ສມກຈ ພັດທະນານັກບໍລິຫານການເງິນຈຸລະພາກມືອາຊີບ

   ອົງການຈັດຕັ້ງສະມາຄົມການເງິນຈຸລະພາກ (ສມກຈ) ໃນເມື່ອກ່ອນເປັນກຸ່ມເຮັດວຽກການເງິນຈຸລະພາກຂອງ ສປປ ລາວ (ກຮກຈ) ຊຶ່ງຮັບການສ້າງຕັ້ງຂຶ້ນໃນເດືອນພຶດສະພາ 2007 ໂດຍກຸ່ມຜູ້ທີ່ຈັດຕັ້ງປະຕິບັດວຽກງານການເງິນຈຸລະພາກເພື່ອສ້າງກົນໄກການແລກປ່ຽນຂໍ້ມູນຂ່າວສານ ແລະປະສົບການ, ເປັນຕົວແທນເພື່ອຜົນປະໂຫຍດຂອງຂະແໜງການເງິນຈຸລະພາກ ແລະປະສານງານກິດຈະກໍາຕ່າງໆຂອງອົງການຜູ້ໃຫ້ທຶນ; ໃນເດືອນຕຸລາ 2013, ກຮກຈ ໄດ້ຮັບໃບອະນຸຍາດຊົ່ວຄາວເປັນສະມາຄົມບໍ່ຫວັງຜົນກໍາໄລ (NPA) ຈາກກະຊວງພາຍໃນ (MoHA). ສມກຈ ເປັນອົງກອນຫຼັກທີ່ເປັນຕົວແທນໃຫ້ແກ່ອຸດສາຫະກໍາການເງິນຈຸລະພາກແຫ່ງ ຊາດ. 

ສມກຈ ໄດ້ດໍາເນີນການເຕົ້າໂຮມບັນດາຜູ້ຈັດຕັ້ງປະຕິບັດວຽກງານການເງິນຈຸລະພາກແລະຜູ້ມີສ່ວນຮ່ວມໃນວຽກງານດັ່ງກ່າວອື່ນໆທີ່ມີເປົ້າໝາຍຄ້າຍຄືກັນຕາມລະບຽບຫຼັກການຂອງລັດຖະບານກໍ່ຄື ທຫລ ເພື່ອການປັບປຸງການເຂົ້າເຖິງການບໍລິການດ້ານການເງິນທີ່ເໝາະສົມ ແລະເປັນທີ່ຍອມຮັບໄດ້ຂອງປະຊາຊົນຜູ້ທຸກຍາກ ແລະຜູ້ທີ່ບໍ່ມີຄວາມສາມາດເຂົ້າຫາທະນາຄານ; ເພື່ອບັນລຸເປົ້າໝາຍດັ່ງກ່າວ, ສມກຈ ໄດ້ປະກອບສ່ວນເຂົ້າໃນການສ້າງຄວາມເຂັ້ມແຂງດ້ານການປະສານງານຂອງຂະແໜງການ, ສ້າງຄວາມໂປ່ງໃສເຮັດໃຫ້ມີຄວາມຍືນຍົງ ແລະມີຄຸນນະພາບຂອງການບໍລິການ. ນອກຈາກນັ້ນ, ສມກຈ ຍັງປະກອບສ່ວນເຂົ້າໃນຂະບວນການສ້າງສະພາບແວດ ລ້ອມທາງດ້ານລະບຽບກົດໝາຍທີ່ເອື້ອອໍານວຍ.

   ໃນທີ່ຜ່ານມາເຖິງປະຈຸບັນສມກຈໄດ້ຮັບການພັດທະນາຢ່າງຕັ້ງໜ້າ ແລະບໍ່ຢຸດຢັ້ງ, ມີປະສິດທິພາບ, ປະສິດທິຜົນຕະຫຼອດມາປະກອບສ່ວນເຂົ້າໃນການພັດທະນາຂະແໜງການໆເງິນຂອງ ສປປ ລາວ ຕາມທິດລັດຖະບານສາມາດເຮັດໃຫ້ປະຊາຊົນບັນດາເຜົ່າທີ່ຢູ່ໃນຕົວເມືອງກໍ່ຄືຊົນນະບົດ-ພູດອຍ, ຫ່າງໄກ ແລະ ສອກຫຼີກໄດ້ເຂົ້າເຖິງແຫຼ່ງທຶນຂອງສະຖາບັນການເງິນຈຸລະພາກຢ່າງງ່າຍດາຍໂດຍສະເພາະຜູ້ປະກອບການຈຸລະວິສາຫະກິດ-ວິສາຫະກິດຂະໜາດນ້ອຍ ແລະ ກາງ (MSMEs)ຢູ່ບັນດາເມືອງທຸກຍາກ, ຈຸດສຸມພັດທະນາຂອງລັດຖະບານ ແລະຂອງທ້ອງຖິ່ນ, ບ້ານ 3 ສ້າງປະກອບສ່ວນແກ້ໄຂຊີວິດການເປັນຢູ່ຂອງປະຊາຊົນປະກອບສ່ວນເຂົ້າໃນແຜນພັດທະນາເສດຖະກິດ-ສັງຄົມຂອງລັດຖະບານໃນແຕ່ລະໄລຍະດ້ວຍດີສະເໝີມາ.

