ເຊກອງ ມີ 165 ໂຄງການສະເໜີໃໝ່ ມູນຄ່າ 500 ຕື້ກວ່າກີບ

  ໃນປີ 2020 ຜ່ານມາໂຄງການສະເໜີໃໝ່ທັງໝົດຢູ່ແຂວງເຊກອງ ມີ 165 ໂຄງການລວມມູນຄ່າທັງໝົດ 506,73 ຕື້ກີບ ໂດຍເປັນໂຄງການປົກກະຕິ ແລະໂຄງການໄພພິບັດ.

ທ່ານ ບົວຈອນ ແກ້ວປະດັບສີ ຮອງຫົວໜ້າພະແນກແຜນການ ແລະການລົງທຶນແຂວງເຊກອງຄະນະກຳມະການຄຸ້ມຄອງການລົງທຶນຂັ້ນແຂວງໄດ້ລາຍງານບົດສະຫຼຸບຕີລາຄາປະເມີນໂຄງການກ່ອນເອົາເຂົ້າແຜນປະຈໍາປີ 2020 ໃນກອງປະຊຸມວຽກງານຄຸ້ມຄອງການລົງທຶນຂອງລັດ, ຂອງເອກະຊົນພາຍໃນ ແລະຕ່າງປະເທດຢູ່ແຂວງເຊກອງ ໃນວັນທີ 25 ພຶດສະພາ 2021 ໂດຍການເປັນປະທານຂອງທ່ານ ເຫຼັກໄຫຼ ສີວິໄລ ເຈົ້າແຂວງໆເຊກອງວ່າ: ໃນ 165 ໂຄງການລວມມີໂຄງການປົກກະຕິ ແລະໂຄງການໄພພິບັດ, ໃນນີ້ໂຄງການປົກກະຕິມີ 100 ໂຄງການລວມມູນຄ່າ 464,53 ຕື້ກີບ, ຂັ້ນແຂວງປະເມີນ 20 ໂຄງການລວມ ມູນຄ່າ 54,8 ຕື້ກີບ; ຂັ້ນເມືອງປະເມີນມີ 79 ໂຄງການ ລວມມູນຄ່າ 95,25 ຕື້ກີບ;

   ໃນນັ້ນເມືອງລະມາມ ມີ 29 ໂຄງ ການລວມມູນຄ່າ 43,49 ຕື້ກີບ; ເມືອງທ່າແຕງ 5 ໂຄງການ ມູນຄ່າ 4,89ຕື້ກີບ; ເມືອງກະລຶມ 25 ໂຄງການ ມູນຄ່າ 23,83 ຕື້ກີບ; ເມືອງດາກຈຶງ 20 ໂຄງການ ມູນຄ່າ 23,03 ຕື້ກີບ; 

  ແຍກເປັນແຕ່ລະໜ້າວຽກເປັນໂຄງການກໍ່ສ້າງ ແລະສ້ອມແປງທັງໝົດ 71 ໂຄງການ ລວມມູນຄ່າ 408,09 ຕື້ກີບ; ໃນນັ້ນທຶນຕ່າງປະເທດ 1 ໂຄງການ ມູນຄ່າ 47,15 ຕື້ກີບ; ໂຄງການສົ່ງເສີມວິຊາການ 25 ໂຄງການ ມູນຄ່າ 8,79 ຕື້ກີບ ແລະໂຄງການສະໜອງວັດຖຸອຸປະກອນ ມີ 4 ໂຄງການ ມູນຄ່າ 509 ລ້ານກີບ; ໄດ້ຜ່ານການປະເມີນທາງດ້ານວິຊາການ ແລະອອກໃບຢັ້ງຢືນການປະເມີນຜົນຈັດໃນປະເພດ A ຈໍານວນ 4 ໂຄງການ, ປະເພດ B ຈໍານວນ 71 ໂຄງການ, ປະເພດ F ຈໍານວນ 24 ໂຄງການ.

   ໂຄງການໄພພິບັດ ມີ 65 ໂຄງການລວມມູນຄ່າ 42,19 ຕື້ກີບ; ໃນນັ້ນເມືອງລະມາມ ມີ 6 ໂຄງການ ມູນຄ່າ 5,96 ຕື້ກີບ; ເມືອງທ່າແຕງ 3 ໂຄງການ ມູນຄ່າ 2,51 ຕື້ກີບ; ເມືອງກະລຶມ 30 ໂຄງການ ມູນຄ່າ 23,55 ຕື້ກີບ; ເມືອງດາກຈຶງ ມີ 26 ໂຄງການ ມູນຄ່າ 10,18 ຕື້ກີບ; ແຍກເປັນໂຄງການກໍ່ສ້າງ ແລະສ້ອມ ແປງ 63 ໂຄງການ ລວມມູນຄ່າ 42,10 ຕື້ກີບ, ໂຄງການສະໜອງວັດຖຸອຸປະກອນ 2 ໂຄງການ ມູນຄ່າ 88,98 ລ້ານກີບ ໄດ້ຜ່ານການປະເມີນທາງດ້ານວິຊາການ ແລະອອກໃບຢັ້ງຢືນການປະເມີນຜົນຈັດຢູ່ໃນປະເພດ B.

   ທ່ານ ບົວຈອນ ແກ້ວປະດັບສີ ໃຫ້ຮູ້ຕື່ມວ່າ: ໂຄງການໄດ້ບັນຈຸເຂົ້າແຜນການລົງທຶນຂອງລັດໃນປີ 2020 ມີ 16 ໂຄງການຄື: ໂຄງການລົງທຶນຂອງລັດ (ສະເພາະໂຄງການປະເພດ V ມູນຄ່າ 20 ຕື້ກີບລົງມາ) ມີ 12 ໂຄງການ ມີມູນຄ່າທັງໝົດ 53,39 ຕື້ກວ່າກີບ; ໂຄງການລົງທຶນຂອງລັດ (ສະເພາະໂຄງການປະເພດ I, II, III, IV ມູນຄ່າ 20 ຕື້ກີບຂຶ້ນໄປ) ມີ 1 ໂຄງການ ມີມູນຄ່າ 35,24 ຕື້ກວ່າກີບ; ໂຄງການລົງທຶນຂອງລັດ (ວຽກງານຈັນສັນພູມລໍາເນົາ ແລະບ່ອນທໍາມາຫາກິນຖາວອນ) ມີ 1 ໂຄງການ ມີມູນຄ່າ 6,23 ຕື້ກວ່າກີບ; ໂຄງການລົງທຶນຂອງລັດ (ໂຄງການທີ່ຂຶ້ນກັບສາຍຕັ້ງຂັ້ນກະຊວງ) ມີ 1 ໂຄງການ 13,29 ຕື້ກວ່າກີບ ແລະໂຄງລົງທຶນຂອງລັດ (ທຶນສົມທົບລັດຖະບານ ODA) ມີ 1 ໂຄງການ 47,48 ຕື້ກວ່າກີບ ແລະທຶນລັດຖະບານສົມທົບ 330 ລ້ານກີບ.

ຂ່າວ: ພຸດທະສອນ

แชร์