ລັດຜ່ອນຜັນ ແລະຍົກເວັ້ນບາງອາກອນ-ເລື່ອນຊໍາລະຄ່າທາງ

 ເພື່ອໃຫ້ບຸກຄົນ, ນິຕິບຸກຄົນ ແລະອົງການຈັດຕັ້ງພາຍໃນ ແລະຕ່າງປະເທດໃນຂອບເຂດທົ່ວປະເທດປະຕິບັດນະໂຍບານຜ່ອນຜັນໃນໄລຍະການແຜ່ລະບາດຂອງພະຍາດ COVI-19 ໄລຍະ 2 ຂອງປີ 2021 ໃຫ້ມີຄວາມເປັນເອກະພາບຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີສະບັບ ເລກທີ 532/ຫສນຍ, ລົງວັນທີ 20 ພຶດສະພາ 2021. ກະຊວງການເງິນອອກແນະນຳດັ່ງນີ້:

 ການປະຕິບັດນະໂຍບາຍຍົກເວັ້ນການເກັບອາກອນລາຍໄດ້ຈາກເງິນເດືອນຜູ້ອອກແຮງງານທັງໝົດທັງພາກລັດ ແລະເອກະຊົນທີ່ມີລາຍໄດ້ 5 ລ້ານກີບ ລົງມາໃນໄລຍະ 3 ເດືອນ (ເດືອນເມສາ, ພຶດສະພາ ແລະມິຖຸນາ). ແຕ່ສຳລັບຜູ້ມີລາຍໄດ້ເງິນເດືອນເກີນ 5 ລ້ານກີບ ຂື້ນໄປໃຫ້ຄິດໄລຫັກຍົກເວັນ 5 ລ້ານກີບກ່ອນ (ຊຶ່ງຈະກວມເອົາການຍົກເວັ້ນ ຕາມກົດໝາຍຄື: 1,3 ລ້ານກີບ ລົງມາແລະ 1,3 ລ້ານກີບ ຫາ 5 ລ້ານກີບ) ແລ້ວຈຶ່ງຄິດໄລຕາມຂັ້ນທະວີຄູນໂດຍເລີ່ມຈາກຫ້ອງອັດຕາ 10% ຂຶ້ນໄປ ຕາມຕາຕະລາງອາກອນລາຍໄດ້ຈາກເງິນເດືອນຕາມທີ່ໄດ້ກຳນົດໄວ້ໃນມາດຕາ 39 ຂອງກົດໝາຍວ່າດ້ວຍອາກອນລາຍໄດ້ສະບັບ ແລກທີ 67/ສພຊ, ລົງວັນທີ 18 ມິຖຸນາ 2019 .

ສຳລັບໄລຍະເວລາການແຈ້ງ ແລະຊຳລະອາກອນໃຫ້ປະຕິບັດດັ່ງນີ້:

  • - ອາກອນລາຍໄດ້ເງິນເດືອນຂອງ ເດືອນເມສາ 2021 ໃຫ້ແຈ້ງ ແລະຊຳລະອາກອນບໍ່ໃຫ້ກາຍວັນ ທີ 31 ພຶດສະພາ 2021:
  • - ອາກອນລາຍໄດ້ເງິນເດືອນຂອງ ເດືອນພຶດສາພາ 2021 ໃຫ້ແຈ້ງ ແລະຊຳລະອາກອນບໍ່ໃຫ້ກາຍວັນທີ 30 ມິຖຸນາ 2021;
  • - ອາກອນລາຍໄດ້ເງິນເດືອນຂອງ ເດືອນມິຖຸນາ 2021 ໃຫ້ແຈ້ງ ແລະຊຳລະອາກອນບໍ່ໃຫ້ກາຍວັນທີ 31 ກໍລະກົດ 2021.

  ໃນກໍລະນີທີ່ໄດ້ແຈ້ງອາກອນ ແລະຊະລະອາກອນປະຈຳເດືອນເມສາ 2021 ແລ້ວສາມາດເອົາຈຳນວນທີ່ໄດ້ມອບແລ້ວໃນສ່ວນທີ່ໄດ້ຮັບການຍົກເວັ້ນຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 532/ຫຍນ, ລົງວັນທີ 20 ພຶດສາພາ 2021 ໄປຍົກຫັກຕໍ່ໃນເດືອນພຶດສະພາ 2021 ແລະ ເດືອນຕໍ່ໆໄປຈົນກວ່າຈະໝົດ (ຕາຕະລາງສູດຄິດໄລສາມາດດາວໂຫຼດໃນເວັບໄຊ taxservice. mof.gov.la). ສ່ວນອາກອນປະຈຳເດືອນພຶດສະພາ ແລະ ມິຖຸນາ 2021 ລະບົດ TaxRIS ຈະຄິດໄລອັດຕະໂນມັດ.

