ກວາງຈິ ມອບເຄື່ອງຊ່ວຍສາລະວັນຕ້ານໂຄວິດ

     ເພື່ອເປັນການປະກອບສ່ວນເຂົ້າໃນວຽກງານສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດຂອງເຊື້ອພະຍາດ ໂຄວິດ-19 ຢູ່ແຂວງສາລະວັນ, ໃນວັນທີ 18 ພຶດສະພາ 2021 ນີ້ ແຂວງກວາງຈີ ສສ ຫວຽດນາມ ໄດ້ປະກອບສ່ວນມອບເຄື່ອງຊ່ວຍເຫຼືອໃຫ້ອົງການປົກຄອງ ແຂວງສາລະວັນ ຊຶ່ງປະກອບມີຄື: ຊຸດແພດ PPE 630 ຊຸດ, ຜ້າອັດປາກ 6.630 ອັນ, ນໍ້າຢາຂ້າເຊື້ອ 600 ກີໂລກຣາມ ເຄື່ອງພົ່ນນໍ້າຢາຂ້າເຊື້ອ 3 ເຄື່ອງ ແລະ ເຈວລ້າງມື 330 ກ່ອງ ລວມມູນຄ່າ 300 ລ້ານກວ່າກີບ.

  ພິທີມອບ-ຮັບໄດ້ຈັດຂຶ້ນທີ່ດ່ານຊາຍແດນສາກົນລະໄລເມືອງສະໝ້ວຍ, ມອບໂດຍທ່ານ ຮວ່າງນາມ ຮອງປະທານຄະນະກຳມະການປະຊາຊົນ ແຂວງກວາງຈີ, ຮັບໂດຍທ່ານ ສົມໃຈ ອຸນຈິດ ຮອງເຈົ້າ ແຂວງໆສາລະວັນ ຫົວໜ້າຄະນະສະເພາະກິດໂຄວິດ-19 ແຂວງສາລະວັນພ້ອມດ້ວຍຄະນະເຂົ້າຮ່ວມເປັນສັກຂີພິຍານ.

   ໃນໂອກາດດຽວກັນນັ້ນທ່ານຮອງເຈົ້າແຂວງກໍ່ໄດ້ມອບໃບຍ້ອງຍໍເພື່ອສະແດງເຖິງຄວາມຂອບໃຈທີ່ແຂວງກວາງຈີ ສສ ຫວຽດນາມ ທີ່ໄດ້ປະກອບສ່ວນຊ່ວຍເຫຼືອເຂົ້າໃນວຽກງານປ້ອງກັນ ແລະຄວບຄຸມ, ສະກັດກັ້ນ ແລະແກ້ໄຂການລະບາດຂອງພະຍາດໂຄວິດ-19 ຢູ່ແຂວງສາລະວັນ,ພ້ອມດຽວກັນນັ້ນອຳນາດການປົກຄອງແຂວງສາລະວັນກໍ່ໄດ້ມອບຕໍ່ໃຫ້ອຳນາດການປົກຄອງເມືອງສະໝ້ວຍເປັນຜູ້ປົກປັກຮັກສານຳໃຊ້ໃນຂັ້ນຕອນຕໍ່ໄປ.

   ການມອບເຄື່ອງຊ່ວຍເຫຼືອຂອງ ແຂວງກວາງຈີ ສສ ຫວຽດນາມ ໃຫ້ແຂວງສາລະວັນຄັ້ງນີ້, ຊຶ່ງສະແດງໃຫ້ເຫັນເຖິງຄວາມເປັນຫ່ວງ, ເປັນໄຍ, ທັງເປັນການເສີມຂະຫຍາຍມູນເຊື້ອຮ່ວມມືສາມັກຄີແບບພິເສດລະຫ່ວາງ 2 ຊາດຫວຽດນາມ-ລາວໃຫ້ນັບມື້ແໜ້ນແຟ້ນຍິ່ງຂຶ້ນ.

ພາບ-ຂ່າວ: ສິດຕາ ເພັດວົງສາ

แชร์