ລາວ ເຊັນສັນຍາສົ່ງສິນຄ້າ 9 ລາຍການ ມູນຄ່າ 14,1 ພັນຕື້ກີບໄປຈີນ

 ການລົງນາມຮ່ວມມືເພື່ອຈັດຊື້ສິນຄ້າກະສິກຳປຸງແຕ່ງ 9 ລາຍການ ໃຫຍ່ຈາກ ສປປ ລາວ ສົ່ງໄປ ສປ ຈີນ ລວມມູນຄ່າການສົ່ງອອກ 1,5 ຕື້ໂດລາ ຫຼືປະມານ 14,1 ພັນຕື້ກີບ ຫຼັງຈາກ 5 ປີຕໍ່ໜ້າແມ່ນຈະເລີ່ມສົ່ງອອກເປັນຕົ້ນໄປຊຶ່ງການຮ່ວມມືດັ່ງກ່າວຈະສ້າງອາຊີບ ແລະ ລາຍຮັບໃຫ້ແກ່ປະຊາຊົນລາວຫຼາຍແສນຄອບຄົວໄດ້ມີຊີວິດການເປັນຢູ່ທີ່ດີຂຶ້ນເທື່ອລະກ້າວ.

ໃນວັນທີ 28 ພຶດສະພາ ຜ່ານມາທີ່ກະຊວງອຸດສາຫະກຳ ແລະການຄ້າ (ກະຊວງ ອຄ); ບໍລິສັດ ເອໄອດີຊີ ການຄ້າ ຈຳກັດຜູ້ດຽວ (AIDC) ສປປ ລາວ ແລະບໍລິສັດລັດວິສາຫະກິດສະບຽງອາຫານ ຈີນ ສາຂາເມືອງເຈີງໂຈ ແຂວງເຫີໜານ ສປ ຈີນ ໄດ້ລົງນາມບົດບັນທຶກແບບທາງໄກເພື່ອຮ່ວມມືໃນການຈັດຊື້ສິນຄ້າກະສິກຳປຸງແຕ່ງ ຈາກ ສປປ ລາວ ສົ່ງໄປ ສປ ຈີນ ໂດຍມີທ່ານ ຄຳແພງ ໄຊສົມແພງ ລັດຖະມົນຕີກະຊວງ ອຄ ແລະທ່ານ ເພັດ ພົມພິພັກ ລັດຖະມົນຕີກະຊວງກະສິກຳ ແລະ ປ່າໄມ້ (ກະຊວງ ກປ) ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.

  ພິທີລົງນາມຄັ້ງນີ້, ມີຂຶ້ນລະຫວ່າງ ທ່ານ ພຶດສະພາ ພູມມະສັກ ປະທານບໍລະສັດ AIDC ແລະທ່ານ ຈ້າຍ ເຫວີຍ (Dai Wei) ປະທານກຳມະການບໍລິຫານລັດວິສາຫະກິດສະບຽງອາຫານ ສປ ຈີນ ສາຂາ ເມືອງເຈີງໂຈ ແຂວງເຫີໜານ ພ້ອມດ້ວຍມີຜູ້ຕາງໜ້າຂອງລັດຖະບານລາວຮ່ວມລົງນາມເພື່ອເປັນພະຍານຄືທ່ານ ໄຊສົມເພັດ ນໍລະສິງຫົວໜ້າກົມສົ່ງເສີມການຄ້າກະຊວງ ອຄ ແລະທ່ານ ສີປະໄພ ໄຊສົງຄາມ ຫົວໜ້າຫ້ອງການກະຊວງ ກປ.

 ການລົງນາມຮ່ວມມືດ້ານຍຸດທະສາດໃນການເອົາສິນຄ້າຈາກ ສປປ ລາວ ໄປຂາຍໃນ ສປ ຈີນ ຄັ້ງນີ້ແມ່ນກວມເອົາສິນຄ້າກະສິກຳປຸງແຕ່ງ 9 ລາຍການໃຫຍ່ຄື: ຖົ່ວດິນ 1 ແສນ ໂຕນ, ແປ້ງມັນຕົ້ນ 1 ແສນໂຕນ, ຊີ້ນ ງົວແຊ່ແຂງ 1 ແສນໂຕນ, ໝາກມ່ວງ ຫິມະພານ 2 ແສນໂຕນ, ໝາກມ່ວງ 1 ແສນໂຕນ, ຖຸລຽນ 5 ໝື່ນໂຕນ, ຖົ່ວເຫຼືອງ 2 ແສນໂຕນ, ກ້ວຍ 1 ແສນໂຕນ ແລະນໍ້າຕານ 5 ແສນໂຕນຊຶ່ງລວມມູນຄ່າການສົ່ງອອກ 1,5 ຕື້ໂດລາ ພາຍໃນປີທີ 5 ເປັນຕົ້ນໄປ.

