ປີນີ້ລາວຕັ້ງເປົ້າປູກໄມ້ໃຫ້ເປັນປ່າ 36,95 ພັນເຮັກຕາ

   ເນື່ອງໃນໂອກາດວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ 2021 ທ່ານ ເພັດ ພົມພິພັກ ລັດຖະມົນຕີກະຊວງກະສິກໍາ ແລະປ່າໄມ້ໄດ້ອອກຖະແຫຼງການສຳຄັນບາງຕອນວ່າ: ພັກ ແລະລັດຖະບານໄດ້ກໍານົດເອົາວັນທີ 1 ມິຖຸນາ ເປັນວັນປູກຕົ້ນໄມ້ແຫ່ງຊາດ ແລະກົງກັບວັນເດັກນ້ອຍສາກົນນັບແຕ່ວັນທີ 1 ມິຖຸນາ 1980 ມາຮອດປີນີ້ແມ່ນຄົບຮອບ 41 ປີ ພວກເຮົາໄດ້ຖືເອົາວັນສໍາຄັນດັ່ງກ່າວນີ້ເປັນມື້ເລີ່ມຕົ້ນສ້າງຂະບວນການຕ່າງໆກ່ຽວກັບວຽກງານປ່າໄມ້ເພື່ອປູກຈິດສໍານຶກໃຫ້ແກ່ເຍົາວະຊົນ ແລະອະນຸຊົນຮຸ່ນຫຼັງກໍຄືທົ່ວສັງຄົມໃຫ້ເຫັນໄດ້ຄວາມສໍາຄັນຂອງປ່າໄມ້, ການປົກປັກຮັກສາ, ພັດທະນາ ແລະນໍາໃຊ້ປ່າໄມ້ໃຫ້ມີຄວາມຍືນຍົງ.

   ຄືດັ່ງທີ່ພວກເຮົາຮູ້ວ່າປ່າໄມ້ແມ່ນຊັບພະຍາກອນອັນລໍ້າຄ່າຂອງຊາດທີ່ສ້າງລະບົບນິເວດສະເພາະຊຶ່ງປະກອບດ້ວຍຊີວະນາໆພັນ, ແຫຼ່ງນໍ້າແລະທີ່ດິນໃຫ້ມີຄວາມອຸດົມສົມບູນ ແລະຍືນຍົງໂດຍມີຕົ້ນໄມ້ນາໆຊະນິດທີ່ເກີດຂຶ້ນຕາມທຳມະຊາດ ຫຼືປູກຂຶ້ນມາຮອດປະຈຸບັນ ສປປ ລາວ ມີເນື້ອທີ່ຄວາມປົກຫຸ້ມປ່າໄມ້ປະມານ 62% ຂອງເນື້ອທີ່ທົ່ວປະທດເຊິ່ງມີອັດຕາສູງສົມຄວນຖ້າທຽບໃສ່ບັນດາປະເທດໃນພາກພື້ນ ແລະສາກົນ, ຊຶ່ງມີຄວາມສໍາຄັນທີ່ສຸດຕໍ່ການພັດທະນາເສດຖະກິດ-ສັງຄົມແຫ່ງຊາດໂດຍທາງກົງ ແລະທາງອ້ອມ, ເປັນຕົ້ນ:ການພັດທະນາພື້ນຖານໂຄງລ່າງທາງດ້ານເສດຖະກິດເຊັ່ນ: ເຂື່ອນໄຟຟ້ານໍ້າຕົກ, ອ່າງເກັບນໍ້າເພື່ອການກະສິກຳ, ການຜະລິດເປັນສິນ ຄ້າ, ການຄົມມະນາຄົມ, ການຂຸດຄົ້ນຊັບພະຍາກອນປ່າໄມ້ແລະເຄື່ອງປ່າຂອງດົງແບບຍືນຍົງຊຶ່ງໄດ້ປະກອບສ່ວນການປັບປຸງຊີວິດການເປັນຢູ່ຂອງປະຊາຊົນຕິດພັນກັບການພັດທະນາຊົນນະບົດແກ້ໄຂຄວາມທຸກຍາກເປັນກ້າວໆ ດັ່ງປະທານ ໄກສອນ ພົມວິຫານ ຜູ້ທີ່ແສນເຄົາລົບຮັກຂອງພວກເຮົາໄດ້ເວົ້າໄວ້ວ່າ“ ປ່າໄມ້ຄືຄໍາຂຽວຂອງຊາດ”.

