຕະລາຍທີ່ຮ້າຍແຮງຢູ່ໃນປະຈຸບັນ, ເອົາໃຈໃສ່ຕໍ່ວຽກງານປ້ອງກັນຄວາມ ສະຫງົບ ແລະປະກົດການຫຍໍ້ທໍ້ຕ່າງໆໃນສັງຄົມ, ສືບຕໍ່ປະສານສົມທົບກັບພາກສ່ວນກ່ຽວຂ້ອງຂັ້ນເມືອງ, ຂັ້ນແຂວງເພື່ອວາງແຜນພັດທະນາ, ຄຸ້ມຄອງ ແລະປະຕິສັງ ຂອນພຣະທາດກໍ່ຄືການສ້າງຄຸນຄ່າໃຫ້ແກ່ມໍລະດົກອັນລໍ້າຄ່າທີ່ຕິດພັນກັບແຫຼ່ງທ່ອງທ່ຽວແຫ່ງນີ້ພ້ອມນັ້ນກໍ່ຕ້ອງໃຫ້ການຮ່ວມມື ແລະ ອຳນວຍຄວາມສະດວກແກ່ບໍລິ ສັດທີ່ມາຮັບເໝົາກໍ່ສ້າງປ້ອງກັນຕາຝັ່ງເຈື່ອນເພື່ອຄວາມສະດວກໃນການຈັດຕັ້ງປະຕິບັດ ແລະສຳເລັດຕາມໄລຍະເວລາທີ່ກຳນົດໄວ້.

  ໃນໂອກາດດຽວກັນນີ້ຄະນະການນຳຂອງແຂວງ, ເມືອງ, ອຳນາດການປົກຄອງບ້ານ ແລະຄະນະອົງການພຸດທະສາສະໜາຍັງໄດ້ຮ່ວມປຶກສາຫາລືເພື່ອວາງແຜນການພັດທະນາເດີ່ນວັດພຣະທາດຕູມພະວັງ ເພື່ອສ້າງເງື່ອນໄຂດຶງດູດນັກທ່ອງທ່ຽວໃຫ້ເຂົ້າມາທ່ຽວຫຼາຍຂຶ້ນໃນອະນາຄົດ.

ຂ່າວ: ແຂວງຄຳມ່ວນ

แชร์