ຊາວບ້ານໜອງໄຮ ກະທົບໜັກຈາກນໍ້າເປື້ອນ

ຂປລ. ໃນໄລຍະການລະບາດຂອງພະຍາດໂຄວິດ-19 ນີ້,ປະຊາຊົນລ້ວນແຕ່ຈໍາກັດບໍລິເວນຕົນເອງຢູ່ເຮືອນເພື່ອປ້ອງກັນການຕິດ ແລະແຜ່ເຊື້ອຂອງພະຍາດໂຄວິດ-19, ໃນໄລຍະຈຳກັດບໍລິເວນກໍ່ມີບາງບັນຫາເກີດຂຶ້ນໂດຍສະເພາະປະຊາຊົນບ້ານໜອງໄຮ ຮ່ອມ 31 ເມືອງຫາຍຊາຍຟອງ ນະຄອນຫຼວງວຽງ ໄດ້ຮັບຜົນກະທົບຈາກນໍ້າເປື້ອນເໝັນຈາກໂຮງງານຜະລິດນົມສົ້ມ,ໂຮງງານຜະລິດນໍ້າດື່ມ,ຮ້ານປີ້ງຫູໝູ ແລະນໍ້າເປື້ອນຈາກຄົວເຮືອນຂອງປະຊາຊົນທີ່ລົ້ນອອກມາຫົນທາງໄດ້ສົ່ງກິນເໝັນແຮງໄປທົ່ວບໍລິເວນໂດຍມີປະຊາຊົນທັງເດັກນ້ອຍ, ຜູ້ໃຫຍ່ ແລະຜູ້ອາຍຸສູງຈຳນວນ 10 ກວ່າຫຼັງຄາເຮືອນໄດ້ຮັບຜົນກະທົບໂດຍກົງຊຶ່ງໄດ້ສ້າງຄວາມລໍາຄານ ແລະອາດຈະສົ່ງຜົນເສຍຫາຍຕໍ່ສຸຂະພາບໄດ້. 

   ທ່ານ ດາວວັນ ມູນລາດ ປະຊາຊົນຜູ້ທີ່ໄດ້ຮັບຜົນກະທົບໄດ້ໃຫ້ສຳພາດຕໍ່ນັກຂ່າວສານປະເທດລາວວ່າ: ບັນຫານຳເໝັນນໍ້າເປື້ອນນີ້ຄອບຄົວຂອງຂ້າພະເຈົ້າໄດ້ຮັບຜົນກະທົບມາເປັນເວລາຫຼາຍເດືອນແລ້ວຊຶ່ງຕາມປົກກະຕິພວກເຮົາເຮັດວຽກຫັດຖະກຳຕີເງິນ-ຕີຄຳ ຢູ່ໜ້າເຮືອນແຕ່ໄລຍະນີ້ແມ່ນບໍ່ສາມາດເຮັດໄດ້ຄືເກົ່າເຖິງວ່າຈະເອົາຜ້າມາກັ້ງບັງໄວ້ແຕ່ເມື່ອລົມພັດມາກໍຍິ່ງເພີ່ມທະວີຄວາມເໝັນຢ່າງຮຸນແຮງນອກຈາກສ້າງຄວາມລໍາຄານແລ້ວຍັງກະທົບຕໍ່ການກິນອາຫານແຕ່ລະມື້ນຳອີກ.

 ທ່ານ ຄຳພັນ ອ້ວນລາສີ ໄດ້ໃຫ້ສຳພາດວ່າ: ນໍ້າເໝັນນີ້ລົ້ນອອກຈາກທໍ່ຈົນເຮັດໃຫ້ມີນໍ້າຂັງເໝັນແຮງຢູ່ໜ້າເຮືອນຂອງຂ້າພະເຈົ້າໂດຍກົງ,ນໍ້າຈະເໝັນແຮງທີ່ສຸດແມ່ນເວລາທີ່ອາກາດຮ້ອນແຮງ, ມີແດດຫຼາຍ, ມີລົມພັດ ແລະເວລາມີລົດທຽວໄປມາຍິ່ງເຮັດໃຫ້ນໍ້າເໝັນແຮງຊຶ່ງສົ່ງຜົນກະທົບຕໍ່ສຸຂະພາບເປັນຢ່າງຍິ່ງພາໃຫ້ກິນເຂົ້າບໍ່ແຊບ, ນອນຫຼັບຍາກ, ເວລາອອກມາຢູ່ນອກເຮືອນໃນຂອບເຂດບໍລິເວນຮົ້ວເຮືອນຂອງຕົນເອງກໍຕ້ອງໄດ້ໃສ່ຜ້າອັດປາກ-ດັງຕະຫຼອດເວລາແຕ່ປານນັ້ນຄວາມເໝັນກໍ່ບໍ່ໄດ້ຫຼຸດລົງເລີຍ; ບາງຄັ້ງເໝັນແຮງຈົນມີອາການເຈັບຫົວກໍ່ມີ. 

