ໄຊຍະຈະປູກໄມ້ໃຫ້ໄດ້ 2 ພັນກວ່າເຮັກຕາ

ການປູກໄມ້ໃນປີນີ້ແຂວງໄຊຍະບູລີໄດ້ວາງຄາດໝາຍໃຫ້ໄດ້ 2 ພັນກວ່າເຮັກຕາ ໃນປີນີ້ຈະປູກໃນວັນທີ 1 ມິຖຸນາ ເປັນທາງການໃນເນື້ອທີ່ 50 ເຮັກຕາ ທົ່ວແຂວງ ແລະຈຸດເມືອງໄຊຍະບູລີຈະປູກຢູ່ 2 ຈຸດຄື: ຈຸດອ່າງນໍ້າຕຽນ ແລະຈຸດຊົມວິວຜ້າຂີ້ໝິ້ນໂດຍຈັດແບບກະທັດຮັດເພື່ອປ້ອງກັນການແຜ່ລະບາດຂອງພະຍາດໂຄວິດ -19.

  ທ່ານ ບຸດສະກອນ ອິນທະລັງສີ ຫົວໜ້າພະແນກກະສິກໍາ ແລະປ່າໄມ້ແຂວງໄຊຍະບູລີ ໄດ້ກ່າວຕໍ່ສື່ມວນຊົນແຂວງໄຊຍະບູລີ ໃນວັນ ທີ 26 ພຶດສະພານີ້ວ່າ: ປ່າໄມ້ແມ່ນ ຊັບພະຍາກອນລໍ້າຄ່າຂອງຊາດທີ່ ມີລະບົບນິເວດສະເພາະ ຊຶ່ງປະ ກອບດ້ວຍຊີວະນາໆພັນ, ແຫຼ່ງນໍ້າ, ທີ່ດິນ, ປ່າໄມ້ໂດຍມີຕົ້ນໄມ້ຊະນິດເກີດຂຶ້ນຕາມທໍາມະຊາດ ຫຼືປູກຂຶ້ນ. ປ່າໄມ້ມີຄວາມສໍາຄັນຫຼາຍຕໍ່ມວນມະນຸດເພາະປ່າໄມ້ເປັນບ່ອນສະໜອງປັດໃຈ 4 ຢ່າງໃຫ້ແກ່ຄົນເຮົາເຊັ່ນ: ອາຫານ, ຢາປົວພະຍາດ, ທີ່ຢູ່ອາໄສຂອງຄົນ ແລະເຄື່ອງນຸ່ງຫົ່ມ; ອີກດ້ານໜຶ່ງຄວາມສໍາຄັນຂອງວັນປູກຕົ້ນໄມ້ກໍ່ເພື່ອເປັນການໂຄສະນາຊວນເຊື່ອ, ປູກຈິດສໍານຶກໃນການປຸກລະດົມທົ່ວປວງຊົນໃຫ້ຮັບຮູ້ ແລະຊ່ວຍກັນປູກໄມ້ປົກປັກຮັກສາປ່າໄມ້ເພື່ອອານາຄົດລູກຫຼານປູກໄມ້ໃນວັນນີ້ເພື່ອຊີວິດທີ່ດີໃນວັນໜ້າປູກໄມ້ໃຫ້ເປັນປ່າເພື່ອປະເທດຊາດ.

