ສະຫະລັດມອບອຸປະກອນການແພດໃຫ້ກະຊວງສາທາ

   ໃນວັນທີ 25 ພຶດສະພາ ຜ່ານມາທ່ານ ເອກອັກ ຄະລັດຖະທູດ ດຣ. ປີເຕີ ເຮມ໋ອນ ໄດ້ມອບຊຸດອຸປະກອນການແພດ ແລະເຄື່ອງໃຊ້ອຸປະໂພກໃຫ້ແກ່ ທ່ານ ດຮ. ບຸນແຝງ ພົມມະໄລສິດ, ລັດຖະມົນຕີກະຊວງສາທາລະນະສຸກຊຶ່ງການມອບໃນຄັ້ງນີ້ແມ່ນຖືເປັນສ່ວນໜຶ່ງໃນການປະກອບສ່ວນຂອງສະຫະລັດອາເມລິກາເຂົ້າໃນການຊ່ວຍ ເຫຼືອວຽກງານຕ້ານພະຍາດໂຄວິດ-19 ຂອງ ສປປ ລາວ.

   ອຸປະກອນການແພດ ແລະເຄື່ອງໃຊ້ອຸປະໂພກດັ່ງກ່າວນັ້ນແມ່ນເປັນການມອບຄັ້ງທຳອິດຈາກການມອບ-ຮັບສອງຄັ້ງໂດຍຜ່ານການຊ່ວຍເຫຼືອຂອງສູນບັນຊາການກອງ ທັບສະຫະລັດປະຈຳພາກພື້ນອິນໂດປາຊີຟິກ, ກະຊວງປ້ອງກັນປະເທດສະຫະລັດອາເມລິກາໃຫ້ແກ່ສູນກັກບໍລິເວນ 25 ແຫ່ງທົ່ວປະເທດຂອງ ສປປ ລາວ.

  ຈຸດປະສົງຂອງການມອບເຄື່ອງດັ່ງກ່າວແມ່ນເພື່ອຕອບສະໜອງຕາມຄວາມຕ້ອງການຂອງທາງບຸກຄະລາກອນແພດໝໍ, ຜູ້ທີ່ເຮັດວຽກປະຈຳຢູ່ສູນກັກບໍລິເວນ ແລະຜູ້ທີຖືກກັກບໍລິເວນໃນແຕ່ລະສູນ, ທັງນີ້ກໍ່ເພື່ອເປັນການສືບຕໍ່ຊ່ວຍເຫຼືອວຽກງານຂອງອົງການອາຫານໂລກທີ່ດຳເນີນການຊ່ວຍເຫຼືອຢູ່ສູນດັ່ງກ່າວນັ້ນ, ການຊ່ວຍເຫຼືອນີ້ມີມູນຄ່າລວມທັງໝົດແມ່ນ 2,03 ແສນໂດລາສະຫະລັດ.

  ທ່ານທູດ ປີເຕີ ເຮມ໋ອນ ໄດ້ກ່າວວ່າ: ພວກເຮົາຈະສືບຕໍ່ຊ່ວຍເຫຼືອ ສປປ ລາວ ໃນການຄວມຄຸມພະຍາດໂຄວິດ-19 ນີ້ ເປັນສ່ວນໜຶ່ງຂອງການສືບຕໍ່ການຮ່ວມມືລະ ຫວ່າງສະຫະລັດອາເມລິກາ ແລະ ສປປ ລາວ ໂດຍການເປັນຄູ່ຮ່ວມມືແບບກວມລວມພາຍໄຕ້ຂໍ້ຕົກລົງຂອງອະດີດປະທານນາທິບໍດີ ບາລັກ ໂອບາມາ ແລະ ອະດີດປະທານປະເທດ ທ່ານ ບຸນຍັງ ວໍລະຈິດ ໃນໄລຍະ 5 ປີທີ່ຜ່ານມາ. ການມອບເຄື່ອງຊ່ວຍເຫຼືອໃນຄັ້ງນີ້ໄດ້ເນັ້ນໜັກໃຫ້ເຫັນການສືບຕໍ່ການຊ່ວຍເຫຼືອຂອງສະຫະລັດອາເມລິກາໃຫ້ແກ່ ສປປ ລາວ ຊຶ່ງເຫັນໄດ້ເຖິງສິ່ງທີ່ທ້າທ້າຍໃນການການຄວມຄຸມພະຍາດໂຄວິດ-19 ນີ້ ແລະກະຊວງປ້ອງກັນປະເທດສະຫະລັດອາເມລິກາກໍ່ຈະຍັງສືບຕໍ່ໃນການເປັນຄູ່ຮ່ວມງານທີ່ດີເພື່ອສ້າງຄວາມອາດສາມາດໃນໄລຍະຍາວເຂົ້າໃນວຽກງານສາທາລະນະສຸກ. 

  ໃນໄລຍະຫຼາຍປີທີ່ຜ່ານມາ, ກະຊວງປ້ອງກັນປະເທດສະຫະລັດອາເມລິກາໄດ້ມີການເຮັດວຽກຮ່ວມກັບກະຊວງສາທາລະນະສຸກ ແລະກົມເສນາຮັກ, ກະຊວງປ້ອງກັນປະເທດຂອງ ສປປ ລາວ ແລະ ການຊ່ວຍເຫຼືອເພື່ອຕອບສະໜອງຄວາມຕ້ອງການທາງດ້ານສະທາລະນະສຸກຂອງປະຊາຊົນລາວຊຶ່ງເປັນການປະກອນສ່ວນທີ່ມີມູນຄ່າຫຼາຍກວ່າ 2,4 ລ້ານໂດລາສະຫະລັດ ໃນຂົງເຂດວຽກງານສ້າງຕືກອາຄານໂຮງໝໍ, ລົດແພດສຸກເສີນພາກສະໜາມ, ອຸປະກອນການແພດໃນຫ້ອງວິເຄາະ, ອຸປະກອນທີ່ໃຊ້ໃນການກວດພະຍາດໂຄວິດ-19 ແລະຊຸດອຸປະກອນການແພດ.

   ການມອບ-ຮັບໃນຄັ້ງນີ້ເປັນພຽງສ່ວນໜຶ່ງຂອມູນຄ່າການຊ່ວຍເຫຼືອໂດຍຕົງຫຼາຍກວ່າ 8 ລ້ານໂດລາສະຫະລັດ ຂອງລັດຖະບານສະຫະລັດອາເມລິກາໃຫ້ແກ່ລັດຖະ ບານ ສປປ ລາວ ນັບຕັ້ງແຕ່ມີການເລີ້ມຕົ້ນການແຜ່ລະບາດຂອງພະຍາດ, ພ້ອມດຽວກັນນັ້ນໃນປີນີ້ກໍ່ເປັນການສະຫຼອງຄົບຮອບ 5 ປີ ການເປັນຄູ່ຮ່ວມມືແບບກວມລວມລະຫວ່າງສະຫະລັດອາເມລິກາ ແລະ ສປປ ລາວ.

แชร์