ປີນີ້ ສະຫວັນ ຈະປູກໄມ້ 3.240 ເຮັກຕາ

  ໃນປີ 2021 ນີ້ແຂວງສະຫວັນນະເຂດມີແຜນການປູກໄມ້ໃຫ້ໄດ້ຈໍານວນ 3.240 ເຮັກຕາ ຊຶ່ງໃນນີ້ສາມາດເກັບແກ່ນພັນໄດ້1.860 ກິໂລ,ກ້າເບ້ຍໄມ້ປະເພດຕ່າງໆໄດ້ແລ້ວ 2,4 ລ້ານເບ້ຍ ຈາກນັ້ນຈະໄດ້ພ້ອມກັບອົງການປົກຄອງທ້ອງຖິ່ນຕ່າງໆທໍາການຟື້ນຟູປ່າໄມ້ທີ່ຊຸດໂຊມໃຫ້ໄດ້ 36.450 ເຮັກຕາ.

   ທ່ານ ລໍາສັກ ແກ້ວມໍລະກົດ ຮອງຫົວໜ້າຂະແໜງປ່າໄມ້ ແຂວງສະຫວັນນະເຂດ ກ່າວວ່າ: ການປູກຕົ້ນໄມ້ໃນປີນີ້ຕາມທິດນໍາຂອງທ່ານເຈົ້າແຂວງສະຫວັນນະເຂດ ແມ່ນໃຫ້ພື້ນທີ່ມີຄວາມອຸດົມສົມບູນທາງດ້ານຊັບພະຍາກອນປ່າໄມ້ປູກເພື່ອຂາຍເປັນສິນຄ້າ ແລະເປັນການປະກອບສ່ວນໃນການປົກປັກຮັກສາສິ່ງແວດລ້ອມພ້ອມທັງຫຼຸດຜ່ອນມົນລະພິດທາງອາກາດໂດຍຈະຈັດກິດຈະກໍາເປີດລະດູການໆປູກໄມ້ປະຈໍາປີພາຍໃນແຂວງມີ 3 ຈຸດຄື, ຈຸດທີ 1 ແມ່ນຈັດກິດຈະກໍາເປີດລະດູການປູກໄມ້ປະຈໍາປີ ດ້ວຍການປູກໄມ້ພັນພື້ນເມືອງ,ມີຕົ້ນດອກຄູນ, ຕົ້ນສົ້ມພໍ່,ຕົ້ນດອກຈໍາປາ ແລະໄມ້ປະດັບອື່ນໆຕາມແຄມທາງເສັ້ນທາງອາໜຶ່ງ ແລະເສັ້ນທາງເຂົ້າສະໜາມບິນສະຫວັນນະເຂດເພື່ອຄວາມສວຍງາມ; ຈຸດທີ 2, ຂະແໜງປ່າໄມ້ຮ່ວມກັບກອງຄຸ້ມຄອງປ່າສະຫງວນ-ປ່າປ້ອງກັນດົງນາຕາດຈະທໍາການປູກໄມ້ໃນເນື້ອທີ່ 3 ເຮັກຕາ ຊຶ່ງເປັນການພື້ນຟູປ່າດົງນາຕາດດ້ວຍການປູກເສີມກ້ອງປ່າປູກເສີມໃນເນື້ອທີ່ປ່າປູກໃນປີ 2017 ທີ່ຜ່ານມາມີເບ້ຍໄມ້ 1.000 ເບ້ຍ ແລະຈຸດທີ 3 ຈະປູກຢູ່ປ່າສະຫງວນດົງພູວຽງ ເມືອງພີນ ໃນເນື້ອທີ່ເກືອບ 100 ເຮັກຕາ ປະກອບມີເບ້ຍໄມ້ດູ່, ແຕ້ຄ່າ, ສົ້ມຝາດ,ແຕ້ຮໍແມ່ນເປັນການປູກເສີມກ້ອງປ່າໃຫ້ມີຄວາມສົມບູນ,ຈາກນັ້ນກໍ່ແມ່ນບໍລິສັດຫົວໜ່ວຍທຸລະກິດ ແລະປະຊາຊົນໄດ້ພ້ອມກັນປູກໃນທີ່ດິນບ່ອນທີ່ມີເງື່ອນໄຂ.

 ເນື່ອງໃນໂອກາດວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ 2021 ນີ້ຂະແໜງປ່າໄມ້ພະແນກກະສິກໍາ ແລະປ່າໄມ້ແຂວງສະຫວັນນະເຂດ ໄດ້ຮຽກຮ້ອງຂໍການ ຮ່ວມມືມາຍັງຊາວແຂວງສະຫວັນນະເຂດຈົ່ງໄດ້ເຊີດຊູສະຕິຮັກຊາດຮັກບ້ານເກີດເມືອງນອນ ແລະຮັກຫວງແຫນປ່າໄມ້ພ້ອມກັນປະກອບສ່ວນຕາມເງື່ອນໄຂຄວາມອາດສາມາດໃນເຂົ້າການປູກໄມ້ຟື້ນຟູປ່າ ແລະ ປົກປັກຮັກສາປ່າໄມ້ໃຫ້ນັບມື້ມີຄວາມອຸດົມສົມບູນເພື່ອຕອບສະໜອງຄວາມຮຽກຮ້ອງຕ້ອງການວັດຖຸດິບດ້ານປ່າໄມ້ ແລະ ຜົນຜະລິດປ່າໄມ້ໃຫ້ໄດ້ຢ່າງຍືນນານພ້ອມທັງເປັນການປົກປັກຮັກສາສິ່ງແວດລ້ອມຕາມທິດສີຂຽວ ແລະຍືນຍົງ.

   ຊຶ່ງຂະແໜງປ່າໄມ້ແຂວງ, ກອງຄຸ້ມຄອງປ່າສະຫງວນ-ປ່າປ້ອງກັນ ແລະຫ້ອງການກະສິກໍາ-ປ່າໄມ້ເມືອງ, ນະຄອນຈະໄດ້ສົມທົບກັບບັນດາໂຮງງານບໍລິສັດທີ່ຊົມໃຊ້ຊັບພະຍາກອນຈາກປ່າໄມ້ ແລະປະຊາຊົນຢູ່ທ້ອງຖິ່ນຕ່າງໆພາຍໃນແຂວງສະຫວັນນະເຂດຕ່າງກໍ່ໄດ້ເລີ່ມສົນໃຈຈັດຕັ້ງປະຕິບັດໂດຍປະກາດວ່າຈະເຂົ້າຮ່ວມຂະບວນການປູກໄມ້ໃນປີ 2021 ໃຫ້ໄດ້ຕາມຄາດໝາຍ.

แชร์