ລາວ ຊີມໄບໂອຊີສ ຈັບມືກຸ່ມບໍລິສັດ ຢົງເຟີງ ກຽມລົງທຶນຫຼາຍໂຄງການໃນລາວ

 ບໍລິສັດ ລາວ ຊີມໄບໂອຊີສ ເຫຼັກກ້າ ແລະເຫຼັກພັດທະນາ ຈໍາກັດຜູ້ດຽວຮ່ວມກັບ ກຸ່ມບໍລິສັດ ຢົງເຟີງ ຈໍາກັດ ຈາກ ສປ ຈີນ ກຽມລົງທຶນຫຼາຍໂຄງການໃນ ສປປ ລາວ.

   ອີງຕາມຂໍ້ມູນຈາກ ບໍລິສັດ ລາວຊີມໄບໂອຊີສ ໃຫ້ຮູ້ວ່າ: ບໍລິສັດ ລາວ ຊີມໄບໂອຊີສ ເຫຼັກກ້າ ແລະເຫຼັກພັດທະນາ ຈໍາກັດຜູ້ດຽວ ໄດ້ຮ່ວມມືກັບ ກຸ່ມບໍລິສັດ ຢົງເຟີງ ຈໍາກັດ ຈາກ ສປ ຈີນ ຈະສ້າງຕັ້ງໂຮງງານຫຼອມເຫຼັກກ້າ, ໂຮງງານຜະລິດຝຸ່ນຖ່ານຫີນທີ່ເປັນເຊື້ອເພີງປ້ອນເຂົ້າໂຮງງານຫຼອມເຫຼັກກ້າ ແລະເຊື້ອເພີງໃຫ້ກັບອຸດສາ ຫະກໍາອື່ນ, ໂຮງງານຜະລິດວັດສະດຸທີ່ຮັບໃຊ້ໃຫ້ກັບການກໍ່ສ້າງທີ່ແຂວງຫົວພັນ, ນອກຈາກນີ້ຍັງມີແຜນສ້າງຕັ້ງວິສາຫະກິດຂົນສົ່ງສາກົນ ແລະ ນິຄົມອຸດສາຫະກໍາ ລາວ-ຈີນ ຊີມໄບໂອຊີສ ຊຶ່ງແຜນດັ່ງກ່າວນີ້ຍັງລໍຖ້າການອະນຸມັດຈາກລັດຖະບານລາວ.

 ພິທີເຊັນສັນຍາຮ່ວມມືດັ່ງກ່າວມີຂຶ້ນໃນວັນທີ 28 ພຶດສະພາ ຜ່ານມາທີ່ແຂວງຊັນຕົງ ສປ ຈີນ, ຫຼັງຈາກທີ່ທັງສອງຝ່າຍເຂົ້າຮ່ວມກອງປະຊຸມຮ່ວມມືພັດທະນາວິສາຫະ ກິດຂະໜາດນ້ອຍ-ກາງລະຫ່ວາງ (ແຂວງຊັນຕົງ) ຈີນ-ອາຊຽນ ຊຶ່ງຮ່ວມກັນຈັດຂຶ້ນໂດຍອໍານາດການປົກຄອງປະຊາຊົນ ແຂວງຊັນຕົງ ແລະສູນຈີນ-ອາຊຽນ ໂດຍມີພະແນກການຕ່າງປະເທດແຂວງຊັນຕົງ, ພະແນກການຄ້າແຂວງ, ສະຫະພັນຄົນຈີນຢູ່ຕ່າງປະເທດ, ແນ່ໃສ່ເຊື່ອມໂຍງລົງເລິກຕາມນະໂຍບາຍ “ໜຶ່ງແລວໜຶ່ງທາງ”, ເພື່ອຍາດເອົາໂອກາດນໍາມາຈາກການເຊັນສັນຍາຄູ່ຄ້າເສດຖະກິດຮອບດ້ານພາກພື້ນ (RCEP), ລົງເລິກການຕິດຕໍ່ພົວພັນດ້ານເສດຖະກິດການຄ້າ ແລະວັດທະນະທໍາ ລະຫວ່າງ ແຂວງຊັນຕົງ ແລະກຸ່ມປະເທດອາຊຽນ, ສ້າງເວທີລະດັບສູງໃນການເຊື່ອມໂຍງກັບກຸ່ມປະເທດອາຊຽນ.

  ການເຊັນສັນຍາຮ່ວມທຸລະກິດຄັ້ງນີ້ແນໃສ່ພັດທະນາອຸດສາຫະກໍາລາວໃຫ້ເຊື່ອມໂຍງກັບຕະຫຼາດອາຊຽນ ແລະຕະຫຼາດຈີນທີ່ຂະຫຍາຍຕົວຢ່າງໄວວາ.

ຂ່າວ: ຊີມໄບໂອຊີສ 

• 01/06/2021