ສະຕາໂທລະຄົມ ສາຂາແຂວງບໍລິຄໍາໄຊ ຊ່ວຍແຂວງປ້ອງກັນໂຄວິດ

  ວັນທີ 19 ພຶດສະພາ 2021 ທີ່ຫ້ອງວ່າການແຂວງບໍລິຄໍາໄຊ, ທ່ານ ນາງ ດາວວອນ ເພັດສານຸພົນ ອໍານວຍການ ບໍລິສັດ ສະຕາໂທລະຄົມ (ຢູນິເທວ) ສາຂາແຂວງບໍລິຄໍາໄຊ ພ້ອມດ້ວຍຄະນະໄດ້ປະກອບສ່ວນຊຸກຍູ້ມອບມູນຄ່າໂທ ແລະ ດາຕ້າອິນເຕີເນັດລວມມູນຄ່າທັງໝົດ 216,89 ລ້ານກີບ, ໃຫ້ 2 ໜ່ວຍງານຂອງຄະນະສະ ເພາະກິດປ້ອງກັນໂຄວິດ-19 ຂອງແຂວງ ແລະແຈກຢາຍໃຫ້ຄະນະສະເພາະກິດປ້ອງກັນໂຄວິດ-19 ຂອງ 7 ຕົວເມືອງ, ນໍາໃຊ້ເຂົ້າໃນການປ້ອງກັນ, ຕ້ານສະກັດກັ້ນການແຜ່ລະບາດຂອງພະຍາດໂຄວິດ-19, ຕາງໜ້າກ່າວຮັບ ແລະມອບກຽດຕິຄຸນໂດຍທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊຫົວໜ້າຄະນະສະເພາະກິດປ້ອງກັນ, ຕ້ານສະກັດກັ້ນການແຜ່ລະບາດຂອງເຊື້ອພະຍາດໂຄວິດ-19 ຂັ້ນແຂວງ, ມີພາກສ່ວນທີ່ກ່ຽວຂ້ອງ 2 ຝ່າຍເຂົ້າຮ່ວມເປັນສັກສີພິຍານ.

    ທ່ານ ນາງ ດາວວອນ ເພັດສານຸພົນ ກ່າວວ່າ: ຍ້ອນເຫັນໄດ້ຄວາມໝາຍຄວາມສໍາຄັນຂອງວຽກງານປ້ອງກັນ, ຕ້ານສະກັດກັ້ນການແຜ່ລະບາດຂອງພະຍາດໂຄວິດ-19 ຈຶ່ງໄດ້ນໍາເອົາມູນຄ່າໂທ ແລະດາຕ້າອິນເຕີເນັດ ລວມມູນຄ່າ 216,8 ລ້ານກີບມາມອບໃຫ້ຄະນະສະເພາະກິດປ້ອງກັນ, ຕ້ານສະກັດກັ້ນການແຜ່ລະບາດຂອງເຊື້ອພະຍາດ ໂຄວິດ-19 ຂັ້ນແຂວງ ແລະ 07 ເມືອງພາຍໃນແຂວງ, ໃນນັ້ນຈະ ມອບໃຫ້ແຕ່ລະໜ່ວຍງານຈໍານວນ 24,09 ລ້ານກີບ, ນໍາໃຊ້ຟຣີໄລຍະ 8 ເດືອນ, ເລີ່ມແຕ່ເດືອນພຶດສະພາ ຫາ ເດືອນທັນວາ 2021, ເພື່ອນໍາໃຊ້ເຂົ້າໃນວຽກງານປ້ອງກັນ, ຕ້ານສະກັດກັ້ນການແຜ່ລະບາດຂອງເຊື້ອພະຍາດໂຄວິດ-19 ໃຫ້ມີການຫຼຸດໜ້ອຍຖອຍລົງ ແລະໝົດໄປເທື່ອລະກ້າວ.

  ໂອກາດດຽວກັນ ທ່ານ ບຸນເສັງ ປະທຳມະວົງ ກໍ່ໄດ້ມອບໃບກຽດຕິຄຸນ ແລະກ່າວສະແດງຂອບໃຈທາງອໍານວຍການບໍລິສັດສະຕາໂທລະຄົມສາຂາແຂວງບໍລິຄໍາໄຊພ້ອມດ້ວຍຄະນະທີ່ໄດ້ນໍາເອົາມູນ ຄ່າໂທ ແລະດາຕ້າອິນເຕີເນັດມາ ມອບໃຫ້ໃນຄັ້ງນີ້, ແລະຈະນໍາໃຊ້ເຂົ້າໃນວຽກງານປ້ອງກັນ, ຕ້ານສະກັດກັ້ນການແຜ່ລະບາດຂອງເຊື້ອພະຍາດໂຄວິດ-19 ບໍ່ໃຫ້ແຜ່ລະບາດເປັນວົງກວ້າງຢູ່ພາຍໃນ ແຂວງບໍລິຄໍາໄຊ ແລະຈະນໍາໃຊ້ໃຫ້ເກີດປະໂຫຍດສູງສຸດແນໃສ່ເຮັດໃຫ້ແຂວງບໍລິຄໍາໄຊມີຄວາມສະຫງົບ, ມີຄວາມເປັນລະບຽບຮຽບຮ້ອຍ ແລະອວຍພອນໃຫ້ທ່ານພ້ອມດ້ວຍຄະນະຈົ່ງມີສຸຂະພາບແຂງແຮງ, ມີຄວາມສຸກໃນຊີວິດສ່ວນຕົວ ແລະຄອບຄົວ, ການດໍາເນີນທຸລະກິດຄ້າຂາຍກໍ່ຂໍໃຫ້ມີຄວາມຈະເລີນກ້າວໜ້າຢ່າງບໍ່ຢຸດຢັ້ງ.

ຂ່າວ: ພອນສະຫວັນ 

แชร์