   ຜ່ານມາ ສມຈກ ໄດ້ພັດທະນາຕົນເອງໃນຫຼາຍດ້ານເປັນຕົ້ນໄດ້ປັບປຸງກົງຈັກການຈັດຕັ້ງຕາມທິດກະທັດຮັດແຕ່ມີຄຸນນະພາບ, ສໍາຄັນໄດ້ເອົາໃຈໃສ່ຍົກລະດັບຄຸນນະພາບບຸກຄະລາກອນຂອງ ສມກຈ ທັງເນັ້ນໃສ່ການຊຸກຍູ້ສົ່ງເສີມຄວາມຮູ້ດ້ານນັກບໍລິຫານການເງິນຈຸລະພາກໃຫ້ແກ່ບັນດາສະຖາບັນການເງິນຈຸລະພາກທີ່ເປັນສະມາຊິກຂອງຕົນຊຶ່ງຫຼ້າສຸດໃນວັນທີ 9 ເມສາ 2021 ຜ່ານມາ, ສມກຈ ຮ່ວມກັບກົມຄຸ້ມຄອງສະຖາບັນການເງິນ (ກຄສງ) ທະນາຄານແຫ່ງ ສປປ ລາວ (ທຫລ) ໂດຍໄດ້ຮັບການສະໜັບສະໜູນ ຈາກອົງການ ADA ໄດ້ສໍາເລັດການຝຶກອົບຮົມຫຼັກສູດບໍລິຫານການເງິນຈຸລະພາກ ຮຸ່ນທີ XX (ເລີ່ມແຕ່ວັນທີ 15 ມີນາ ແລະສໍາເລັດໃນວັນທີ 15 ເມສາ 2021ລວມທັງໝົດ 21 ວັນ) ໂດຍການເຂົ້າຮ່ວມຂອງທ່ານ ພັນທະບູນ ໄຊຍະເພັດ ຮອງຫົວໜ້າກົມ ກຄສງ; ທ່ານ ສົມພອນ ສີແສງລັດ ປະທານສະພາບໍລິຫານ ສມກຈ ;ທ່ານນາງ ປະມວນ ເພັດທານີ ຜູ້ອໍານວຍການ ສມກຈ ແລະມີສະຖາບັນການເງິນລະພາກທີ່ເປັນສະມາຊິກ, ມີນັກຝຶກອົບຮົມຈາກ ສກຈຮ, ສກຈບ, ກົມຄຸ້ມຄອງສະຖາບັນການເງິນ ທຫລ ເຂົ້າຮ່ວມ.

   ການຝຶກອົບຮົມຫຼັກສູດບໍລິຫານການເງິນຈຸລະພາກ (Microfinance Management Certificate CourseMFMCC) ໃນເບື້ອງຕົ້ນແມ່ນໃຫ້ເຂົ້າໃຈ ກ່ຽວກັບການບໍລິຫານການເງິນຈຸລະພາກໃນນີ້ຫຼັກສູດປະກອບດ້ວຍຄວາມຮູ້ພື້ນຖານກ່ຽວກັບການເງິນຈຸລະພາກ; ການວາງແຜນທຸລະກິດ ແລະຍຸດທະສາດ; ການບໍລິຫານບຸກຄະລາກອນ ແລະທັກສະການການເປັນຜູ້ນໍາ; ການບໍລິຫານສິນເຊື່ອ ແລະໜີ້ຊັກຊ້າ; ການຄຸ້ມຄອງທີ່ດີ-ການຄຸ້ມຄອງສະພາບໍລິຫານ; ການບໍລິຫານການເງິນ-ການບໍລິຫານການປະຕິບັດທາງດ້ານສັງຄົມ ແລະ ການບັນຊີ-ລະບົບຂໍ້ມູນ; ການພັດທະນາຜະລິດຕະພັນ; ການປະຕິບັດຕາມຂໍ້ກໍານົດກົດລະບຽບ ແລະ ການຄວບຄຸມພາຍໃນ. 

   ຫຼັກສູດບໍລິຫານການເງິນຈຸລະພາກແມ່ນໄດ້ອອກແບບສະເພາະ ສປປ ລາວ ຊຶ່ງຈະໄດ້ຊ່ວຍເພີ່ມຄວາມຮູ້-ຄວາມສາມາດຂອງບັນດາຜູ້ຈັດການຂອງສະຖາບັນການເງິນລະພາກ (ສກຈ) ໃຫ້ເຂັ້ມແຂງຍິ່ງຂຶ້ນ; ພ້ອມທັງ, ເປັນການສະໜັບສະໜູນໃນການດໍາເນີນງານຂອງຂະແໜງການເງິນລະພາກມີປະສິດທິພາບ, ປະສິດທິຜົນດີຂຶ້ນ ແລະ ທັງເປັນຜົນດີໃຫ້ສະຖາບັນ ແລະ ຂະແໜງການເງິນໃນ ສປປ ລາວ ມີຄວາມຍືນຍົງ; ຫຼັກສູດຝຶກອົບຮົມໄດ້ຮັບການອໍານວຍຄວາມສະດວກໂດຍທິມຄູຝຶກ MFMCC ທີ່ຜ່ານຫຼັກສູດຄູຝຶກ ແລະຮັບການຢັ້ງຢືນຈາກໂຮງຮຽນແຟັງເຟີດ, ປະເທດເຢຍລະມັນ.

ໂດຍ: ຣັດສະໝີ ດວງສັດຈະ

แชร์