ບ້ານ ເອັສໂອເອັສ ທົບທວນວຽກປ້ອງກັນໂຄວິດ

   ບ້ານຊ່ວຍເຫຼືອເດັກນ້ອຍ ເອັສໂອເອັສ ຫຼວງພະບາງ ໄດ້ຈັດກອງປະຊຸມສະຫຼຸບ ແລະທົບທວນຄືນການຈັດຕັ້ງປະຕິບັດມາດຕະການເຝົ້າລະວັງປ້ອງກັນ ແລະກັນການແຜ່ລະບາດຂອງພະຍາດໂຄວິດ-19 ຂຶ້ນໃນວັນທີ 21 ພຶດສະພາ 2021 ໂດຍການເປັນປະທານຮ່ວມຂອງທ່ານ ນາງ ດາວອນ ຜະພົນໄຊ ອຳນວຍການບ້ານຊ່ວຍເຫຼືອເດັກນ້ອຍ ເອັສໂອເອັສ ຫຼວງພະບາງ, ມີຄະນະອຳນວຍການ, ຄູອານຸບານ, ຕາງໜ້າແມ່ລ້ຽງເດັກ ແລະພະນັກງານພາຍໃນບ້ານ ເອັສໂອເອັສ ເຂົ້າຮ່ວມ.     

  ທ່ານ ນາງ ດາວອນ ຜະພົນໄຊ ອຳນວຍການບ້ານຊ່ວຍເຫຼືອເດັກນ້ອຍ ເອັສໂອເອັສ ຫຼວງພະບາງ ກ່າວວ່າ: ກອງປະຊຸມຄັ້ງນີ້ເປັນການສະຫຼຸບຕີລາຄາ ແລະທົບທວນຄືນການຈັດຕັ້ງປະຕິບັດບັນດາມາດຕະການ, ຄຳສັ່ງ ແລະ ຄໍາແນະນຳຕ່າງໆຂອງຄະນະສະເພາະກິດກໍ່ຄືຂັ້ນເທິງວາງອອກຢ່າງເຂັ້ມງວດ ແລະ ເປັນການທົບທວນຄືນການເຮັດວຽກຂອງພະນັກງານພາຍໃນບ້ານຊ່ວຍເຫຼືອເດັກນ້ອຍ ເອັສໂອເອັສ ຫຼວງພະບາງ ໃນຊ່ວງທີ່ມີການແຜ່ລະບາດຂອງພະຍາດໂຄວິດ-19 ເພື່ອຊອກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ແລະພ້ອມກັນວາງມາດຕະການ, ແຜນການ, ວິທີການແກ້ໄຂໃນຕໍ່ໜ້າໃຫ້ສອດຄ່ອງ, ແນໃສ່ເຂັ້ມງວດເຝົ້າລະວັງ ແລະຮັບປະກັນບໍ່ໃຫ້ມີ ການຕິດເຊື້ອພະຍາດດັ່ງກ່າວ, ລວມເຖິງການອຳນວຍຄວາມສະດວກເຮັດໃຫ້ການຈັດຕັ້ງປະຕິບັດວຽກງານມີຜົນສຳເລັດ ແລະ ຕະຫຼອດໄລຍະການຈັດຕັ້ງປະຕິບັດມາດຕະການ ແລະການເຝົ້າລະວັງການແຜ່ລະບາດຂອງພະຍາດໂຄວິດ-19.