  ເພື່ອຜັນຂະຍາຍເນື້ອໃນມະຕິກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິວັດລາວ,ມະຕິກອງປະຊຸມໃຫຍ່ອົງຄະນະພັກກະຊວງຄັ້ງທີ VI ແລະແຜນພັດທະນາເສດຖະກິດ-ສັງຄົມຂອງລັດຖະບານ 5 ປີ ຄັ້ງທີ IX ແຕ່ປີ 2021-2025,ກະຊວງກະສິກໍາ ແລະປ່າໄມ້ໄດ້ຜັນຂະຫຍາຍອອກເປັນຄໍາສັ່ງ, ແຈ້ງການໃຫ້ບັນກົມກ່ຽວ ຂ້ອງ, ອົງການປົກຄອງທ້ອງຖິ່ນຕະຫຼອດຮອດຜູ້ປະກອບການ ແລະພໍ່ແມ່ປະຊາຊົນໃນຂອບເຂດທົ່ວປະເທດເອົາໃຈໃສ່ຕໍ່ວຽກງານສົ່ງເສີມປູກໄມ້ແລະຟື້ນຟູປ່າໄມ້ທໍາມະຊາດຊຶ່ງໄດ້ວາງຄາດໝາຍສົ່ງເສີມການປູກໄມ້ໃຫ້ໄດ້ 2 ແສນເຮັກຕາ (ປູກໄມ້ເປັນສິນຄ້າຈໍານວນ 1,6 ແສນເຮັກຕາ ແລະ ປູກໄມ້ເພື່ອປົກປັກຮັກສາແຫຼ່ງນໍ້າ, ສິ່ງແວດ ລ້ອມ ຈໍານວນ 40 ພັນເຮັກຕາ ແລະການຟື້ນຟູປ່າໄມ້ທໍາມະຊາດໃຫ້ໄດ້ 1,8 ລ້ານເຮັກຕາ.

   ສະເພາະປີ 2021 ນີ້, ກະຊວງກະສິກໍາ ແລະປ່າໄມ້ໄດ້ອອກຄໍາສັ່ງວ່າດວ້ຍການເພີ່ມທະວີຄວາມຮັບຜິດຊອບສະກັດກັ້ນ, ຕ້ານໄຟໄໝ້ປ່າ, ກະກຽມຜະລິດເບ້ຍໄມ້, ປູກໄມ້ແລະຟື້ນຟູປ່າແຕ່ຕົ້ນປີ, ຈຶ່ງເຮັດໃຫ້ສະພາບໄຟໄໜ້ລາມປ່າໃນປີນີ້ຖືວ່າຫຼຸດລົງຫຼາຍຖ້າທຽບໃສ່ໃນປີຜ່ານມາ; ພ້ອມນີ້ກະຊວງກໍ່ໄດ້ອອກແຈ້ງການສະບັບເລກທີ 0035/ກປ, ລົງວັນທີ 13 ພຶດສະພາ 2021 ເພື່ອສ້າງຂະບວນການປູກຕົ້ນໄມ້ເນື່ອງໃນວັນປູກຕົ້ນໄມ້ແຫ່ງຊາດພ້ອມທັງເປັນການປູກຈິດສຳນຶກໃຫ້ທົ່ວສັງຄົມ ແລະ ປວງຊົນຮັບຊາບ. ຊຶ່ງໄດ້ສົມທົບກັບຄະນະພັກ, ອົງການ ປົກຄອງທ້ອງຖິ່ນທົ່ວປະເທດ ກະກຽມ ແຜນການ ແລະຂະບວນການປູກໄມ້ໂດຍມີແຜນການຄື: ວຽກເກັບແກ່ນ 22,7 ພັນກິໂລ, ວຽກກ້າເບ້ຍ 35 ລ້ານກວ່າເບ້ຍ, ວຽກງານປູກໄມ້ 36,95 ພັນເຮັກຕາ ໃນນີ້: ປູກໄມ້ເພື່ອປົກປັກຮັກສາສິ່ງແວດລ້ອມໃຫ້ໄດ້ 5,5 ພັນເຮັກຕາ, ປູກໄມ້ເປັນສິນຄ້າໃນຂອບເຂດປ່າຜະລິດໃຫ້ໄດ້ ຈໍານວນ 27,5 ພັນເຮັກຕາ ແລະທີ່ເປັນດິນຂອງປະຊາຊົນ ຈໍານວນ 3,59 ພັນເຮັກຕາ.

