ການນຳສາລະວັນ ຮ່ວມປູກຕົ້ນໄມ້ຢູ່ອຸທິຍານພູຜາສຸກ

  ວັນທີ 1 ມິຖຸນາ 2021, ການນຳຂອງແຂວງສາລະວັນ ໄດ້ຮ່ວມກິດຈະກຳປູກຕົ້ນໄມ້ຢູ່ແຫຼ່ງທ່ອງທ່ຽວອຸທິຍານພູຜາສຸກແຂວງສາລະວັນ, ນຳພາໂດຍທ່ານ ໂພໄຊ ໄຊຍະສອນ ເຈົ້າແຂວງໆສາລະວັນພ້ອມດ້ວຍຄະນະ, ບັນດາທ່ານການນຳ, ຫົວໜ້າພະແນກການ, ອົງການຕ່າງໆ ອ້ອມຂ້າງແຂວງເຂົ້າຮ່ວມ.

 ທ່ານ ສີວັນພະກອນ ວົງບຸນທັນ ຮອງຫົວໜ້າພະແນກກະສິກຳ ແລະປ່າໄມ້ແຂວງກ່າວວ່າ: ເບ້ຍໄມ້ທີ່ໄດ້ນຳມາປູກຢູ່ແຫຼ່ງທ່ອງທ່ຽວອຸທິຍານພູຜາສຸກໃນປີນີ້ແມ່ນຕົ້ນໄມ້ອຸດສາຫະກຳຈຳນວນທັງໝົດ 76 ຕົ້ນຄື: ໄມ້ຂະຍູງ 53 ຕົ້ນ, ໄມ້ດູ່ 13 ຕົ້ນ ແລະໄມ້ແຕ້ຂ່າ 10 ຕົ້ນ ຊຶ່ງໄດ້ປູກຕາມເສັ້ນທາງເຂົ້າແຫຼ່ງທ່ອງທ່ຽວດັ່ງກ່າວ, ທັງໄດ້ມອບຄວາມຮັບຜິດຊອບໃຫ້ກັບບັນດາພະແນກການ ແລະທຸກພາກສ່ວນມີສ່ວນຮ່ວມຮັບຜິດຊອບໃນການຕິດຕາມ, ບົວລະບັດຮັກສາເພື່ອໃຫ້ຕົ້ນໄມ້ເຕີບໃຫຍ່ຂະຫຍາຍຕົວເຮັດໃຫ້ອັດຕາການລອດເຫຼືອສູງ, ທັງແນໃສ່ຟື້ນຟູປ່າໄມ້ໃຫ້ມີຄວາມອຸດົມສົມບູນ, ມີຄວາມຢືນຍົງ ແລະສວຍງາມບໍ່ວ່າໃນເຂດຕົວເມືອງ, ຊົນນະບົດ ແລະສະຖານທີ່ຕ່າງໆ. ຂະບວນການປູກຕົ້ນໄມ້ໃນປີນີ້ແມ່ນໄດ້ສືບຕໍ່ຈັດຕັ້ງປະຕິບັດເປັນປົກກະຕິ ແລະຕໍ່ເນື່ອງ, ແຕ່ຍ້ອນສະພາບການແຜ່ລະບາດພະຍາດໂຄວິດ-19 ຈຶ່ງບໍ່ໄດ້ສ້າງເປັນຂະບວນການໃຫຍ່, ທັງໄດ້ເອົາໃຈໃສ່ປະຕິບັດຕາມມາດຕະການປ້ອງກັນພະຍາດດັ່ງກ່າວຢ່າງເຂັ້ມງວດ.

  ໃນປີ 2021 ແຂວງສາລະວັນຄາດຄະເນແຜນສູ້ຊົນຈະປູກເບ້ຍໄມ້ໃຫ້ໄດ້ທັງໝົດ 1,5 ລ້ານກວ່າເບ້ຍຈະປູກໃນເນື້ອທີ່ 2 ພັນເຮັກຕາ. ໃນນັ້ນປູກໄມ້ໃຫ້ເປັນປ່າໃຫ້ບັນລຸໄດ້ 1 ພັນເຮັກຕາ, ປູກທົ່ວໄປໃຫ້ໄດ້ 1 ພັນເຮັກຕາ ແລະ ມີແຜນປູກກ່ອນ ວັນທີ 1 ມິຖຸນາ ຈຳນວນ 220 ເຮັກຕາ ແລະ ປູກໃນວັນທີ 1 ມິຖຸນາ 2021 ຈຳນວນ 25 ພັນເບ້ຍ ໃນເນື້ອນທີ 150 ເຮັກຕາ.

ຂ່າວ: ວິໄລວອນ ສິດທິໄຊ

แชร์