  ພ້ອມນີ້, ທ່ານ ນາງ ມະໄລທອງ ແສນມະນີ ປະຊາຊົນຜູ້ໄດ້ຮັບຜົນກະທົບກໍໄດ້ໃຫ້ສຳພາດວ່າ: ໃນໄລຍະນີ້ເປັນໄລຍະການລະບາດຂອງພະຍາດໂຄວິດ-19 ຂ້າພະເຈົ້າເອງບໍ່ໄດ້ໄປວຽກເປັນປົກກະຕິສ່ວນຫຼາຍແມ່ນເຮັດວຽກຢູ່ເຮືອນເຊິ່ງການເຮັດວຽກຢູ່ເຮືອນກໍ່ມີຄວາມຫຍຸ້ງຍາກຫລາຍເນື່ອງຈາກຄວາມເໝັນຂອງນໍ້າເປື້ອນເຮັດໃຫ້ບໍ່ມີສະມາທິໃນການເຮັດວຽກຈຶ່ງຕ້ອງໄດ້ອັດປະຕູ-ປ່ອງຢ້ຽມໄວ້ຕະຫຼອດເວລາອາກາດກໍ່ຮ້ອນອົບເອົ້າທໍລະມານຫຼາຍແຕ່ຖ້າໄຂປະຕູປ່ອງຢ້ຽມຍາມໃດກິ່ນເໝັນກໍ່ລຸເຂົ້າມາເລີຍ “ແຮງກ່ອນໂຄວິດ-19 ກໍຄືກິ່ນເໝັນຈາກນໍ້າເປື້ອນນີ້ແຫຼະ”.

  ຕໍ່ກັບບັນຫາດັ່ງກ່າວ,ອຳນາດການປົກຄອງບ້ານໜອງໄຮກໍຄືທ່ານ ສອນເພັດ ແກ້ວປະດິດ ເລຂາພັກບ້ານ, ນາຍບ້ານບ້ານໜອງໄຮກໍ່ບໍ່ໄດ້ເພີກເສີຍ, ເຫັນຄວາມເດືອດ ຮ້ອນຂອງປະຊາຊົນເປັນສິ່ງສໍາຄັນທັງເປັນຫ່ວງເປັນໄຍຕໍ່ສຸຂະພາບຂອງປະຊົນພາຍໃນບ້ານຈຶ່ງໄດ້ແຈ້ງເຊີນພາກສ່ວນກ່ຽວຂ້ອງມາປຶກສາຫາລືເພື່ອຮ່ວມກັນແກ້ໄຂບັນ ຫາດັ່ງກ່າວຊຶ່ງທ່ານນາຍບ້ານບ້ານໜອງໄຮໄດ້ໃຫ້ສຳພາດວ່າ: ບັນຫາເລື່ອງນໍ້າເປື້ອນແມ່ນມີຜົນກະທົບມາແຕ່ດົນມາແລ້ວເຊິ່ງຜ່ານມາທາງບ້ານກໍໄດ້ມີການລະດົມທຶນກັບນັກທຸລະກິດ, ຜູ້ປະກອບການທຸລະກິດໂດຍມີໂຮງງານນົມສົ້ມ, ໂຮງງານນໍ້າດື່ມ ແລະຮ້ານປີ້ງຫູໝູເຫຼົ່ານີ້ເພື່ອຊື້ທໍ່ ແລະເອົາແຮງງານມາກໍ່ສ້າງປັບປຸງ ສາມາດແກ້ ໄຂບັນຫາໄດ້ໃນລະດັບໜຶ່ງ;ຕໍ່ມາທໍ່ເກີດມີການອັດຕັນທາງບ້ານກໍໄດ້ສະເໜີໃຫ້ຜູ້ປະກອບການທຸລະກິດ 3 ພາກສ່ວນລົງມາແກ້ໄຂກໍ່ໄດ້ຮັບຜົນດີ. ປີ 2020 ຜ່ານມາ, ບາງໂຮງງານໄດ້ເກີດຂໍ້ຂັດຂ້ອງຍ້ອນໄລຍະໂຄວິດ-19 ລະບາດ; ມາຮອດປະຈຸບັນນີ້ 2 ພາກສ່ວນຄື: ໂຮງງານນົມສົ້ມ ແລະໂຮງງານນໍ້າດື່ມໄດ້ແກ້ໄຂບັນຫາເບື້ອງຕົ້ນກ່ອນໂດຍການລ່ວງທໍ່, ສະສາງສິ່ງທີ່ອັດຕັນ.

   ຢ່າງໃດກໍ່ຕາມ,ທາງອຳນາດການປົກຄອງບ້ານຍັງໄດ້ປະສານກັບໜ່ວຍງານສິ່ງແວດລ້ອມຂັ້ນບ້ານເຄື່ອນໄຫວຕິດຕາມກວດກາປະເມີນຜົນເພື່ອຊອກຊ່ອງທາງໃນການປັບປຸງ ແລະແກ້ໄຂໃນໄລຍາວຄາດວ່າ: ບ້ານ ແລະຜູ້ປະກອບການທຸລະກິດອາດຈະຮ່ວມກັນດ້ານທຶນຮອນ,ອຸປະກອນ ແລະແຮງງານເພື່ອບູລະນະເປັນຮ່ອງລະບາຍນໍ້າທີ່ໄດ້ມາດຕະຖານກວ່າເກົ່າ.

ຂ່າວ-ພາບ: ສົມຫວັງ

แชร์