ປະທານປະເທດ ສຳເລັດຮ່ວມກອງປະຊຸມສາກົນອະນາຄົດອາຊີ

   ວັນທີ 21 ພຶດສະພາ 2021 ທີ່ນະຄອນຫຼວງວຽງຈັນ, ທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ ໄດ້ຂຶ້ນກ່າວປາໄສໃນກອງປະຊຸມສາກົນວ່າດ້ວຍ ອະນາຄົດຂອງອາຊີ ຄັ້ງທີ 26 ພາຍໃຕ້ຫົວຂໍ້: “ການສ້າງຍຸກສະໄໝຫຼັງໂຄວິດ-19: ບົດບາດຂອງອາຊີໃນການຟື້ນຕົວຂອງໂລກ” (Shaping the post-COVID era: Asia’s role in the global recovery), ຊຶ່ງໄດ້ຈັດ ຂຶ້ນທີ່ປະເທດຍີ່ປຸ່ນໂດຍສໍານັກຂ່າວໜັງສືພິມເສດຖະກິດຍີ່ປຸ່ນ (NIKKEI) ໃນຮູບແບບທາງໄກໂດຍເຂົ້າຮ່ວມເປັນປະທານຂອງ ທ່ານ ສຶໂຢຊິ ຮາເຊເບະ ປະທານສໍານັກໜັງສືພິມ NIKKEI ແລະພາກສ່ວນທຸລະກິດຕ່າງໆຂອງຍີ່ປຸ່ນເຂົ້າຮ່ວມ. 

   ໃນບົດກ່າວປາໄສທ່ານ ທອງລຸນ ສີສຸລິດ ຍົກໃຫ້ເຫັນເຖິງບັນຫາທີ່ພົ້ນເດັ່ນຂອງໂລກ ແລະສິ່ງທ້າທາຍທີ່ພວກເຮົາກໍາລັງປະເຊີນຢູ່ໃນປະຈຸບັນ, ພ້ອມທັງຍົກໃຫ້ເຫັນເຖິງການວາງແຜນທີ່ມີລັກສະນະຍຸດທະສາດຮ່ວມກັນເພື່ອຮັບມືກັບສິ່ງທ້າທາຍຕ່າງໆ ພາຍຫຼັງໂຄວິດ-19, ບົດບາດຄວາມສໍາຄັນຂອງອາຊີໃນການຟື້ນຟູເສດຖະກິດ-ສັງຄົມຂອງໂລກ ແລະການເພີ່ມທະວີການຮ່ວມມືທີ່ມີຄຸນນະພາບເພື່ອການພັດທະນາທີ່ສອດຄ່ອງກັບຍຸກສະໄໝໃໝ່ດ້ວຍຄວາມຮັບຜິດຊອບຮ່ວມກັນ.

   ພ້ອມກັນນີ້, ທ່ານຍັງໄດ້ຍົກໃຫ້ເຫັນເຖິງບົດບາດຂອງ ສປປ ລາວ ໃນການປະກອບສ່ວນຮ່ວມມືຢ່າງຕັ້ງໜ້າເຂົ້າໃນຂະບວນການລວມເພື່ອກຽມພ້ອມ ແລະຮັບມືກັບວິກິດການຕ່າງໆ ໃນປະຈຸບັນ ແລະອາດເກີດຂຶ້ນໃໝ່ແນໃສ່ປົກປັກຮັກສາສັນຕິພາບ, ສະຖຽນລະພາບ ແລະສ້າງເງື່ອນໄຂອັນສະດວກໃຫ້ແກ່ການພັດທະນາຮ່ວມກັບວົງຄະນະຍາດສາກົນ ແລະກໍ່ໄດ້ຖືໂອກາດສະແດງຄວາມຂອບໃຈຕໍ່ປະເທດເພື່ອນມິດ, ບັນດາຄູ່ຮ່ວມພັດທະນາ ແລະອົງການຈັດຕັ້ງສາກົນທີ່ໄດ້ໃຫ້ການຊ່ວຍເຫຼືອແກ່ ສປປ ລາວ ເພື່ອສະກັດກັ້ນ, ຄວບຄຸມ ແລະແກ້ໄຂການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ ແລະການພື້ນຟູເສດຖະກິດຫຼັງວິກິດການດັ່ງກ່າວ.

ກອງປະຊຸມດັ່ງກ່າວເປັນຄັ້ງທີ 5 ທີ່ທ່ານ ທອງລຸນ ສີສຸລິດ ໄດ້ເຂົ້າຮ່ວມນັບແຕ່ເຄີຍດໍາລົງຕໍາແໜ່ງເປັນຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແລະນາຍົກລັດຖະມົນຕີແຫ່ງ ສປປ ລາວ, ເຊິ່ງການປາໄສແຕ່ລະຄັ້ງໄດ້ສະແດງໃຫ້ເຫັນເຖິງວິໄສທັດທີ່ສອດຄ່ອງກັບສະພາບການຕົວຈິງ ແລະປິ່ນອ້ອມຫົວຂໍ້ຂອງກອງປະຊຸມໃນແຕ່ລະຄັ້ງ. ພ້ອມນີ້, ຍັງເປັນການປະກອບສ່ວນເຂົ້າໃນການຮັດແໜ້ນສາຍພົວພັນມິດຕະພາບ ແລະການຮ່ວມມືອັນດີງາມທີ່ມີມາແຕ່ດົນນານກໍຄືການເປັນຄູ່ຮ່ວມມືຍຸດທະສາດລະຫວ່າງ ສປປ ລາວ ແລະຍີ່ປຸ່ນໃຫ້ກວ້າງຂວາງແໜ້ນແຟ້ນ ແລະເລິກເຊິ່ງຂຶ້ນກວ່າເກົ່າ.

ຂ່າວ: ມະນີທອນ

แชร์