ໄຊສົມບູນ ໃຫ້ກິ່ງແກ້ວອຸດົມ ສໍາຫຼວດແຮ່ທາດ

   ພິທີເຊັນບົດບັນທຶກຄວາມເຂົ້າໃຈ (MOU) ເພື່ອຊອກຄົ້ນ, ສໍາຫຼວດ ແລະສຶກສາຄວາມເປັນໄປໄດ້ທາງດ້ານເສດຖະກິດ-ເຕັກນິກແຮ່ຄໍາ, ແຮ່ທອງ ແລະແຮ່ຕິດພັນ ຢູ່ເຂດບ້ານໜອງພູນໄຊ ເມືອງລ້ອງແຈ້ງ ແຂວງໄຊສົມບູນ ລະຫວ່າງອົງການປົກຄອງແຂວງກັບບໍລິສັດກິ່ງແກ້ວອຸດົມ ສໍາຫຼວດອອກແບບ, ກໍ່ສ້າງເຄຫະສະຖານ ແລະຂົວທາງຈໍາ ກັດຜູ້ດຽວ ໄດ້ຈັດຂຶ້ນໃນວັນທີ 21 ພຶດສະພາ 2021 ນີ້ທີ່ສະໂມສອນເມືອງອະນຸວົງ ໂດຍການເຂົ້າຮ່ວມເປັນສັກຂີພິຍານຂອງທ່ານ ພົຕ ຄໍາລຽງ ອຸທະໄກ ສອນ, ເຈົ້າແຂວງໄຊສົມບູນ, ມີຮອງເລຂາພັກແຂວງ, ປະທານສະພາປະຊາຊົນແຂວງ, ບັນດາທ່ານຮອງເຈົ້າແຂວງ, ການນໍາເມືອງລ້ອງແຈ້ງ, ມີທ່ານ ນາງ ສີວຽງໄຊ ມະນີວົງ,ອໍານວຍການບໍລິສັດກິ່ງແກ້ວອຸດົມ ສໍາຫຼວດອອກແບບ, ກໍ່ສ້າງເຄຫະສະຖານ ແລະຂົວທາງຈໍາກັດຜູ້ດຽວພ້ອມດ້ວຍຫົວໜ້າພະແນກຮອງພະແນກການ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

   ທ່ານ ສົມບູນ ສອນລິດທິເດດ, ຫົວໜ້າຫ້ອງວ່າການແຂວງໄດ້ຂຶ້ນລາຍງານກ່ຽວກັບຂໍ້ມູນພຶ້ນຖານຂອງໂຄງການ ແລະເນື້ອໃນຂອງບົດບັນທຶກທີ່ລົງນາມກັນຊຶ່ງໂຄງ ການດັ່ງກ່າວແມ່ນຊອກຄົ້ນ, ສໍາຫຼວດ ແລະ ສຶກສາຄວາມເປັນໄປໄດ້ທາງດ້ານເສດຖະກິດ-ເຕັກນິກແຮ່ຄໍາ, ແຮ່ທອງ ແລະ ແຮ່ຕິດພັນໃນເນື້ອທີ່ 58,4 ກິໂລຕາແມັດ ຊຶ່ງໄລຍະເວລາຂອງບົດບັນທຶກຄວາມເຂົ້າໃຈ ສະບັບນີ້ແມ່ນ 24 ເດືອນ ໃນນັ້ນໜ້າວຽກໂຄງການຂອງບໍລິສັດທີ່ຈະຕ້ອງໄດ້ຈັດຕັ້ງປະຕິບັດຄື: ຊອກຄົ້ນ ແລະ ສຶກສາສໍາຫຼວດ, ສຶກສາຄວາມເປັນໄປໄດ້ທາງດ້ານເສດຖະກິດ-ເຕັກນິກ ຂອງໂຄງການໃນເນື້ອທີ່ໄດ້ຮັບອະນຸຍາດ, ສ້າງບົດບັນທຶກວິພາກເສດຖະກິດ-ເຕັກນິກ ແລະບົດສຶກສາຜົນກະທົບຕໍ່ສິ່ງແວດລ້ອມສັງຄົມ ແລະ ທໍາມະຊາດພ້ອມນັ້ນທາງບໍລິສັດຕ້ອງໄດ້ວາງເງິນຄໍ້າປະກັນໂຄງການ 50 ພັນໂດລາ ນອກນີ້ບໍລິສັດຈະໄດ້ປະກອບສ່ວນເງິນຍຸກຍູ້ແຂວງໄຊສົມບູນ ຈໍານວນ 10 ພັນໂດລາ, ປະກອບທຶນພັດທະນາສັງຄົມໃຫ້ແຂວງ ຈໍານວນ 20 ພັນໂດລາ,ປະກອບທຶນພັດທະນາທ້ອງຖິ່ນໃຫ້ເມືອງລ້ອງແຈ້ງຈໍານວນ 20 ພັນໂດລາ, ປະກອບທຶນຝຶກອົບຮົມວິຊາການໃຫ້ແຂວງ,ເມືອງ ແລະບ້ານທີ່ໂຄງການຕັ້ງຢູ່ຈໍານວນ 3 ພັນໂດລາສະຫະລັດ,ປະກອບທຶນຕິດຕາມກວດກາ (MOU) ຈໍານວນ 20 ພັນໂດລາ ແລະທາງບໍລິສັດຕ້ອງໄດ້ປະກອບທຶນຕ່າງໆ ຕື່ມອີກຕາມບົດບັນທຶກ ( MOU) ໃນຄັ້ງນີ້.

ຈາກນັ້ນທັງສອງຝ່າຍກໍໄດ້ລົງນາມເຊັນບົດບັນທຶກຮ່ວມກັນລະຫວ່າງອົງການປົກຄອງແຂວງໄຊສົມບູນຊຶ່ງຕາງໜ້າໂດຍທ່ານ ໄຊຍະເດດ ວົງສາຣະວັນ,ຫົວໜ້າພະແນກແຜນການ ແລະການລົງທຶນແຂວງ, ທ່ານ ບຸນທຽມ ໄຊສົ່ງຄາມ, ຫົວໜ້າພະລັງງານ ແລະບໍ່ແຮ່ແຂວງ, ທ່ານ ອິນຕອງ ໂຄດປັນຍາ, ເຈົ້າເມືອງລ້ອງແຈ້ງ ແລະ ຕ່າງໜ້າບໍລິສັດໂດຍທ່ານ ນາງ ສີວຽງໄຊ ມະນີວົງ, ອໍານວຍການບໍລິສັດກິ່ງແກ້ວອຸດົມສໍາຫຼວດອອກແບບ, ກໍ່ສ້າງເຄຫະສະຖານ ແລະຂົວທາງຈໍາກັດຜູ້ດຽວໂດຍຊ້ອງໜ້າການນໍາແຂວງ ແລະພະແນກການເປັນສັກຂີພິຍານ.

  ໃນໂອກາດດັ່ງກ່າວທາງບໍລິສັດຍັງໄດ້ມອບລົດຟໍຈູນເນີ 1 ຄັນ ແລະລົດຣີໂວ 1 ຄັນ ໃນມູນຄ່າ 1,08 ແສນໂດລາ ໃຫ້ແຂວງໄຊສົມບູນຕື່ມອີກ.

ຂ່າວ: ນາງ ຕູດ ຄໍາພໍໃຈ

แชร์