ຈະໃຊ້ທຶນ 9 ຕື້ໂດລາ ພັດທະນາໂຄງການເຂດເສດຖະກິດໃໝ່ສີທັນດອນ

   ວັນທີ 20 ພຶດສະພາ 2021, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກພ້ອມຄະນະໄດ້ລົງເຄື່ອນໄຫວຕິດຕາມຊຸກຍູ້ໂຄງການເຂດພັດທະນາເສດຖະກິດໃໝ່ສີທັນດອນ, ເມືອງໂຂງ, ແຂວງຈໍາປາສັກ ໂດຍມີທ່ານ ສາຍທອງ ໄຊຍະວົງ ປະທານສະພາປະຊາຊົນແຂວງ, ມີທ່ານຮອງເຈົ້າແຂວງຈຳປາສັກ, ບັນດາການນຳພະແນກການຂອງແຂວງ ແລະເມືອງໂຂງ, ຄະນະຄຸ້ມຄອງເຂດເສດຖະກິດພິເສດແຂວງຈຳປາສັກມີພາກສ່ວນກ່ຽວຂ້ອງເຂົ້າຮ່ວມ.

  ທ່ານ ວິນເຊັນ ລີ ປະທານບໍລິສັດ ຮ່ວມພັດທະນາສີທັນດອນ ຈຳກັດ ໄດ້ລາຍງານໃຫ້ຮູ້ວ່າ: ໂຄງການດັ່ງກ່າວແມ່ນມີມູນຄ່າການລົງທຶນທັງໝົດ: 9 ຕື້ໂດລາສະຫະ ລັດ, ໃນນັນເປັນການລົງທຶນໃສ່ການກໍ່ສ້າງພື້ນຖານໂຄງລ່າງມູນຄ່າ 1,3 ຕື້ໂດລາສະຫະລັດ ທີ່ເປັນການລົງທຶນຂອງຜູ້ພັດທະນາໃນເນື້ອທີ່ໂຄງການ 9.848 ເຮັກຕາ.

  ໃນທັງໝົດນັ້ນ 2.775 ເຮັກຕາ ແມ່ນເປັນເນື້ອທີ່ເກາະດອນຕ່າງໆ ມີ 7 ກິດຈະການ ຄື: 1) ໂຄງການກໍ່ສ້າງໂຄງລ່າງພື້ນຖານພາຍໃນເຂດ; 2) ໂຄງການສ້າງ ແຫຼ່ງທ່ອງທ່ຽວ; 3) ໂຄງການສ້າງທະນາຄານ, ສະຖາບັນການເງິນ; 4) ໂຄງການກໍ່ສ້າງພື້ນຖານໂຄງລ່າງດ້ານການສຶກສາ, ສາທາລະນະສຸກ, ພັດທະນາບຸກ ຄະລາກອນ ແລະສີມືແຮງງານ; 5) ໂຄງການບໍລິການແຫຼ່ງທ່ອງທ່ຽວ, ໂຮງ ແຮມ, ຮ້ານອາຫານ, ສະຖານທີ່ພັກ, ສະໜາມກີລາ; 6) ໂຄງການສ້າງແຫຼ່ງບັນ ເທີງ, ກິດຈະການກາຊີໂນ ແລະ 7) ກິດຈະການຕ່າງໆທີ່ບໍ່ສົ່ງຜົນກະທົບຕໍ່ສິ່ງແວດລ້ອມ.

  ສຳລັບຄວາມຄືບໜ້າໃນການຈັດຕັ້ງປະຕິບັດໂຄງການປະຈຸບັນໄດ້ສໍາເລັດການເຮັດບົດປະເມີນຜົນກະທົບຕໍ່ສີ່ງແວດລ້ອມໂດຍລວມຂອງໂຄງການ, ໄດ້ອອກແບບໃນຂັ້ນເບື້ອງຕົ້ນບັນດາກິດຈະການຕ່າງໆທີ່ຢູ່ໃນໄລຍະທີ1, ສໍາເລັດການກໍ່ສ້າງເສັ້ນທາງເບຕົງອ້ອມດອນໂຂງໄລຍະ 43 ກິໂລແມັດ ແລະໄດ້ແຕ່ງຕັ້ງຄະນະຮັບຜິດຊອບການທົດແທນຄ່າເສຍຫາຍ ແລະການຈັດສັນຍົກຍ້າຍປະຊາຊົນ ແລະໜ້າວຽກອື່ນໆ.

  ໂອກາດນີ້, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກໄດ້ມີຄຳເຫັນຊີ້ນຳໃຫ້ບໍລິສັດຜູ້ພັດທະນາ ແລະພະແນກການກ່ຽວຂ້ອງຕ້ອງໄດ້ປະສານສົມທົບໃຫ້ການຮ່ວມມືແຜນແມ່ບົດການພັດທະນາໂຄງການ (Master Plan) ຢ່າງເປັນປົກກະຕິໃຫ້ມີຄວາມຄືບໜ້າຫຼາຍກວ່າເກົ່າໂດຍສະເພາະແຜນຈັດຕັ້ງປະຕິບັດການພັດທະນາໂຄງ ການໃນໄລຍະທີ 1 ເພື່ອປະກອບສ່ວນເຂົ້າໃນການພັດທະນາແຂວງຈຳປາສັກບົນພື້ນຖານຜົນສຳເລັດຂອງສາຍພົວພັນລາວ-ຈີນ ພາຍໃຕ້ການຊີ້ນຳນຳພາຍຸດທະສາດລະຫວ່າງການນຳຂັ້ນສູງຂອງສອງປະເທດຮ່ວມກັນສູ້ຊົນຢ່າງບໍ່ລົດລະເພື່ອຊຸກຍູ້ການຮ່ວມກັນສ້າງຄູ່ຮ່ວມຊາຕາກຳຈີນ-ລາວ.

  ຈາກນັ້ນ, ທ່ານເຈົ້າແຂວງຈຳປາສັກພ້ອມຄະນະໄດ້ລົງຕິດຕາມໂຄງການກໍ່ສ້າງອາຄານຮຽນ ແລະສະໂມສອນໂຮງຮຽນປະຖົມບ້ານຂີ້ນາກແມ່ນເປັນໂຄງການໃຫ້ການຊ່ວຍເຫຼືອລ້າຂອງບໍລິສັດ ຮ່ວມພັດທະນາສີທັນດອນຈຳກັດ ມູນຄ່າການລົງທຶນ 1 ແສນກວ່າໂດລາສະຫະລັດ. ໂຄງການກໍ່ສ້າງໂຮງຮຽນປະຖົມບ້ານຂີ້ນາກແມ່ນໄດ້ວາງສີລາລືກເມື່ອວັນທີ 19 ມີນາ 2021 ຜ່ານມານີ້ ແລະປະຈຸບັນເຫັນວ່າມີຄວາມຄືບໜ້າຫຼາຍສົມຄວນແລ້ວ.

ຂ່າວ: ທັດຊະນະ

แชร์