  ໃນຊຸມປີຜ່ານມາແຂວງໄຊຍະບູລີໄດ້ກໍານົດປູກໄມ້ໃນວັນທີ 1 ມິຖຸນາ ໃນ 11 ເມືອງມີເນື້ອທີ່ 100,13 ເຮັກຕາ, ມີເບ້ຍໄມ້ທັງໝົດ 73.733 ເບ້ຍ; ໃນນີ້ມີໄມ້ດູ່, ໄມ້ ຄ່າ, ໄມ້ຂົມຝາດ, ໄມ້ແຄນ, ໄມ້ຈໍາ ປາ, ສາມສາ, ໄມ້ສັກ, ໄມ້ໃຫ້ໝາກ, ໄມ້ຊໍ້, ໄມ້ປະດັບ ແລະໃນທົ່ວແຂວງ ແມ່ນປູກໄມ້ໄດ້ທັງໝົດ 383,75 ເຮັກຕາ, ມີເບ້ຍໄມ້ທັງໝົດ 532, 557 ເບ້ຍ, ເມື່ອທຽບໃສ່ແຜນການປະຕິບັດໄດ້ 107,00%. ສະເພາະປີ 2021 ແຂວງໄຊຍະບູລີແມ່ນມີແຜນປູກໄມ້ໃຫ້ 2.000 ກວ່າ ເຮັກຕາ, ມີໄມ້ດູ່, ໄມ້ຄ່າ, ຈໍາປາ, ສາມສາ, ໄມ້ສັກ, ຂົມຝາດ, ໄມ້ຊໍ້ ແລະໄມ້ປະດັບໂດຍຈະປູກຊະນິດໄມ້ໃສ່ຕາມເງື່ອນໄຂສະພາບແວດລ້ອມຂອງດິນ. ພ້ອມນີ້ການປູກ ໄມ້ໃນວັນທີ 1 ມິຖຸນານີ້ທົ່ວແຂວງ 11 ເມືອງ ຈະມີເກືອບ 50 ເຮັກຕາ, ມີເບ້ຍໄມ້ທັງໝົດ 28.710 ເບ້ຍ, ມີໄມ້ດູ່, ຂົມຝາດ, ແຊ, ໝ້ຽງ ແລະໄມ້ປະດັບ.

  ໃນນີ້ເມືອງໄຊຍະບູລີມີ 2 ຈຸດ ເນື້ອທີ່ເກືອບ 5 ເຮັກຕາ, ມີເບ້ຍໄມ້ 1.968 ເບ້ຍ, ເມືອງຄອບມີ 2 ຈຸດ, ມີເນື້ອທີ່ 5 ເຮັກຕາ, ມີເບ້ຍໄມ້ 2.120ເບ້ຍ, ເມືອງຊຽງຮ່ອນມີ 1 ຈຸດ, ເນື້ອທີ່ 11,17 ເຮັກຕາ, ມີເບ້ຍໄມ້ 7.962 ເບ້ຍ, ເມືອງເງິນມີ 2 ຈຸດ, ເນື້ອທີ່ 2 ເຮັກຕາ, ມີເບ້ຍໄມ້ 2.150 ເບ້ຍ, ເມືອງຫົງສາ ມີ 1 ຈຸດ, ເນື້ອທີ່ 11,40 ເຮັກຕາ, ມີເບ້ຍໄມ້ 10.000 ເບ້ຍ, ເມືອງໄຊສະຖານມີ 2 ຈຸດ, ເນື້ອທີ່ 1,50 ເຮັກຕາ, ມີເບ້ຍໄມ້ 650 ເບ້ຍ, ເມືອງພຽງ ມີ 1 ຈຸດ, ເນື້ອທີ່ 1 ເຮັກຕາ, ມີເບ້ຍໄມ້ 1000 ເບ້ຍ, ເມືອງປາກລາຍມີເນື້ອທີ່ 0,35 ເຮັກຕາ, ມີເບ້ຍໄມ້ 350 ເບ້ຍ, ເມືອງທົ່ງມີໄຊມີ 2 ຈຸດ, ເນື້ອທີ່ 2,40 ເຮັກຕາ, ມີເບ້ຍໄມ້ 2.000 ເບ້ຍ, ເມືອງແກ່ນທ້າວ ມີ 1 ຈຸດ, ເນື້ອທີ່ 3 ເຮັກຕາ, ເບ້ຍໄມ້ 3000 ເບ້ຍ, ເມືອງບໍ່ແຕນ ມີ 1 ຈຸດ, ເນື້ອທີ່ 2,13 ເຮັກຕາ, ມີເບ້ຍໄມ້ 2.087 ເບ້ຍ.

ຂ່າວ: ບຸນທີ

แชร์