ຊົມຊົນມີລາຍໄດ້ ແລະເປັນເຈົ້າການປະຕິບັດໂຄງການ ທລຍ

  ບ້ານກາເລັງ ເມືອງສະໝ້ວຍ ແຂວງສາລະວັນ ເປັນບ້ານໜຶ່ງທີ່ໄດ້ຮັບການສົ່ງເສີມຄວາມເປັນເຈົ້າການໃນການຈັດຕັ້ງປະຕິບັດໂຄງການຍ່ອຍຂອງກອງທຶນຫຼຸດຜ່ອນຄວາມທຸກຍາກໂດຍຊຸມຊົນຈັດຕັ້ງປະຕິບັດເອງ. ພາຍໃນບ້ານມີພົນລະເມືອງທັງໝົດ 312 ຄົນ,ຍິງ 143 ຄົນ, ມີ 60 ຄອບຄົວ, ໃນນັ້ນຄອບຄົວທຸກຍາກທີ່ສຸດມີ 25 ຄອບຄົວ, ທຸກ 25 ຄອບຄົວ, ປານກາງ 9 ຄອບຄົວ ແລະຮັ່ງມີ 1 ຄອບຄົວ. ໂຄງການທີ່ປະຕິບັດ ເອງແມ່ນ: ໂຄງການກໍ່ສ້າງຊົນລະ ປະທານຂະໜາດ 8x5 ແມັດ, ສູງ 1 ແມັດ, ຄອງຊົນລະປະທານ 300 ແມັດ ແລະຄອງສົ່ງເຂົ້າເນື້ອທີ່ນາ 48 ແມັດມີມູນຄ່າທັງໝົດ 136 ລ້ານກວ່າກີບ, ໃນນັ້ນທຶນ ທລຍ 125 ລ້ານກວ່າກີບ ແລະທຶນ ຊຸມຊົນ 10 ລ້ານກວ່າກີບ. ກຳນົດໄລຍະເວລາການກໍ່ສ້າງ 2 ເດືອນ. ຊຶ່ງຫາກໂຄງການນີ້ສຳເລັດຈະສາມາດສ້າງເງື່ອນໄຂ, ທ່າແຮງໃຫ້ປະ ຊາຊົນພາຍໃນບ້ານໄດ້ຢ່າງແຂງ ແຮງ ໃນການເຮັດນາປູກເຂົ້າ, ລ້ຽງປາ, ປູກພືດຜັກ ແລະອື່ນໆ.

  ທ່ານ ແສງເພັດ ວັນນະວົງ ຫົວໜ້າຂະແໜງພັດທະນາຊຸມຊົນ ທລຍ ຂັ້ນສູນກາງໃຫ້ສຳພາດວ່າ: ເພື່ອຊຸກຍູ້, ຕິດຕາມກວດກາ, ການຈັດຕັ້ງປະຕິບັດໂຄງ ການຍ່ອຍໃຫ້ ມີຜົນສຳເລັດ ແລະມີຄຸນນະພາບ ທີ່ຊຸມຊົນເປັນເຈົ້າການປະຕິບັດເອງ ໂດຍບໍ່ມີຜູ້ຮັບເໝົາ ໂດຍສະເພາະ ແມ່ນໄດ້ມອບສິດທຸກຢ່າງໃຫ້ຊຸມຊົນບໍລິຫານຈັດການເອງເຊັ່ນ: ການຈັດຊື້ຈັດຈ້າງ, ການບໍລິຫານ ງົບປະມານ ແລະການດຳເນີນການ ກໍ່ສ້າງ ທີ່ສຳຄັນແມ່ນເຮັດໃຫ້ປະຊາຊົນມີວຽກເຮັດງານທຳ, ມີລາຍໄດ້ເສີມ, ມີບົດຮຽນ, ມີການຖ່າຍທອດສີມືແຮງງານສາມາດປະກອບອາຊີບເສີມໄດ້, ມີປະສົບການ ແລະໄດ້ກະຈາຍລາຍໄດ້ໄປສູ່ຄອບຄົວຜູ້ທຸກຍາກພາ ຍໃນບ້ານ, ຊຶ່ງມີຄ່າແຮງງານກຳມະກອນ 50 ພັນກີບຕໍ່ຄົນຕໍ່ມື້, ນາຍຊ່າງ 1 ແສນກີບຕໍ່ຄົນຕໍ່ມື້. ນອກນັ້ນແນໃສ່ເຮັດໂຄງການໄດ້ດຳເນີນໄປຕາມຮູບແບ ບ, ມີຄຸນນະພາບ ແລະຍືນຍົງຊຶ່ງບັນດາຂະແໜງການທີ່ກ່ຽວຂ້ອງຈະໄດ້ຕິດຕາມຢ່າງໃກ້ຊິດຮ່ວມກັບຊຸມຊົນເປັນຕົ້ນ: ຂະແໜງກະສິກຳ ແລະ ປ່າໄມ້. ເມື່ອ ໂຄງການນີ້ສຳເລັດຈະໄດ້ຖອດຖອນເອົາບົດຮຽນ ແລະ ສືບຕໍ່ນຳໄປຈັດຕັ້ງປະຕິບັດໃນກຸ່ມບ້ານອື່ນໆໂດຍແນໃສ່ກະຈາຍລາຍໄດ້ໃຫ້ກັບຄອບຄົວ, ຊຸມຊົນໂດຍສະເພາະແມ່ນຄອບຄົວຜູ້ທີ່ທຸກຍາກທີ່ສຸດຄຽງຄູ່ກັນນັ້ນໂຄງການຍ່ອຍຕ່າງໆຂອງ ທລຍ ຕອບສະໜອງຮັບໃຊ້ຄອບຄົວຜູ້ທີ່ທຸກຍາກເປັນສ່ວນໃຫຍ່ເພື່ອແກ້ ໄຂ, ຫຼຸດຜ່ອນຄວາມທຸກຍາກໃຫ້ພໍ່ແມ່ປະຊາຊົນ. ໂຄງການດັ່ງກ່າວຈະໄດ້ຈັດຊື້ວັດສະດຸຕ່າງໆ ມູນຄ່າ 112 ລ້ານກວ່າກີບ ແລະຄ່າແຮງງານນາຍຊ່າງ-ກຳມະ ກອນ 13 ລ້ານກວ່າກີບ, ການຂົນສົ່ງວັດສະດຸ ແລະການ ບໍລິການອື່ນໆອີກຈຳນວນໜຶ່ງ, ຊື່ງລ້ວນແລ້ວແມ່ນປະຊາຊົນພາຍ ໃນບ້ານເປັນຜູ້ຈັດການ.