   ສໍາລັບການຈັດພິທີປູກຕົ້ນໄມ້ໃນປີນີ້ມອບໃຫ້ພາກສ່ວນກ່ຽວຂ້ອງທັງພາກລັດ, ເອກະຊົນ ແລະພໍ່ແມ່ປະຊາຊົນຈົ່ງພ້ອມກັນຈັດພິທີປູກໄມ້ໃຫ້ກະທັດຮັດ, ເບົາບາງ, ປະຢັດມັດທະຍັດແຕ່ໃຫ້ຮັບປະກັນທາງດ້ານເນື້ອໃນ ແລະ ຄວາມເປັນລະບຽບຮຽບຮ້ອຍຮອບດ້ານເນື່ອງຈາກມີຄວາມສ່ຽງຂອງພະຍາດ ໂຄວິດ-19 ຈຶ່ງໃຫ້ແຕ່ລະພາກສ່ວນເອົາໃຈໃສ່ປະຕິບັດມາດຕະການສະກັດກັ້ນ, ຕ້ານ ແລະປ້ອງກັນການແຜ່ລະບາດຂອງພະຍາດ ໂຄວິດ-19 ທີ່ລັດຖະບານວາງອອກຢ່າງເຂັ້ມງວດ.

   ເນື່ອງໃນໂອກາດວັນປູກໄມ້ແຫ່ງຊາດວັນທີ 1 ມິຖຸນາ 2021 ທີ່ໝູນວຽນມາເຖິງ, ຂ້າພະເຈົ້າໃນນາມຜູ້ຮັບຜິດຊອບຂະແໜງການກະສິກຳ ແລະປ່າໄມ້, ຕາງໜ້າໃຫ້ລັດຖະບານ ຂໍຮຽກຮ້ອງມາຍັງປວງຊົນທັງຊາດຈົ່ງເຊີດຊູສະຕິຮັກຊາດ ແລະຫຼວງແຫນປ່າໄມ້ປະກອບສ່ວນຕາມເງື່ອນໄຂຄວາມສາມາດໃນການປູກໄມ້, ຟື້ນຟູປ່າ ໄປຄຽງຄູ່ກັບການຄຸ້ມຄອງ, ປົກປັກຮັກສາປ່າໄມ້ອັນເປັນມໍລະດົກຂອງ ຊາດ ໃຫ້ນັບມື້ນັບອຸດົມສົມບູນ ແລະສາມາດຕອບສະໜອງຄວາມຮຽກຮ້ອງຕ້ອງການວັດຖຸດິບດ້ານໄມ້ ແລະຜະລິດຕະຜົນປ່າໄມ້ໄດ້ຢ່າງຍືນນານຄຽງຄູ່ໄປກັບການພັດທະນາເສດຖະກິດ-ສັງຄົມຂອງຊາດ ແລະເປັນການປົກປັກຮັກສາສິ່ງແວດລ້ອມໃຫ້ນັບມື້ນັບຂະຫຍາຍຕົວຂຶ້ນເລື້ອຍໆ ຕາມທິດສີຂຽວ ແລະຍືນຍົງດັ່ງຄຳຂວັນທີ່ວ່າ:

  “ ປູກຕົ້ນໄມ້ໃນວັນນີ້ຈະມີຊີວິດທີ່ດີໃນວັນໜ້າປູກຕົ້ນໄມ້ໃຫ້ເປັນປ່າເພື່ອພັດທະນາປະເທດຊາດ ” “ ຈົ່ງຊ່ວຍກັນປູກຕົ້ນໄມ້ ແລະຟື້ນຟູປ່າໄມ້ໃຫ້ມີຄວາມອຸດົມສົມບູນເພື່ອເປັນສິນຄ້າ ແລະປະກອບສ່ວນໃນການປົກປັກຮັກສາສິ່ງແວດລ້ອມ, ຫຼຸດຜ່ອນມົນລະພິດທາງອາກາດ”.

แชร์