ສຸດາເພັດ ຖືເອົາການປູກໝາກນາວເປັນສິນຄ້າສ້າງລາຍຮັບເພີ່ມ

   ດັ່ງທີ່ຮູ້ນຳກັນວ່າ, ປະເທດຂອງພວກເຮົາມີທ່າແຮງທາງດ້ານການປູກພືດກະສິກຳເປັນສິນຄ້າ, ແຕ່ກໍ່ມີບາງຊະນິດພືດ ຫຼືໝາກໄມ້ຈຳນວນໜຶ່ງຕ້ອງໄດ້ນຳເຂົ້າເພື່ອໃຫ້ພຽງກັບຄວາມຕ້ອງການບໍລິໂພກໃນແຕ່ລະວັນໂດຍສະເພາະແມ່ນໝາກນາວ, ສະນັ້ນ ເພື່ອເປັນການຫຼຸດຜ່ອນການນຳເຂົ້າສິນຄ້າປະເພດດັ່ງກ່າວ, ທ່ານນາງ ສຸດາເພັດ ວັນນະວົງ ເຈົ້າຂອງສວນໝາກນາວ ບ້ານວຽງຄຳ ເມືອງສີໂຄດຕະບອງ ຈຶ່ງໄດ້ນຳເຂົ້າໝາກນາວສາຍພັນແປ້ນພິຈິດເພື່ອສ້າງລາຍໄດ້ເພີ່ມ.

  ທ່ານນາງ ສຸດາເພັດ ວັນນະວົງ ເຈົ້າຂອງສວນໝາກນາວ ບ້ານວຽງຄຳ ເມືອງສີໂຄດຕະບອງ ນະຄອນຫຼວງວຽງຈັນ, ໃຫ້ສຳພາດກັບໜັງສືພິມເສດຖະກິດ-ສັງຄົມ ຮູ້ວ່າ: ຍ້ອນເຫັນຄວາມເປັນໄດ້ຂອງສັງຄົມບວກກັບຄວາມຕ້ອງການຂອງຕະຫຼາດໃນການບໍລິໂພກໝາກນາວທີ່ນັບມື້ເພີ່ມຂຶ້ນ, ດັ່ງນັ້ນເມື່ອຍ້ອນກັບໄປປະມານປີສອງປີກ່ອນໄດ້ໄປຮູ້ຈັກກັບວິຊາການດ້ານການກະເສດ ແລະໄດ້ປູກໝາກນາວ, ຊຶ່ງເປັນສາຍພັນແປ້ນພິຈິດ, ໃນເນື້ອທີ່ 4 ເຮັກຕາ, ລວມມີ 400 ກວ່າຕົ້ນ, ໂດຍສາຍພັນດັ່ງກ່າວແມ່ນສາມາດໃຫ້ຜົນຜະລິດສະເລ່ຍ 2-3 ຄັ້ງຕໍ່ປີ, ຈຳໜ່າຍໃນລາຄາ 10 ພັນກີບຕໍ່ກິໂລກຣາມ, ທັງນີ້ກໍ່ຂຶ້ນກັບລະດູການ.

  ໝາກກນາວຖືວ່າເປັນພືດເສດຖະກິດຢ່າງໜຶ່ງ, ທີ່ກຸ່ມຜູ້ບໍລິໂພກບໍ່ວ່າຍາມໃດກໍ່ນິຍົມ ແລະການທີ່ທ່ານນາງ ສຸດາເພັດ ວັນນະວົງ ສຸມໃສ່ປູກເພື່ອສະໜອງຕະຫຼາດໃຫ້ມີຄວາມພຽງພໍ. ກໍ່ສາມາດສ້າງລາຍຮັບໄດ້ເປັນຢ່າງດີ, ສ່ວນທ່ານໃດທີ່ສົນໃຈໝາກນາວສາຍພັນແປ້ນພິຈິດເພື່ອເອົາໄປຈຳໜ່າຍກໍ່ສາມາດເຂົ້າໄປຊື້ໄດ້ທີ່ສວນຕັ້ງຢູ່ບ້ານວຽງຄຳ ເມືອງສີໂຄດຕະບອງ ນະຄອນຫຼວງວຽງຈັນ.

แชร์