  ນາງ ລັດຕະນາ ໄຊເພີນຄຳ ທີມງານການເງິນບ້ານກາເລັງໃຫ້ຮູ້ວ່າ: ໂຄງການດັ່ງກ່າວນອກຈາກຈະເຮັດໃຫ້ຊຸມຊົນເປັນເຈົ້າການແລ້ວ, ຍັງສ້າງຄວາມເຂັ້ມ ແຂງໃຫ້ກັບບ້ານກັບປະຊາຊົນ ແລະມີສິດໜ້າທີ່ໃນການປະຕິບັດ ໂຄງການຍ່ອຍຂອງ ທລຍ ທີ່ປະ ຊາຊົນເປັນເຈົ້າຂອງໂຄງການ, ເປັນຜູ້ປະຕິບັດ ແລະເປັນຜູ້ນຳໃຊ້ ຜົນປະໂຫຍດ, ທັງໄດ້ຮຽນຮູ້ວິທີ ການວາງແຜນ, ການບໍລິການຈັດ ການ ຄຽງຄູ່ກັນນັ້ນປະຊາຊົນຍັງ ຈະໄດ້ຄ່າແຮງງານ ເພື່ອຈູນເຈືອລາຍໄດ້ເພີ່ມຕື່ມໃຫ້ກັບຄອບຄົວ. ສຳລັບການຈັດຕັ້ງປະຕິບັດແມ່ນມີຄວາມພ້ອມ 100% ແລະ ໄດ້ແບ່ງ ຄວາມຮັບຜິດຊອບຢ່າງລະອຽດພາຍໃນບ້ານ.

  ຊຶ່ງໃນວັນທີ 28 ກຸມພາ 2019 ນີ້, ກອງທຶນຫຼຸດຜ່ອນຄວາມທຸກຍາກສູນກາງ, ແຂວງ ແລະເມືອງໄດ້ລົງຕິດຕາມ ແລະສອບຖາມຂໍ້ມູນວິທີການບໍລິຫານ, ຈັດຕັ້ງປະຕິບັດ ແລະຄວາມພ້ອມຂອງຊຸມຊົນ, ນຳໂດຍ: ທ່ານ ແສງເພັດ ວັນນະວົງ ຫົວໜ້າຂະແໜງພັດທະນາຊຸມຊົນ ທລຍ ຂັ້ນສູນກາງພ້ອມດ້ວຍຄະນະໄດ້ເຄື່ອນໄຫວຢ້ຽມຢາມການຈັດຕັ້ງປະຕິບັດໂຄງການຍ່ອຍຢູ່ເມືອງສະໝ້ວຍ ແລະຕະໂອ້ຍ.

ຂ່າວ: ວິໄລວອນ ສິດທິໄຊ

แชร์