ເຈົ້າແຂວງເຊກອງ ເນັ້ນເພີ່ມປ້ອງກັນໂຄວິດ

 ໃນໂອກາດເປັນປະທານຮ່ວມກອງປະຊຸມທົບທວນຄືນການຈັດຕັ້ງປະຕິບັດວຽກງານປ້ອງກັນ,ຄວບຄຸມ ແລະແກ້ໄຂພະຍາດໂຄວິດ-19 ຂອງຄະນະກໍາມະການສະເພາະກິດຂັ້ນແຂວງໃນວັນທີ 19 ພຶດສະພາ 2021 ທີ່ຫ້ອງປະຊຸມຊັ້ນ III ຫ້ອງວ່າການແຂວງເຈົ້າແຂວງເຊກອງຮຽກຮ້ອງຫຼາຍບັນຫາເພື່ອເພີ່ມທະວີມາດຕະການສະກັດກັ້ນ, ຄວບຄຸມ ແລະກຽມຄວາມພ້ອມຮອບດ້ານເພື່ອຕ້ານພະຍາດໂຄວິດ-19.

   ທ່ານ ເຫຼັກໄຫຼ ສີວິໄລ ເຈົ້າແຂວງແຂວງເຊກອງຮຽກຮ້ອງໃຫ້ຄະນະພັກທຸກຂັ້ນເພີ່ມທະວີວຽກງານສຶກສາອົບຮົມການເມືອງ-ແນວຄິດ, ໂຄສະນາປຸກລະດົມ, ຊຸກຍູ້ພະນັກງານ-ລັດຖະກອນ, ທະຫານ, ຕຳຫຼວດ, ປະຊາຊົນ ແລະຊັ້ນຄົນໃນສັງຄົມສືບຕໍ່ປະຕິບັດຕາມທິດຊີ້ນໍາຂອງກົມການເມືອງທີ່ວ່າ: ຖືເອົາການຕ້ານ, ສະກັດກັ້ນ, ຄວບຄຸມ ແລະປ້ອງກັນພະຍາດໂຄວິດ-19 ເປັນໜ້າທີ່ຍຸດທະສາດສໍາຄັນ ແລະຮີບດ່ວນໃນການນໍາພາ-ຊີ້ນໍາ ແລະບັນຊາຕົວຈິງຄືໃນສະພາວະສົງຄາມຖືເປັນປັດໄຈສໍາຄັນຕັດສິນກວ່າໝູ່ທີ່ຈະຮັບປະກັນໃຫ້ແຂວງເຊກອງຂອງພວກເຮົາສາມາດຄວບຄຸມການແຜ່ລະບາດຂອງເຊື້ອພະຍາດໂຄວິດ-19, ຕ້ອງຮັບປະກັນບໍ່ໃຫ້ມີກໍລະນີຜູ້ຕິດເຊື້ອຕື່ມອີກ.

  ທ່ານເຈົ້າແຂວງຮຽກຮ້ອງຕື່ມວ່າ: ພວກເຮົາຕ້ອງເປັນເຈົ້າການຄຸ້ມຄອງຄົນເຂົ້າ-ອອກແຂວງຢ່າງເຂັ້ມງວດໃຫ້ປະຕິບັດຕາມລະບຽບຫລັກການທີ່ໄດ້ກໍານົດໄວ້, ສືບຕໍ່ໂຄສະນາປຸກລະດົມຢ່າງກວ້າງຂວາງລົງເລິກເຂດຊຸມຊົນ, ປັບປຸງໃຫ້ມີປ້າຍໂຄສະນາຊວນເຊື່ອ ແລະເສບຂ່າວທາງການ, ເປັນເຈົ້າການກວດຫາເຊື້ອໃນກຸ່ມສ່ຽງ, ກວດກາ ແລະປັບປຸງສິ່ງອໍານວຍຄວາມສະດວກຢູ່ສູນກັກບໍລິເວນ, ອອກແຮງໂຄສະນາປຸກລະດົມການສັກຢາວັກຊິນໃຫ້ຫຼາຍຂຶ້ນ, ເອົາໃຈໃສ່ເບິ່ງແຍງແພດໝໍ, ທະຫານ, ຕໍາ ລວດ, ປຸກລະດົມການປະກອບສ່ວນຂອງພາກລັດ ແລະ ເອກະຊົນພ້ອມທັງຄຸ້ມຄອງລາຍຮັບ-ລາຍຈ່າຍໃຫ້ມີຄວາມໂປ່ງໃສ, ປັບປຸງແບບແຜນວິທີເຮັດວຽກຂອງຄະນະກໍາມະການສະເພາະກິດແຕ່ລະຂັ້ນຊຶ່ງແຂວງເຊກອງຂອງພວກເຮົາມີຄວາມຈໍາເປັນຈະສືບຕໍ່ລັອກດາວແຂວງຕື່ມອີກ.

แชร์