ໄຊສົມບູນ ແຕ່ງຕັ້ງໃໝ່ຫຼາຍຕຳແໜ່ງ

  ພິທີມອບ-ຮັບໜ້າທີ່ລະຫວ່າງທ່ານ ບຸນສຸກ ຈອມວິສານ, ປະທານສະພາປະຊາຊົນແຂວງຜູ້ເກົ່າ ແລະທ່ານ ແດງ ປະທຸມທອງ, ປະທານສະພາປະຊາຊົນແຂວງໄຊສົມບູນ ຜູ້ໃໝ່ພ້ອມທັງປະກາດສັບຊ້ອນໜ້າທີ່ພະນັກງານນໍາພາ-ຄຸ້ມຄອງບັນດາພະແນກການຂອງແຂວງ ແລະ ເມືອງໄດ້ຈັດຂຶ້ນຢ່າງເປັນທາງການໃນວັນທີ 19 ພຶດສະພາ 2021, ທີ່ສະໂມສອນເມືອງອະນຸວົງໂດຍການເປັນປະທານຂອງ ພົນຕີ ຄໍາລຽງ ອຸທະໄກສອນ ເຈົ້າແຂວງໄຊສົມບູນ, ມີຮອງເຈົ້າແຂວງ, ຄະນະປະຈຳ ພັກແຂວງ, ກຳມະການພັກແຂວງ, ຄະນະປະຈຳສະພາປະຊາຊົນແຂວງພ້ອມດ້ວຍພະແນກການ-ອົງການອ້ອມຂ້າງແຂວງ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ໃນພິທີ ທ່ານ ທອງວັນ ທໍາມະວົງ, ຫົວໜ້າຄະນະຈັດຕັ້ງແຂວງໄດ້ຂຶ້ນຜ່ານມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການອະນຸມັດໃຫ້ປະທານ ແລະຮອງປະທານສະພາປະຊາຊົນແຂວງເຂົ້າພັກຜ່ອນຮັບບໍານານ.ພ້ອມນີ້ທ່ານ ບຸນສຸກ ຈອມວິສານ ປະທານສະພາປະຊາຊົນແຂວງຜູ້ເກົ່າໄດ້ຂຶ້ນມີຄໍາເຫັນ ແລະ ກ່າວມອບໜ້າທີ່ໃຫ້ປະທານສະພາປະຊາຊົນແຂວງຜູ້ໃໝ່ຈາກນັ້ນໄດ້ມີພິທີລົງນາມເຊັ່ນບົດບັນທຶກມອບ-ຮັບໜ້າທີ່ຢ່າງເປັນທາງການ.

   ພ້ອມດຽວກັນນີ້ ທ່ານ ທອງວັນ ທໍາມະວົງ ຍັງໄດ້ຂຶ້ນຜ່ານມິຕິຕົກລົງວ່າດ້ວຍການແຕ່ງຕັ້ງພະນັກງານ ແລະຂໍ້ຕົກລົງວ່າດ້ວຍການຍົກຍ້າຍພະນັກງານຊຶ່ງມີລາຍຊື່ດັ່ງນີ້: ເຫັນດີຍົກຍ້າຍ ທ່ານ ຄໍາພູທອນ ວົງພະຈັນ, ເຈົ້າເມືອງໆອະນຸວົງໄປຮັບໜ້າທີ່ໃໝ່ຢູ່ສະພາປະຊາຊົນແຂວງ, ແຕ່ງຕັ້ງທ່ານ ຮືທໍ່ ເພຍຫຼວງ, ຫົວໜ້າໂຄສະນາອົບຮົມແຂວງໄປເປັນເຈົ້າເມືອງໆ ອະນຸວົງ, ແຕ່ງຕັ້ງທ່ານ ອຸດອນ ສິງດາລາ, ຫົວໜ້າພະແນກຍຸຕິທໍາແຂວງໄປເປັນເຈົ້າເມືອງໆລ້ອງແຈ້ງ, ແຕ່ງຕັ້ງທ່ານ ອິນຕອງ ໂຄດປັນຍາ, ເຈົ້າເມືອງໆລ້ອງແຈ້ງ ໄປເປັນຫົວໜ້າພະແນກຍຸຕິທໍາແຂວງ, ແຕ່ງຕັ້ງທ່ານ ພູແກ້ວ ອິນທະວົງ, ເປັນຫົວ ໜ້າພະແນກເຕັກໂນໂລຊີ ແລະການສື່ສານ ແຂວງ, ແຕ່ງຕັ້ງ ທ່ານ ລີເຢີ ໄຊຍະຊ່າງ, ຮອງຫົວໜ້າພະແນກສາທາລະນະສຸກແຂວງຂຶ້ນເປັນຫົວໜ້າພະແນກສາທາລະນະສຸກແຂວງ, ແຕ່ງຕັ້ງທ່ານ ຄົວຈັ້ງ ດຣາເຊັງ, ຫົວໜ້າໂຮງຮຽນທິດສະດີການເມືອງ-ການປົກຄອງແຂວງໄປເປັນຫົວໜ້າໂຄສະນາອົບຮົມແຂວງ,ແຕ່ງຕັ້ງທ່ານ ລາວຢ່າງ ຈາວາ, ຮອງຫົວໜ້າພະແນກພາຍໃນ ແຂວງ, ໄປເປັນຫົວໜ້າໂຮງຮຽນທິດສະດີການເມືອງ-ການປົກຄອງແຂວງ ແລະຍົກຍ້າຍ ທ່ານ ບົວເກດ ວົງປະເສີດ, ຫົວໜ້າພະແນກສາທາລະນະສຸກແຂວງໄປຮັບໜ້າທີ່ໃໝ່ຢູ່ຫ້ອງວ່າການແຂວງ.

ຂ່າວ-ພາບ: ນາງ ຕູດ ຄໍາພໍໃຈ

• 20/05/2021