ຫຼັງທີ 20 ພຶດສະພາ ຈະຜ່ອນຜັນບາງມາດຕະການ

   ການຈັດຕັ້ງປະຕິບັດຄຳສັ່ງເລກທີ 15/ນຍ, ວັນທີ 21 ເມສາ 2021 ຫາວັນທີ 5 ພຶດສະພາ 2021 ຮອບ II ໄດ້ຮັບຜົນສົມຄວນໂດຍໄລຍະ 2 ນັບແຕ່ວັນທີ 6 ພຶດສະພາ ຮອດປະຈຸບັນການລະບາດພະຍາດໂຄວິດ-19 ມີທ່າອ່ຽງຫຼຸດລົງ, ຍ້ອນທຸກພາກສ່ວນມີການຮ່ວມມື, ສະໜັບສະໜູນ ແລະເຂົ້າຮ່ວມຢ່າງຕັ້ງໜ້າໃນການສະກັດກັ້ນ, ຕ້ານ ແລະແກ້ໄຂພະຍາດດັ່ງກ່າວໂດຍຖືເປັນໜ້າທີ່-ຄວາມຮັບຜິດຊອບຂອງທຸກຄົນ.

   ປະຈຸບັນຍັງສືບຕໍ່ເພີ່ມທະວີການເຝົ້າລະວັງໃນລະດັບສູງສຸດ; ສິ່ງສໍາຄັນຕ້ອງພ້ອມກັນຢູ່ເຮືອນ; ປະຕິບັດຕາມລະບຽບປ້ອງກັນໂຄວິດຢ່າງເຂັ້ມງວດພ້ອມທັງໃສ່ຜ້າອັດປາກ+ດັງ, ໝັ່ນລ້າງມື,ຢູ່ຫ່າງ, ບໍ່ເຂົ້າເຂດຊຸມຊົນແອອັດ;ພ້ອມນີ້ກໍ່ສຸມໃສ່ແກ້ໄຂຂໍ້ຄົງຄ້າງໃນຜ່ານມາຊຶ່ງມີຫຼາຍຄົນຍັງຝ່າຝືນຄຳສັ່ງເລກທີ 15/ ນຍ;ມີການສັນຈອນຊະຊາຍແບບບໍ່; ບາງກໍລະນີເຈັບກໍ່ບໍ່ຍອມໄປກວດ, ກວດພົບຕິດເຊື້ອພະຍາດບໍ່ຍອມປິ່ນປົວ, ບາງຄົນມາກວດບໍ່ໃຫ້ຂໍ້ມູນຈະແຈ້ງ; ມີຜູ້ຕິດເຊື້ອຈໍານວນໜຶ່ງເຂົ້າປິ່ນປົວບໍ່ປະຕິບັດຕາມມາດຕະການທີ່ແພດ-ໝໍ ລວມທັງບໍ່ຈຳກັດບໍລິເວນຕົນເອງ; ນອກນີ້, ມີພະນັກງານ, ທະຫານ, ຕຳຫຼວດ, ປະຊາຊົນ, ຜູ້ປະກອບການຈໍານວນໜຶ່ງລະເຫຼີງບໍ່ປະຕິບັດມາດຕະການທີ່ຄະນະສະເພາະກິດວາງອອກ, ການກວດກາຜູ້ເດີນທາງເຂົ້າ-ອອກພາຍໃນ ແລະລະຫວ່າງແຂວງບໍ່ເຄັ່ງຄັດ, ຍັງຊຸມແຊວ ແລະອື່ນໆ.

   ຂະນະນີ້ຍັງປາກົດມີ 2 ທ່າອ່ຽງເປັນຕົ້ນຄື: ຕິດເຊື້ອຈາກການນຳເຂົ້າເຊື້ອສາມາດຄວບຄຸມໄດ້ສຳລັບຜູ້ທີ່ເຂົ້າມາຖືກຕ້ອງຕາມກົດໝາຍ; ການຕິດເຊື້ອໃນຊຸມຊົນແຜ່ລາມອອກໄປຫຼາຍຈຸດເຂົ້າສູ່ວົງແຄບ (ໃນຄອບຄົວ, ໂຮງໝໍ, ຫ້ອງການ); ສະນັ້ນ, ເພື່ອບັນລຸຄາດໝາຍໃນການຄວບຄຸມ,ແກ້ໄຂການລະບາດພະຍາດດັ່ງກ່າວໃນຊຸມຊົນໃຫ້ມີຜູ້ຕິດເຊື້ອໜ້ອຍທີ່ສຸດ, ມີຜູ້ເສຍຊີວິດໜ້ອຍທີ່ສຸດ ແລະກັບມາໃຊ້ຊີວິດປົກກະຕິພາຍໃຕ້ເງື່ອນໄຂໃໝ່ໄດ້ໄວ, ຄະນະສະເພາະກິດໄດ້ຄົ້ນຄວ້າກຳນົດມາດຕະການຮີບດ່ວນໂດຍປິດການເຂົ້າ-ອອກບ້ານ-ກຸ່ມບ້ານ ຫຼືເມືອງທີ່ມີຜູ້ຕິດເຊື້ອຢູ່; ເຝົ້າລະວັງເຂດໃກ້ຄຽງຢ່າງໃກ້ຊິດ; ຄົ້ນຫາກໍລະນີຜູ້ຕິດເຊື້ອໃນທ່າບຸກເມື່ອເຫັນວ່າມີຄວາມສ່ຽງ ໃນການເກີດລະບາດເປັນຈຸ້ມຄຽງຄູ່ກັບການສັກວັກແຊງໃຫ້ກຸ່ມຄົນໃນເຂດດັ່ງກ່າວ; ກຳນົດເຂດການລະບາດຕາມລະດັບຄວາມຮຸນແຮງຂອງການລະບາດ; ກະກຽມສະຖານທີ່ປິ່ນປົວ, ກະກຽມອຸປະກອນການແພດຕ່າງໆ ແລະແພດໝໍເພື່ອຮອງຮັບກໍລະນີມີຜູ້ຕິດເຊື້ອເພີ່ມຂຶ້ນຫຼາຍ; ປະຕິບັດວິໄນຕໍ່ຜູ້ລະເມີດມາດຕະການຕ່າງໆ ໂດຍສະເພາະຄົນເຈັບທີ່ມາກວດພົບເຊື້ອແລ້ວບໍ່ຍອມປິ່ນປົວ ຫຼືອອກໄປນອກເຮືອນ ແລະສະຖານທີ່ຕ່າງໆ. 

