ສະຫວັນຜະລິດເຂົ້ານາແຊງໄດ້ 1,47 ແສນໂຕນ

  ທ່ານ ລັດຕະນະ ໄຊສົມບັດ ຫົວໜ້າຂະແໜງປູກຝັງພະແນກກະສິກຳ ແລະປ່າໄມ້ແຂວງສະຫວັນນະເຂດຕໍ່ກັບຜູ້ສື່ຂ່າວວິທະຍຸກະຈາຍສຽງແຂວງຂອງພວກເຮົາໃນຄັ້ງວັນທີ 31 ພຶດສະພາ 2021 ນີ້ກ່ຽວກັບການຜະລິດລະດູແລ້ງໃນປີນີ້ໃຫ້ຮູ້ວ່າ: ເພື່ອສູ້ຊົນຈັດຕັ້ງປະຕິບັດການຜະລິດລະດູແລ້ງປີ 2021 ຂອງແຂວງສະຫວັນນະເຂດໃຫ້ບັນລຸຕາມຕົວເລກຄາດໝາຍທີ່ວາງໄວ້, ທັງເປັນການສຸມໃສ່ການຜະລິດກະສິກຳເພື່ອທົດແທນຜົນເສຍຫາຍຈາກໄພນໍ້າຖ້ວມໃນລະດູຜົນປີ 2020 ທີ່ຜ່ານມາທາງພະແນກກະສິກໍາ ແລະ ປ່າໄມ້ແຂວງສະຫວັນນະເຂດກໍ່ຄືຂະແໜງປູກຝັງໄດ້ເອົາໃຈໃສ່ເປັນຢ່າງສູງ ແລະ ຖືເປັນຄວາມສຳຄັນໂດຍການສຸມໃສ່ຫັນເອົາພະນັກງານວິຊາການລົງນຳພາປະຊາຊົນຈັດຕັ້ງປະຕິບັດການຜະລິດລະດູແລ້ງໃຫ້ປະກົດຜົນເປັນຈິງທົ່ວວແຂວງໄດ້ມີແຜນຜະລິດເຂົ້ານາແຊງໃນເນື້ອທີ່ທັງໝົດ 30,04 ພັນ ເຮັກຕາ, ນຳໃຊ້ແນວພັນ 1,80 ພັນໂຕນ ເປັນແນວພັນເຂົ້າປັບປຸງທັງໝົດ.

  ຜ່ານການຈັດຕັ້ງປະຕິບັດຕົວຈິງແມ່ນສາມາດຜະລິດໄດ້ 30,4 ພັນເຮັກຕາ ເທົ່າກັບ 101,4% ຂອງເນື້ອທີ່ແຜນການໃນນີ້ນາດຳກວມເອົາ 17,81 ພັນເຮັກຕາ, ນາຫວ່ານ 12,12 ພັນເຮັກຕາ, ນາຢອດ 493 ກວ່າເຮັກຕາ. ມາຮອດປະຈຸບັນນີ້ຊາວນາຊາວກະສິກອນໃນທົ່ວແຂວງສະຫວັນນະເຂດແມ່ນສາມາດເກັບກ່ຽວມ້ຽນມັດເຂົ້ານາແຊງຂອງຕົນສຳເລັດແລ້ວ 100% ລາຍຮັບດ້ານສະມັດຕະພາບສະເລ່ຍ 4,85 ໂຕນຕໍ່ເຮັກຕາ, ຜົນຜະລິດ 1,47 ໂຕນ ຖ້າທຽບໃສ່ກັບການຜະລິດເຂົ້ານາແຊງໃນປີຜ່ານມາແມ່ນຫຼຸດລົງປະມານ 128,5 ເຮັກຕາ ເທົ່າກັບ 99,5%.

  ນອກຈາກຈະສົ່ງເສີມປະຊາຊົນປູກເຂົ້ານາແຊງໃນເຂດທີ່ມີເງື່ອນໄຂແລ້ວ ທ່ານ ລັດຕະນະ ໄຊສົມບັດ ຍັງກ່າວຕື່ມອີກວ່າ: ທາງພະແນກກະສິກຳ ແລະປ່າໄມ້ແຂວ ກໍ່ຄືຂະແໜງການທີ່ກ່ຽວຂ້ອງຍັງໄດ້ຊຸກຍູ້ປະຊາຊົນທີ່ຢູ່ເຂດພູດອຍ ຫຼືເຂດຫ່າງໄກຈາກຊົນລະປະທານໃຫ້ຫັນມາປູກພືດລະດູແລ້ງທົດແທນເປັນຕົ້ນແມ່ນ: ສາລີຫວານ,ຖົ່ວດິນ,ອ້ອຍ,ຢາສູບ, ກ້ວຍ,ມັນຕົ້ນ ແລະພືດຜັກຊະນິດຕ່າງໆນຳອີກທັງນີ້ກໍ່ເພື່ອເຮັດໃຫ້ປະຊາຊົນມີຢູ່, ມີກິນເຮັດໃຫ້ຊີວິດການເປັນຢູ່ຂອງເຂົາເຈົ້ານັບມື້ດີຂຶ້ນເປັນກ້າວໆ.

ຂ່າວ: ອັກສອນສິນ ພົມມະຈັນ

แชร์