  ການປະຕິບັດນະໂຍບາຍຍົກເວັ້ນການເກັບອາກອນລາຍໄດ້ຂອງຈຸນລະວິສາຫະກິດຕາມທີ່ໄດກຳນົດໄວ້ໃນມາດຕາ 29 ຂໍ້ທີ 2 ຂອງກົດໝາຍວ່າດ້ວຍອາກ່ອນລາຍໄດ້ ເລກທີ 67/ສພຊ, ລົງວັນທີ 18 ມິຖຸນາ 20219 ເປັນໄລຍະ 3 ເດືອນ (ເດືອນເມສາ, ພຶດສະພາ, ມິຖຸນາ) ຂອງປີ 2021.

  ໃນກໍລະນີວິສາຫະກິດໄດ້ມອບລ່ວງໜ້າໄປກ່ອນແລ້ວປະຈຳ ເດືອນເມສາ 2021 ຫຼື 6 ເດືອນ ລ່ວງໜ້າຂອງປີ 2021 ໃຫ້ປະສານກັບສ່ວຍອາກອນປະຈຳທ້ອງຖິ່ນບ່ອນ ທີ່ຂຶ້ນທະບຽນອາກ່ອນ, ເພື່ອດັດແກ້ອາກອນທີ່ໄດ້ຮັບນະໂຍບາຍຍົກເວັ້ນດັ່ງກ່າວໄປຫັກລົບກັບອາກອນທີ່ຈະມອບປະຈຳເດືອນກໍລະກົດ, ສິງ ແລະກັນຍາຕາມລຳລັບ,ກໍລະນີທຸລະກິດໄດ້ມອບອາກອນລາຍໄດ້ຈຸລະວິສາຫະກິດຂອງປີ 2021 ໝົດແລ້ວສາມາດຫັກລົບກັບຈຳນວນທີ່ຈະຕ້ອງມອບໃນປີ 2022 ຕາມຈຳນວນສະເລ່ຍເປັນເດືອນຂອງອາກອນດັ່ງກ່າວທີ່ມອບໃນປີ 2021.

ສຳລັບຜູ້ທີ່ປະຕິບັດການແຈ້ງເສຍອາກອນລາຍໄດ້ເງິນເດືອນແບບມອບເໝົາ ຫຼືປະຕິບັດຕາຄົງທີ່ຕາມສັນຍາສຳປະທານທີ່ລັດຖະບານໄດ້ລົງນາມນັ້ນຫຼືແຈ້ງການສະເພາະໃດໜຶ່ງໃຫ້ແຈ້ງມອບຕາມສັນຍາ ຫຼືແຈ້ງການທີ່ກຳນົດໄວ້ (ໝາຍວ່າບໍໄດ້ຮັບນະໂຍບາຍຍົກເວັ້ນຕາມຂໍ້ 1 ຂ້າງເທິງ);

   ສ່ວນການເລື່ອນເສຍຄ່າທຳນຽມທາງຈາກມື້ສຸດທ້າຍວັນທີ 31 ມີນາ 2021 ເປັນວັນທີ 30 ມິຖຸນາ 2021, ຖ້າກາຍກຳນົດເວລາດັ່ງກວ່ານີ້ (ນັບແຕ່ວັນທີ 1 ກໍລະກົດ ຮອດວັນທີ 31 ທັນວາ 2021) ຈະຖືກປັບໃໝ 0,1% ຕໍ່ມື້ຂອງມູນຄ່າທີ່ຕ້ອງເສຍຄ່າທຳນຽມທາງປະຈຳປີຕາມທີ່ໄດ້ກຳນົດໄວ້ໃນ IV ຂໍ້ 2.2 ຂອງຄຳເນາະນຳຈັດຕັ້ງປະຕິບັດລັດຖະບານຍັດວ່າດ້ວຍຄ່າທຳນຽມທາງ ສະບັບເລກທີ 3455 /ກງ, ລົງວັນທີ 10 ຕຸລາ 2017.

  ສຳລັບຜູ້ເສຍຄ່າທຳນຽມທີ່ໄດ້ເສຍຄ່າປັບໃໝກ່ອນໜ້າແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 532 /ຫສນຍ, ລົງວັນທີ 20 ພຶດສະ ພາ 2021 ໄປແລ້ວໃຫ້ປະສານກັບສ່ວຍອາກອນປະຈຳທ້ອງຖິ່ນບ່ອນທີ່ພາຫະນະໄດ້ຂຶ້ນທະບຽນຢູ່ ຫຼືບ່ອນໄດ້ເສຍຄ່າທຳນຽມທາງ (ເອົາໃບຮັບເງິນການເສຍຄ່າທຳ ນຽມທາງຢູ່ຈຸດນັ້ນມາພ້ອມ) ເພື່ອຂໍເງິນຄ່າປັບໃໝຈາກຄ່າທຳນຽມທາງຄືນສະເພາະຊ່ວງເດືອນເມສາ ຫາ ເດືອນມິຖຸນາ ປີ 2021 ເທົ່ານັ້ນ.

แชร์