   ຕໍ່ໜ້ານີ້, ທາງການຈະອອກແຈ້ງການມາດຕະການຜ່ອນຜັນຫຼັງວັນທີ 20 ພຶດ ສະພາ 2021 (ຜ່ອນຜັນມາດຕະການທີ່ກຳນົດໃນຄຳສັ່ງ 15/ນຍ ແລະມາດຕະ ການສືບຕໍ່ເຂັ້ມງວດ; ສຳລັບແຂວງທີ່ບໍ່ລະບາດໃນຊຸມຊົນໃຫ້ສາມາດເດີນທາງເຂົ້າ-ອອກ ພາຍໃນແຂວງໄດ້ປົກກະຕິ;ອະນຸຍາດໃຫ້ລົດຂົນສົ່ງສິນຄ້າເຂົ້າ-ອອກ ລະຫວ່າງແຂວງໄດ້ແຕ່ຕ້ອງປະຕິບັດມາດຕະການປ້ອງກັນການຕິດເຊື້ອ-ແຜ່ເຊື້ອ; ສະເພາະມາດຕະການທາງການແພດຕ້ອງເຝົ້າລະວັງ, ຄວບຄຸມ-ໂຕ້ຕອບ ຕໍ່ການລະບາດ; ລະດົມບຸກຄະລາກອນວຽກງານເຝົ້າລະວັງ ແລະວິເຄາະເພື່ອຈັດຕັ້ງຜັດປ່ຽນຖ້າການລະບາດຫາກແກ່ຍາວ; ສົ່ງທີມຈາກສູນກາງລົງໄປຊ່ວຍບາງແຂວງ; ຂະຫຍາຍການກວດວິເຄາະດ້ວຍເຕັກນິກ RT-PCR ໃນຫຼາຍແຂວງ, ສຳລັບແຂວງທີ່ບໍ່ມີ RT-PCR ຈະນຳໃຊ້ເຄື່ອງກວດຈີນເອັກສະເປີດ ແລະເຄື່ອງກວດວິເຄາະເຄື່ອນທີ່ໃຫ້ໄດ້ທັງ ໝົດໃນໄວໆນີ້. ປັບປຸງຖານຂໍ້ມູນການເກັບຕົວຢ່າງໂດຍນຳໃຊ້ Tablet ໃນການປ້ອນຂໍ້ມູນຜູ້ທີ່ມາກວດເພື່ອເຮັດໃຫ້ຂໍ້ມູນມີຄວາມຊັດເຈນ ແລະ ລາຍງານຜົນໄວຂຶ້ນ; ປັບປຸງສະຖານທີ່ຈຳກັດບໍລິເວນໃຫ້ໄດ້ມາດຕະຖານດີຂຶ້ນກວ່າເກົ່າ,ຮັບປະກັນບໍ່ໃຫ້ມີການແຜ່ເຊື້ອຢູ່ສະຖານທີ່ດັ່ງກ່າວ; ລະດົມກຳລັງນັກສຶກສາແພດ, ເສນາຮັກ (ປກສ-ປກຊ), ຄູ່ຮ່ວມພັດທະນາສາກົນເຂົ້າຊ່ວຍ, ພ້ອມທັງອົບຮົມຢ່າງຮີບດ່ວນເພື່ອເປັນແຜນສຳຮອງໃນຕໍ່ໜ້າ; ຕິດຕາມຊອກຄົ້ນຫາຄົນເຈັບທີ່ຖືກຢັ້ງຢືນຜົນກວດເປັນພະຍາດໂຄວິດເຂົ້າມາປິ່ນປົວໂດຍໄວ ແລະບັນຫາອື່ນໆທີ່ຕິດພັນ; ສໍາລັບການສັກວັກແຊງກັນພະຍາດໂຄວິດ-19 ໝົດປີ 2021 ນີ້ຈະໃຫ້ໄດ້ກວມ 50% ຂອງພົນລະເມືອງທັງໝົດ; ນີ້ຄື:ບາງເນື້ອໃນກອງປະຊຸມລະຫວ່າງນາຍົກລັດຖະມົນຕີ ແລະຄະນະສະເພາະກິດຄັ້ງວັນທີ 17 ພຶດສະພາ 2021.

ໂດຍ: ຣັດສະໝີ ດວງສັດຈະ

แชร์