ພິດໂຄວິດດຶງແຮງງານລາວໂຈະວຽກເກືອບ 50 ພັນຄົນ

     ພິດຈາກສະພາບການລະບາດຂອງພະຍາດໂຄວິດ-19 ຮອບທີ 2 ທີ່ເກີດຂຶ້ນຢູ່ ສປປ ລາວ ໃນປະຈຸບັນນີ້ເຮັດໃຫ້ມີແຮງງານໃນທົ່ວປະເທດຖືກໂຈະວຽກເກືອບ 50.000 ຄົນ ໃນນີ້ສະເພາະຢູ່ນະຄອນຫຼວງວຽງຈັນມີຫົວໜ່ວຍແຮງງານຈຳນວນໜຶ່ງໄດ້ຢຸດຕິກິດຈະການຄື: ໂຮງງານຕັດຫຍິບ 11 ແຫ່ງ ແລະໂຮງງານຜະລິດເຫຼັກ 2 ແຫ່ງ, ມີແຮງງານປະມານ 10.000 ຄົນ ຖືກໂຈະວຽກ.

   ທ່ານ ປະເດີມພອນ ສົນທະນີ, ຮອງລັດຖະມົນຕີກະຊວງແຮງງານ ແລະສະຫວັດດີການສັງຄົມໃຫ້ສໍາພາດວ່າ: ເພື່ອແກ້ໄຂບັນຫາທີ່ເກີດຂຶ້ນກະຊວງແຮງງານ ແລະສະຫວັດດີການສັງຄົມໄດ້ອອກແຈ້ງການ ສະບັບເລກ ທີ 1532/ຮສສ, ລົງວັນທີ 5 ພຶດສະພາ 2021 ໂດຍໄດ້ກໍານົດໃຫ້ຫົວໜ່ວຍແຮງງານທີ່ຖືກສັ່ງໂຈະການດໍາເນີນທຸລະກິດຊົ່ວຄາວຈາກຂະແໜງການທີ່ກ່ຽວຂ້ອງພິຈາລະນາຊ່ວຍເຫຼືອຜູ້ອອກແຮງງານຕາມຄວາມສາມາດເພື່ອຮັກສາຜູ້ອອກແຮງງານໄວ້ ແລະເພື່ອເຮັດໃຫ້ຜູ້ອອກ ແຮງງານເຫຼົ່ານັ້ນໄດ້ສືບຕໍ່ດໍາລົງຊີວິດໄດ້ໂດຍພື້ນຖານ, ພ້ອມດຽວກັນນັ້ນ, ໃຫ້ເກັບກໍາຈໍານວນຜູ້ອອກແຮງງານທີ່ມີຄວາມຈໍາເປັນຕ້ອງໄດ້ຮັບການຊ່ວຍເຫຼືອສະເພາະ ເພື່ອລາຍງານຫາອົງການລັດຄຸ້ມຄອງແຮງງານ ( ພະແນກແຮງງານ ແລະ ສະຫວັດດີການສັງຄົມຂອງແຂວງ ແລະ ນະຄອນຫຼວງວຽງຈັນ) ເພື່ອເປັນຂໍ້ມູນໃນການຊອກຫາວິທີການຊ່ວຍເຫຼືອຕາມຄວາມເປັນຈິງຈາກລັດຖະບານ.

   ສ່ວນຜູ້ອອກແຮງງານທີ່ເປັນສະມາຊິກຂອງອົງການປະກັນສັງຄົມແຫ່ງຊາດທີ່ຖືກໃຫ້ພັກວຽກ ຫຼືເຮັດວຽກຢູ່ໃນຫົວຫນ່ວຍແຮງງານທີ່ຕ້ອງໄດ້ຢຸດກິດຈະການນັບແຕ່ວັນທີ 1 ພຶດສະພາ 2021ເປັນຕົ້ນໄປຈະໄດ້ຮັບເງິນນະໂຍບາຍອຸດໜູນວ່າງງານແຕ່ມີເງື່ອນໄຂໃນການມອບເງິນສົມທົບເຂົ້າກອງທຶນປະກັນສັງຄົມຢ່າງໜ້ອຍ 6 ເດືອນຂຶ້ນໄປໃນໄລຍະ 12 ເດືອນ ນັບແຕ່ເດືອນເມສາ 2021 ຄືນຫຼັງ,ໄລຍະໃນການປະຕິບັດອຸດໜູນວ່າງງານແມ່ນອີງໃສໄລຍະທີ່ລັດຖະບານປະກາດມາດຕະການເພື່ອຕອບໂຕ້ກັບການແຜ່ລະບາດຂອງເຊື້ອພະຍາດເທົ່ານັ້ນຊຶ່ງຈະມີການກໍານົດໃນລະບຽບການສະເພາະຕ່າງຫາກ.

  ທ່ານ ປະເດີມພອນ ສົນທະນີ ໃຫ້ຮູ້ຕື່ມວ່າ: ສຳລັບບັນດາຫົວໜ່ວຍແຮງງານທີ່ຍັງເບີກຈ່າຍເງິນເດືອນ ຫຼືຄ່າແຮງງານໃຫ້ຜູ້ອອກແຮງງານຕ້ອງໄດ້ສືບຕໍ່ມອບເງິນສົມ ທົບເຂົ້າກອງທຶນປະກັນສັງຄົມຕາມປົກກະຕິແຕ່ຖ້າມີຄວາມຫຍຸ້ງຍາກດ້ານການເງິນ ແມ່ນສາມາດເລື່ອນມອບເງິນສົມທົບໄດ້ແຕ່ຕ້ອງໄດ້ແຈ້ງເປັນລາຍລັກອັກສອນແກ່ອົງການປະກັນສັງຄົມຮັບຊາບ, ສ່ວນຫົວໜ່ວຍເເຮງງານທີ່ໄດ້ຢຸດດໍາເນີນກິດຈະການຊົ່ວຄາວ ແລະ ບໍ່ໄດ້ເບີກຈ່າຍເງິນເດືອນ ຫຼື ຄ່າແຮງງານໃຫ້ແກ່ຜູ້ອອກແຮງງານຂອງຕົນແມ່ນສາມາດໂຈະການມອບເງິນສົມທົບເຂົ້າກອງທຶນປະກັນສັງຄົມຕາມໄລຍະທີ່ທາງການປະກາດມາດຕະການຊຶ່ງໃນໄລຍະການໂຈະມອບເງິນສົມທົບນີ້ຍັງຈະເກີດສິດການອຸດໜູນປິ່ນປົວສຸຂະພາບ ແລະອຸດໜູນໄລຍະສັ້ນຕາມປົກກະຕິ ແຕ່ຈະບໍ່ໄດ້ນັບເຂົ້າເປັນໄລຍະປະກັນຕົນສໍາລັບການອຸດໜູນໄລຍະຍາວ.

ຂ່າວ: ບຸນຕຽງ ຈັນທະວົງ

แชร์