  ການຮ່ວມມືດັ່ງກ່າວນີ້ຈະສ້າງອາຊີບໃຫ້ແກ່ປະຊາຊົນລາວຫຼາຍແສນຄອບຄົວເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນ ແລະ ຈະສ້າງລາຍຮັບໃຫ້ແກ່ລັດຖະບານ; ພ້ອມກັນນັ້ນ, ກໍ່ຍັງເປັນການປັບປຸງພື້ນຖານໂຄງລ່າງເປັນຕົ້ນແມ່ນທະໜົນຫົນທາງ, ໄຟຟ້າ, ນໍ້າປະປາ ແລະຊົນລະປະທານໄປພ້ອມໆກັນ.

  ໂອກາດດຽວກັນທ່ານ ພຶດສະພາ ພູມມະສັກ ປະທານບໍລະສັດ AIDC, ຍັງໄດ້ກ່າວຂອບໃຈລັດຖະບານລາວທີ່ໄດ້ເອົາໃຈໃສ່ຊຸກຍູ້ ແລະສະໜັບສະໜູນຊຶ່ງຜ່ານມາກໍໄດ້ພ້ອມກັນທົດລອງເຮັດກະສິກຳຢູ່ຫຼາຍຈຸດ ແລະໄດ້ກະກຽມພື້ນທີ່ປູກຝັງເຮັດການຜະລິດແຕ່ພາກກາງຫາພາກໃຕ້ ໂດຍປະຈຸບັນໄດ້ ເກືອບ 1 ແສນເຮັກຕາ.

  ພາຍຫຼັງການລົງນາມຄັ້ງນີ້, ບໍລິສັດ ແລະລັດວິສາຫະກິດສະບຽງອາຫານຈີນຈະປຶກສາຫາລືເຖິງລາຍລະອຽດດ້ານເຕັກນິກຂອງການປູກ-ການປຸງ ແຕ່ງ ແລະກ້າວສູ່ຂັ້ນຕອນການນຳສະເໜີໂຄງການໃຫ້ແກ່ລັດຖະບານໃນການຂໍໂກຕ້າ ແລະພະຍາຍາມໃຫ້ລາຄາສາມາດແຂ່ງຂັນໄດ້ທຽບກັບປະເທດອື່ນອ້ອມຂ້າງ.

  ທ່ານ ລັດຖະມົນຕີກະຊວງ ອຄ ໄດ້ກ່າວວ່າ: ພາຍຫຼັງທີ່ ລາວ-ຈີນ ໄດ້ສຳເລັດການເຊັນສັນຍາຊື້-ຂາຍເຂົ້າ 20 ພັນໂຕນ ແລະສືບຕໍ່ສົ່ງອອກເຂົ້າ 50 ພັນໂຕນ ໃນອະ ນາຄົດ; ການລົງນາມໃນຄັ້ງນີ້ກໍເປັນອີກສິ່ງໜຶ່ງທີ່ມີຄວາມໝາຍສຳຄັນຍິ່ງເປັນໂອກາດທີ່ເປີດຊ່ອງທາງໃຫ້ສາມາດສ້າງມູນຄ່າການຄ້າຂອງທັງສອງປະເທດເພີ່ມຂຶ້ນ ແລະປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ແລະ ທັງເປັນໂອກາດໃນການສົ່ງອອກສິນຄ້າກະສິກຳທີ່ເປັນສິນຄ້າທີ່ເປັນທ່າແຮງຂອງລາວ. 

  ນອກນີ້, ຍັງເປັນການສົ່ງເສີມການຜະລິດ, ດຶງດູດການລົງທຶນເພື່ອກ້າວຜ່ານອຸປະສັກທີ່ເກີດຈາກໂຄວິດ-19 ແລະຍັງເປັນການຮອງຮັບໃຫ້ແກ່ຜົນສຳເລັດຂອງການກໍ່ສ້າງທາງລົດໄຟລາວ-ຈີນ ໃນທ້າຍປີ 2021 ນີ້ກໍຄືຍຸດທະສາດໜຶ່ງເລວໜຶ່ງເສັ້ນທາງໃຫ້ປະກົດຜົນເປັນຈິງຊຶ່ງເຊື່ອໝັ້ນວ່າການສົ່ງອອກສິນຄ້າຜ່ານການຂົນສົ່ງຂອງທາງລົດໄຟນີ້ຈະຊ່ວຍໃຫ້ຫຼຸກຕົ້ນທຶນ ແລະສາມາດແຂ່ງຂັນກັບສິນຄ້າຂອງບັນດາປະເທດ ແລະຂອງສາກົນໄດ້.

