ສະຫວັນຫາລືມາດຕະການຜ່ອນຜັນກັນໂຄວິດ

   ວັນທີ 20 ພຶດສະພາ 2021 ທີ່ຫ້ອງວ່າການແຂວງສະຫວັນນະເຂດໄດ້ຈັດກອງປະຊຸມປຶກສາຫາລືກ່ຽວກັບມາດຕະການຜ່ອນຜັນການຈັດຕັ້ງປະຕິບັດຕາມຄຳສັ່ງເລກທີ 15/ນຍ ລົງວັນທີ 21 ເມສາ 2021 ແລະຄຳສັ່ງຂອງທ່ານເຈົ້າແຂວງສະຫວັນນະເຂດສະບັບ ເລກທີ 0776/ຈຂ.ສຂ ລົງວັນທີ 24 ເມສາ 2021 ໂດຍການເປັນປະທານຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ທ່ານຮອງເລຂາພັກແຂວງ, ຮອງເຈົ້າແຂວງ, ເຈົ້ານະຄອນ, ເຈົ້າເມືອງ ແລະຫົວໜ້າ ພະແນກການ, ກົມກອງອ້ອມຂ້າງແຂວງເຂົ້າຮ່ວມຢ່າງພ້ອມພຽງ.

   ທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດທັງເປັນປະທານຄະນະສະເພາະກິດປ້ອງກັນ, ຄວບຄຸມ, ສະກັດກັ້ນ ແລະແກ້ໄຂການລະບາດພະ ຍາດໂຄວິດ-19 ຂັ້ນແຂວງໄດ້ລາຍງານໂດຍຫຍໍ້ໃນຈັດຕັ້ງປະຕິບັດກ່ຽວກັບການຕ້ານ,ສະກັດກັ້ນການ ແຜ່ລະບາດພະຍາດໂຄວິດ-19 ຜ່ານມາຊຶ່ງການລະບາດພະຍາດໂຄວິດ 19 ໃນຊຸມຊົນທີ່ແຂວງສະຫວັນນະເຂດແມ່ນໄດ້ເລີ່ມແຕ່ວັນທີ 22 ເມສາ ຮອດວັນທີ 7 ພຶດສະພາ 2021 ມາຮອດປະຈຸບັນແມ່ນຍັງບໍ່ພົບຜູ້ຕິດເຊື້ອໃນຊຸມຊົນເປັນເວລາ 11 ວັນແລ້ວ.

 ສຳລັບການລະບາດໃນຮອບໃໝ່ (ໄລຍະທີ 2 ) ແມ່ນມີຜູ້ຕິດເຊື້ອສະສົມທັງໝົດ 69 ຄົນ ໃນນີ້ຕິດເຊື້ອໃນຊຸມຊົນ 26 ຄົນ ແລະແຮງງານມາຈາກປະເທດໄທຈຳນວນ 43 ຄົນ ໃນຕົວເລກດັ່ງກ່າວແມ່ນນັບແຕ່ວັນທີ 17 ເມສາ ຫາ ວັນທີ 19 ພຶດສະພາ.

  ຈາກນັ້ນ ທ່ານ ທອງໃສ ໄຊຍະວົງຄຳດີ ຫົວໜ້າຫ້ອງວ່າການປົກຄອງແຂວງກໍ່ໄດ້ລາຍງານໃຫ້ຮູ້ວ່າ: ຜ່ານມາຄະນະສະເພາະກິດຂັ້ນແຂວງໄດ້ເອົາໃຈໃສ່ປະຕິບັດຕາມແຈ້ງການເລກທີ 15/ນຍ ຢ່າງເຂັ້ມງວດໂດຍການຜັນຂະຫຍາຍຄຳສັ່ງດັ່ງກ່າວທາງການນຳຂອງແຂວງກໍ່ໄດ້ອອກຄຳສັ່ງເພີ່ມຕື່ມເພື່ອສືບຕໍ່ລັອກດາວແຂວງສະຫວັນນະເຂດເປັນຄັ້ງທີ 2 ນັບແຕ່ວັນທີ 10 ຫາ ວັນທີ 20 ພຶດສະພາ 2021 ແລະໄດ້ມີການກຳນົດມາດຕະການໃນການປ້ອງກັນ, ຄວບຄຸມ ແລະ ສະກັດກັ້ນການແຜ່ລະ ບາດພະຍາດໂຄວິດ-19 ໃນທົ່ວແຂວງຢ່າງເຂັ້ມງວດ, ໄດ້ເພີ່ມທະວີເອົາໃຈໃສ່ນຳໃຊ້ສື່ມວນຊົນ ແລະສື່ອອນລາຍຕ່າງໆໃນການໂຄສະນາປະຊາສຳພັນໃຫ້ປະຊາຊົນບັນດາເຜົ່າໄດ້ເຂົ້າໃຈ ແລະມີສະຕິລະວັງຕົວຕໍ່ພະຍາດດັ່ງກ່າວເອົາໃຈໃສ່ປຸກລະດົມປະຊາຊົນ, ພະນັກງານ, ທະຫານ, ຕຳຫຼວດອ້ອມຂ້າງແຂວງ ແລະເມືອງໃຫ້ໄປຮັບວັກແຊງປ້ອງກັນພະຍາດໂຄວິດ-19 ຕາມຈຸດທີ່ຄະນະສະເພາະກິດກຳນົດໃຫ້.

  ສ້າງສູນປະຕິບັດງານ ແລະອຳນວຍຄວາມສະດວກຂອງຄະນະສະເພາະກິດຂັ້ນແຂວງຂຶ້ນຢູ່ທີ່ສະໂມສອນຫ້ອງວ່າການປົກຄອງ ແຂວງເພື່ອອຳນວຍຄວາມສະດວກໃນການອອກໜັງສືອະນຸຍາດເດີນທາງໄປຕ່າງແຂວງ, ຕ່າງເມືອງທັງເປັນສູນປະສານງານຮັບເອົາການຊ່ວຍເຫຼືອຈາກສັງຄົມທີ່ປະກອບສ່ວນເຂົ້າໃນບັ້ນຕອບຕ້ານການລະ ບາດພະຍາດໂຄວິດ-19.

   ພ້ອມນີ້ ທ່ານ ທອງໃສ ໄຊຍະວົງຄຳດີ ກໍ່ຍັງໄດ້ຜ່ານຮ່າງແຈ້ງການວ່າດ້ວຍການສືບຕໍ່ປະຕິບັດມາດຕະການໃນການປ້ອງກັນ, ຄວບຄຸມ, ສະກັດກັ້ນ ແລະແກ້ໄຂການລະບາດຂອງພະຍາດໂຄວິດ-19 ໃນໄລຍະແຕ່ວັນທີ 21–30 ພຶດສະພາ2021 ແລະບັນດາທ່ານຜູ້ທີ່ເຂົ້າຮ່ວມກອງປະຊຸມກໍ່ໄດ້ພ້ອມກັນປະກອບຄຳຄິດຄຳເຫັນໃສ່ຮ່າງແຈ້ງການສະບັບດັ່ງກ່າວເພື່ອໃຫ້ມີເນື້ອໃນຄົບຖ້ວນຂຶ້ນຕື່ມອີກ.

แชร์