ສະຫວັນ ເປີດລະດູການປູກຕົ້ນໄມ້ ແລະປ່ອຍປາ

   ໃນວັນທີ 1 ມິຖຸນາ 2021 ທີ່ໜ້າຫ້ອງວ່າການປົກຄອງແຂວງສະຫວັນນະເຂດໄດ້ຈັດພິທີການເປີດລະດູການປູກຕົ້ນໄມ້ແຫ່ງຊາດ, ປ່ອຍປາ, ອະນຸລັກສັດນໍ້າສັດປ່າ ແລະສະເຫຼີມສະຫຼອງວັນເດັກນ້ອຍສາກົນປະຈຳປີ 2021 ໂດຍການປັນກຽດເຂົ້າຮ່ວມໃນພິທີຄັ້ງນີ້ມີ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ບັນດາທ່ານຄະນະການນຳຂັ້ນສູງຂອງແຂວງ, ເຈົ້ານະຄອນໄກສອນ ພົມວິຫານ, ພະແນກການກົມກອງອ້ອມຂ້າງແຂວງ, ນັກທຸລະກິດຫ້າງຮ້ານຕ່າງໆພ້ອມດ້ວຍນ້ອງນ້ອຍເຍົາວະຊົນ-ອະນຸຊົນເຂົ້າຮ່ວມຢ່າງເປັນຂະບວນການຟົດຟື້ນ.

  ໂອກາດນີ້, ທ່ານ ທອງໄສ ໄຊຍະວົງຄໍາດີ ຫົວໜ້າຫ້ອງວ່າການປົກຄອງແຂວງກໍ່ໄດ້ຂຶ້ນກ່າວເປີດພິທີຢ່າງເປັນທາງການຈາກນັ້ນ, ໃນພິທີກໍ່ໄດ້ມີການມອບ-ຮັບຕົ້ນຈຳ ປາຈຳນວນ 400 ຕົ້ນ ໃຫ້ທາງພະແນກກະສິກຳ-ປ່າໄມ້ແຂວງຊຶ່ງມອບໂດຍສະພາການຄ້າ ແລະອຸດສາຫະກຳແຂວງເພື່ອນຳໄປປູກປະດັບຕາມສະຖານທີ່ຕ່າງໆພ້ອມ ນັ້ນ, ກໍ່ໄດ້ມີການມອບໃບຍ້ອງຍໍ ແລະໃບຊົມເຊີຍຂອງທ່ານເຈົ້າແຂວງສະຫວັນນະເຂດໃຫ້ຜູ້ທີ່ປະກອບສ່ວນວັດຖຸ, ອຸປະກອນຕ່າງໆ ເຂົ້າໃນການປັບປຸງສວນຫຍ້າ, ປູກ ຕົ້ນໄມ້, ສວນນໍ້າຕົກ ແລະນໍ້າພຸຂອງຫ້ອງວ່າການປົກຄອງແຂວງ.

 ໃນພິທີ, ຜູ້ເຂົ້າຮ່ວມຍັງໄດ້ຮັບຟັງເຖິງຄວາມໝາຍຄວາມສໍາຄັນຂອງວັນສິ່ງແວດລ້ອມແຫ່ງຊາດ ແລະວັນສິ່ງແວດລ້ອມໂລກຈາກທ່ານຫົວໜ້າພະແນກຊັບພະຍາກອນທຳມະຊາດ ແລະສິ່ງແວດລ້ອມແຂວງ. ຈາກນັ້ນ, ທ່ານ ສັນຕິພາບ ພົມວິຫານ ພ້ອມດ້ວຍບັນດາທ່ານການນຳຂອງແຂວງ, ນະຄອນພ້ອມດ້ວຍບັນດາແຂກທີ່ເຂົ້າຮ່ວມໃນພິທີຄັ້ງນີ້ກໍ່ໄດ້ຮ່ວມກັນປູກຕົ້ນໄມ້ໃຫຍ່ທີ່ສວນຫຍ້າຫ້ອງວ່າການປົກຄອງແຂວງ ແລະ ສວນສາທາລະນະໄກສອນ ພົມວິຫານ ແລະກໍ່ໄດ້ຮ່ວມກັນປ່ອຍປາຢູ່ທີ່ໜອງສະຂອງຫ້ອງວ່າການປົກຄອງແຂວງຈາກນັ້ນ, ກໍ່ໄດ້ສືບຕໍ່ໄປປ່ອຍປາຢູ່ໜອງບົວເງິນ-ບົວທອງ ທີ່ອະນຸສອນສະຖານ ປະທານໄກສອນ ພົມວິຫານ ພ້ອມທັງໄດ້ມີການປູກຕົ້ນໄມ້ຕາມສະຖານທີ່ຕ່າງໆພາຍໃນນະຄອນໄກສອນ ພົມວິຫານ, ປູກຕົ້ນໄມ້ຢູ່ບໍລິເວນສາມລ່ຽມເຊໂນ ເມືອງອຸທຸມພອນ ແລະທີ່ບໍລິເວນທ່າດ່ານປາກເຊບັ້ງໄຟ ເມືອງໄຊບູລີ ຕາມທີ່ໄດ້ກຳນົດໄວ້ນຳອີກ.

ຂ່າວ: ມະໄລວັນ 

แชร์