  ປະຈຸບັນ, ລາວ-ຈີນ ໄດ້ສຳເລັດອະນຸສັນຍາສອງຝ່າຍຊຶ່ງສາມາດສົ່ງອອກພືດ ແລະຜະລິດຕະພັນພືດໄປ ສປ ຈີນ ມີ 7 ຊະນິດພືດຄື: ສາລີ,ມັນຕົ້ນ, ກ້ວຍ,ເຂົ້າສານ, ໝາກໂມ, ມັນດ້າງ, ພືດຕະກູນຖົ່ວ; ນອກນີ້, ມີງົວອີກ, ກະຊວງ ກປ, ຍັງສຳເລັດການຮ່າງອະນຸສັນຍາເພື່ອລໍຖ້າເຊັນລົງນາມໃນການສົ່ງໄປພືດ ແລະຜະລິດຕະພັນພືດ ສປ ຈີນ ອີກ 6 ຊະນິດພືດ ເຊັ່ນ: ໝາກຜຸ, ໝາກກ້ຽງ, ໝາກນາວ, ໝາກໜ໊ອດ, ພືດເປັນຢາ, ໃບໝາກຕູມແຫ້ງ ຊຶ່ງແຕ່ນີ້ຮອດປີ 2025 ແມ່ນຈະສືບຕໍ່ເຈລະຈາທາງດ້ານເຕັກນິກເປີດຕະຫຼາດກັບ ສປ ຈີນ ຫຼາຍກວ່າ 90 ລາຍການພືດ.

 ຫຼັງຈາກເຊັນສັນຍາໃນພິທີຄັ້ງນີ້, ກະຊວງ ກປ ຈະດຳເນີນການເຈລະຈາເພື່ອຂໍໂກຕ້າສົ່ງອອກໄປ ສປ ຈີນ 5 ລາຍການທີ່ນອນໃນອະນຸສັນຍາທີ່ລາວຈີນໄດ້ລົງນາມແລ້ວທີ່ມີໃນ 9 ລາຍ ການສິນຄ້າທີ່ໄດ້ລົງນາມໃນພິທີຄັ້ງນີ້.

  ພາຍຫຼັງພິທີລົງນາມດັ່ງກ່າວສຳເລັດ, ທ່ານລັດຖະມົນຕີທັງສອງກະຊວງພ້ອມດ້ວຍຄະນະກໍໄດ້ສືບຕໍ່ເຂົ້າຮ່ວມການປະຊຸມແບບທາງໄກລະຫວ່າງບໍລິສັດ AIDC ແລະບໍລິສັດ COFCO Sundry ປັກກິ່ງຊຶ່ງຝ່າຍບໍລິສັດຈາກ ສປ ຈີນ ມີທ່ານ ຫວັງເຜິງ ຫົວໜ້າຜູ້ຈັດການທົ່ວໄປພະແນກທຸລະກິດຂອງບໍລິສັດດັ່ງກ່າວເຂົ້າຮ່ວມ, ການເຂົ້າຮ່ວມກອງປະຊຸມຄັ້ງນີ້ຂອງທ່ານລັດຖະມົນຕີທັງສອງກະຊວງພ້ອມຄະນະຄັ້ງນີ້, ເພື່ອເປັນການຊຸກຍູ້ການຮ່ວມມືຂອງສອງບໍລິສັດ ລາວ-ຈີນ ຊຶ່ງນັບແຕ່ປີ 2019 ສອງບໍລິສັດໄດ້ຮ່ວມມືຝ່າຍລາວໄດ້ສົ່ງອອກສິນຄ້າຫຼາຍກວ່າ 11 ລາຍການ;ໃນນີ້,ສະເພາະໝາກມ່ວງຫິນມະພານມີມູນຄ່າສົ່ງອອກເຖິງ 15 ລ້ານໂດລາ ໃນປີ 2019 ແລະ ປະຈຸບັນໝາກເຜັດກຳລັງເປັນອີກ 1 ລາຍການ ສິນຄ້າທີ່ມີທ່າແຮງສົ່ງອອກໄປ ສປ ຈີນ. ບໍລິສັດ AIDC ມີມູນຄ່າການສົ່ງອອກໃນການຮ່ວມມືກັບບໍລິສັດ COFCO ນີ້ປະມານ 1 ຕື້ກວ່າໂດລາ.

  ໃນກອງປະຊຸມຄັ້ງນີ້, ບໍລິສັດ CO FCO ຈະໃຫ້ການຊ່ວຍເຫຼືອໃນການສະເໜີຂໍເພີ່ມໂກຕ້າໃນການສົ່ງອອກສິນຄ້າຈາກລາວ ໄປ ສປ ຈີນ, ຈະສະເໜີການຍົກເວັ້ນພາສີສິນຄ້າຂອງ 9 ລາຍການສິນຄ້າທີ່ບໍລິສັດ AIDC ລົງນາມຮ່ວມມືກັບລັດວິສາຫະກິດສະບຽງອາຫານຈີນ ແລະຈະໃຫ້ຄໍາແນະນຳທາງດ້ານເຕັກນິກວິຊາການໃນການປຸງແຕ່ງສິນຄ້າ ແລະ ອື່ນໆ ທີ່ຈຳເປັນເພື່ອໃຫ້ການຮ່ວມມືຂອງສອງບໍລິສັດສາມາດສ້າງຜົນປະໂຫຍດມາໃຫ້ສອງຝ່າຍກໍຄືຜົນປະໂຫຍດດ້ານການຄ້າມາສູ່ສອງປະເທດ ສປປ ລາວ ແລະ ສປ ຈີນ.

ຂ່າວ: ສຸກສະຫວັນ

แชร์