ປີນີ້, ລາວມີແຜນສັກຢາກັນໂຄວິດໃຫ້ໄດ້ 50%

  ປະຈຸບັນເຊື້ອພະຍາດໂຄວິດ-19 ກໍາລັງແຜ່ລະບາດເປັນບໍລິເວນກວ້າງໄປທົ່ວໂລກຊຶ່ງໄດ້ສົ່ງຜົນກະທົບຢ່າງຮ້າຍແຮງຕໍ່ຊີວິດ, ລະບົບເສດຖະກິດ ແລະຊີວິດການເປັນຢູ່ຂອງຊາວໂລກ;ສະເພາະຢູ່ ສປປ ລາວ ກໍ່ຮັບຜົນກະທົບຈາກການແຜ່ລະບາດຂອງພະຍາດດັ່ງກ່າວ; ສະນັ້ນ, ເພື່ອຮັບປະກັນສຸຂະພາບ ແລະຊີວິດ-ຊັບສິນຂອງປະຊາຊົນໃຫ້ດໍາລົງຊີວິດປົກກະຕິແບບໃໝ່ນັ້ນ, ລັດຖະບານເຮົານອກຈາກຈະມີການເຝົ້າລະວັງບໍ່ໃຫ້ເຊື້ອພະຍາດດັ່ງກ່າວແຜ່ລະບາດໃຫຍ່ນັ້ນຈຶ່ງມີຄວາມຈໍາເປັນໃນການພະຍາ ຍາມຂົນຂວາຍ, ຊອກຫາວັກແຊງກັນພະຍາດໂຄວິດ-19 ຈາກບັນດາປະເທດເພື່ອນມິດ ແລະອົງການຈັດຕັ້ງສາກົນມາສັກໃຫ້ປະຊາຊົນລາວບັນດາເຜົ່າ.

 ໃນກອງປະຊຸມທາງໄກລະຫວ່າງນາຍົກລັດຖະມົນຕີຮ່ວມກັບຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ຂັ້ນສູນກາງ ແລະທ້ອງຖິ່ນໃນທົ່ວປະເທດ ຄັ້ງວັນທີ 17 ພຶດສະພາ 2021 ຜ່ານມາໄດ້ໃຫ້ຮູ້ວ່າ: ຂະນະນີ້; ສປປ ລາວ ໄດ້ຮັບວັກແຊງທັງໝົດ 1.536.000 ໂດສ ໃນນີ້ມີ Sinopharm 1.402.000 ໂດສ, Astra Zeneca 133.000 ໂດສ, Sputnik 1.000 ໂດສ ແລະໄດ້ແຈກຢາຍໄປແລ້ວ 1.225.600 ໂດສ; ວັກແຊງທີ່ຍັງເຫຼືອໃນຂັ້ນສູນກາງເພື່ອສັກເຂັມ 2 ຈໍານວນ 270.500 ໂດສ, ສ່ວນທີ່ເຫຼືອເຂັມ 1 ຈໍານວນ 41.900 ໂດສ, ຈະສືບຕໍ່ສັກໃຫ້ໝົດໃນເດືອນ 6-7/ 2021 ທັງເຂັມ 1 ແລະເຂັມ 2.