 ເກືອບ 1 ເດືອນຜ່ານມາ ຄະນະອໍານວຍການບ້ານກໍ່ໄດ້ເອົາໃຈໃສ່ຢ່າງຕັ້ງໜ້າໃນການຊີ້ນໍາໆພາໄດ້ດີບວກກັບຄວາມເອົາໃຈໃສ່ຂອງພະນັກງານ,ແມ່ລ້ຽງໃນການປະຕິບັດບັນດາມາດຕະການທີ່ຄະນະສະເພາະກິດແຕ່ລະຂັ້ນວາງອອກເຫັນວ່າປະຕິບັດໄດ້ດີເປັນຕົ້ນແມ່ນການວັດແທກອຸນຫະພູມກ່ອນເຂົ້າ-ອອກທຸກຄັ້ງ, ການໃຊ້ຜ້າອັດປາກ-ດັງເວລາມາປະຕິບັດໜ້າທີ່ວຽກງານ,ລ້າງມືດ້ວຍສະບູ,ນໍ້າສະອາດ,ການລ້າງມືດ້ວຍເຈວທີ່ມີທາດເຫຼົ້າຂ້າເຊື້ອ ແລະໄປຮັບການສັກວັກແຊງປ້ອງກັນໂຄວິດ-19 ທຸກຄົນ.

   ແຕ່ເຖິງຢ່າງໃດກໍ່ຕາມເພື່ອສືບຕໍ່ເຝົ້າລະວັງກັນການຕິດເຊື້ອ ແລະຈັດຕັ້ງປະຕິບັດມາດຕະການຂອງຄະນະສະເພາະກິດວາງອອກທ່ານອຳນວຍການບ້ານຊ່ວຍເຫຼືອເດັກນ້ອຍ ເອັສໂອເອັສ ຫຼວງພະບາງ ໄດ້ຮຽກຮ້ອງມາຍັງພະນັກງານ, ແມ່ລ້ຽງເດັກ, ລວມໄປຮອດລູກຫຼານທຸກຄົນຈົ່ງມີສະຕິໃນການເສບຂໍ້ມູນຂ່າວສານ ແລະ ເປັນເຈົ້າການເຝົ້າລະວັງ ແລະຍົກສູງຄວາມຮັບຜິດຊອບຂອງຕົນໃນການປະຕິບັດມາດຕະການຂອງຄະນະສະເພາະກິດວາງອອກຢ່າງເຂັ້ມງວດເພື່ອຮັບປະກັນເຮັດໃຫ້ທຸກຄົນຢູ່ພາຍໃນບ້ານຊ່ວຍເຫຼືອເດັກນ້ອຍ ເອັສໂອເອັສ ຫຼວງພະບາງ ມີຄວາມປອດໄພ ແລະບໍ່ມີຜູ້ຕິດເຊື້ອພະຍາດໂຄວິດ-19, ຮຽກຮ້ອງມາຍັງພະນັກງານ, ແມ່ລ້ຽງ, ນ້າ ສາວ ແລະລູກຫຼານທີ່ກຳລັງສຶກສາຮໍ່າຮຽນຢູ່ໂຮງຮຽນວິຊາຊີບ, ວິທະຍາໄລ ແລະມະຫາວິທະຍາໄລລວມໄປເຖິງຜູ້ທີ່ໄດ້ວຽກເຮັດງານທຳແລ້ວຈົ່ງພ້ອມກັນໄປຮັບວັກແຊງຕາມຈຸດຕ່າງໆ ທີ່ຄະນະສະເພາະກິດໄດ້ກຳນົດໄວ້ໃຫ້ຄົບ.

  ກອງປະຊຸມຄັ້ງນີ້ຜູ້ເຂົ້າຮ່ວມຍັງໄດ້ຮັບຝັງເນື້ອໃນກອງປະຊຸມທາງຂອງຄະນະອຳນວຍການກຽວກັບການຈັດຕັ້ງປະຕິບັດນະໂຍບາຍຕໍ່ພະນັກງານ, ຮັບຟັງຂໍ້ຕົກລົງຂອງທ່ານອຳນວຍການໂຄງການບ້ານຊ່ວຍເດັກນ້ອຍ ເອັສໂອເອັສລາວ ກ່ຽວກັບການປະຕິບັດນະໂຍບາຍຕໍ່ພະນັກງານຜູ້ທີ່ມີອາຍຸກະສຽນພັກຜ່ອນຮັບເບ້ຍບຳນານຕາມເງື່ອນໄຂຕ່າງໆຕື່ມອີກ.

ຂ່າວ: ສີສຸວັນ

แชร์