   ມາຮອດວັນທີ 13 ພຶດສະພາ 2021, ໄດ້ສັກວັກແຊງໃຫ້ກຸ່ມເປົ້າໝາຍ ແລະປະຊາຊົນທົ່ວໄປໃນທົ່ວປະເທດ ໂດສທີ 1 ໄດ້ 493.481 ຄົນ ແລະ ໂດສທີ 2 ໄດ້ 89.266 ຄົນ. ອີງຕາມຂໍ້ມູນຈາກສູນຂ່າວສານການແພດສຸຂະສຶກສາກະຊວງສາທາລະນະສຸກໃນວັນທີ 17 ພຶດສະພາ 2021 ຜ່ານມາວ່າ: ໃນທົ່ວປະເທດມີຈໍານວນຜູ້ທີ່ໄດ້ຮັບການສັກວັກແຊງກັນພະຍາດໂຄວິດ-19 ເຂັມທີ 1 ມີ 542.132 ໂດສ ແລະຈໍານວນໄດ້ຮັບເຂັມທີ 2 ມີ 92.582 ໂດສ ແລະຍັງມີແຜນວຽກຈຸດສຸມໃນຕໍ່ໜ້າໂດຍສະເພາະໝົດປີ 2021 ມີຄາດໝາຍສັກຢາວັກແຊງໃຫ້ໄດ້ກວມ 50% ຂອງພົນລະເມືອງທັງໝົດ ຫຼືເທົ່າກັບ 3.700.000 ຄົນ. ສະນັ້ນ, ເພື່ອບັນລຸເປົ້າໝາຍດັ່ງກ່າວຈຶ່ງມີຄວາມຈໍາເປັນຕ້ອງສັກວັກແຊງໃຫ້ໄດ້ 33.350 ຄົນຕໍ່ມື້, ໃຊ້ບຸກຄະລາກອນແພດຈຳນວນ 1.710 ຄົນ ແລະຈັດຕັ້ງປະຕິບັດຈຳນວນ 432 ຈຸດສັກຢາໃນທົ່ວປະເທດ.

  ດັ່ງນັ້ນ, ຈຶ່ງຮຽກຮ້ອງມາຍັງພະນັກງານ, ທະຫານ, ຕໍາຫຼວດ, ນັກຮຽນ-ນັກສຶກສາ ຈົ່ງພ້ອມກັນໄປສັກວັກແຊງກັນພະຍາດໂຄວິດ-19 ຊຶ່ງການສັກຢາວັກແຊງນີ້ມັນຈະມີພູມຄຸ້ມກັນຢູ່ໃນຮ່າງກາຍເຮັດໃຫ້ສຸຂະພາບດີກ່ວາຜູ້ທີ່ບໍ່ໄດ້ສັກ; ສະນັ້ນ, ຮັກຊີວິດ, ຮັກຄອບຄົວ ແລະຮັກສັງຄົມຕ້ອງໄປສັກຢາວັກແຊງກັນພະຍາດໂຄວິດ-19; ສັກຢາໃນມື້ນີ້ດີກ່ອນມື້ຕໍ່ໄປເພາະໂຄວິດສາຍພັນໃໝ່ມັນຮ້າຍແຮງທີ່ສຸດ, ມັນບໍ່ເລືອກເພດ-ໄວ, ຖານະໃນສັງຄົມ, ບໍ່ເລືອກໜ້າທີ່ຕໍາແໜ່ງ, ຄົນລວຍ ຫຼືຈົນ, ງາມ ຫຼືບໍ່ກໍ່ມີສິດລົ້ມປ່ວຍ ຫຼື ເສຍຊີວິດຫຼາຍກ່ວາຄົນທີ່ສັກວັກແຊງຄົບກໍານົດ; ສໍາລັບ, ນະຄອນຫຼວງວຽງຈັນ ມີ 7 ຈຸດຫຼັກບໍລິການ ຄື: ໂຮງໝໍມະໂຫສົດ, ໂຮງໝໍມິດຕະພາບ 150 ຕຽງ, ໂຮງໝໍເດັກ 150 ຕຽງ,ໂຮງໝໍແມ່ ແລະເດັກ (ໜອງພະຍາ), ບັນດາໂຮງໝໍຊຸມຊົນຂອງເມືອງ, ວັດຈີນບ້ານດົງປາແລບ ເມືອງຈັນທະບູລີ ແລະມະຫາວິທະຍາໄລສຸຂະພາບ (ດົງໂພສີ) ຫຼືວ່າ: ເພື່ອຄວາມແນ່ນອນກະລຸນາໂທສອບຖາມສູນຂ່າວສານການແພດສຸຂະສຶກສາ; ສາຍດ່ວນ 165 ຫຼື 166.

ໂດຍ: ຣັດສະໝີ ດວງສັດຈະ

แชร์