50 ຄົນຕິດເຊື້ອໂຄວິດຕື່ມຢູ່ລາວ

   ຄະນະສະເພາະກິດເພື່ອປ້ອງກັນຄວບຄຸມ ແລະແກ້ໄຂພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ COVID-19 ໄດ້ຖະແຫຼງປະຈຳວັນທີ 19 ພຶດສະພາ 2021 ໃຫ້ຮູ້ວ່າ: ສະພາບການລະບາດຂອງພະຍາດຍາດ COVID- 19 ຢູ່ໃນໂລກ, ຮອດປະຈຸບັນໃນທົ່ວໂລກມີການລາຍງານຕົວເລກຜູ້ຕິດເຊື້ອສະສົມທັງໝົດ 164,87 ລ້ານຄົນ, ເສຍຊີວິດສະສົມ 3,41 ລ້ານຄົນ ແລະປິ່ນປົວຫາຍດີ 145 ລ້ານກວ່າຄົນ. ປະເທດທີ່ຍັງມີຜູ້ຕິດເຊື້ອ ແລະເສຍຊີວິດຫຼາຍກວ່າໝູ່ໃນໂລກ ກໍ່ຍັງແມ່ນສະຫະລັດອາເມລິກາ, ອິນເດຍ, ບຣາຊິວ ແລະຝຣັ່ງຕາມລໍາດັບ.

  ສຳລັບ ສປປ ລາວ ໃນວັນທີ 18 ພຶດສະພາ 2021 ໄດ້ເກັບຕົວຢ່າງມາກວດວິເຄາະທັງໝົດ 1.482 ຕົວຢ່າງໃນນັ້ນກວດພົບຜູ້ຕິດເຊື້ອໃໝ່ 50 ກໍລະນີ ເຮັດໃຫ້ຜູ້ຕິດເຊື້ອສະສົມທັງໝົດເປັນ 1.737 ຄົນ, ບໍ່ມີເສຍຊີວິດໃໝ່, ເສຍຊີວິດສະສົມທັງໝົດ 2 ຄົນ.

  ກ່ຽວກັບກໍລະນີຕິດເຊື້ອໃໝ່ 50 ຄົນ (ກໍລະນີຢັ້ງຢືນທີ 1688-1737) ຈາກນະຄອນຫຼວງ 16 ຄົນ (ທັງ 16 ຄົນແມ່ນຜູ້ສຳຜັດໃກ້ຊິດກັບຜູ້ຕິດເຊື້ອເກົ່າທີ່ຕິດເຊື້ອໃນຊຸມຊົນ); ແຂວງບໍ່ແກ້ວ 21 ຄົນນັ້ນ, ແມ່ນຄົນທີ່ຕິດເຊື້ອຢູ່ພາຍໃນຊຸມຊົນຢູ່ເມືອງຕົ້ນເຜີ້ງ; ສໍາລັບແຂວງຈໍາປາສັກ 5 ຄົນ ແລະແຂວງສະຫວັນນະເຂດ 6 ຄົນ ແມ່ນກໍລະນີນຳເຂົ້າຊຶ່ງກວດພົບເຊື້ອໃນແຮງງານລາວທີ່ກັບຄືນປະເທດຖືກກົດໝາຍ; ສ່ວນ 2 ກໍລະນີໃນ ແຂວງອຸດົມໄຊ (1 ກໍລະນີແມ່ນແຮງງານລາວທີ່ກັບມາຈາກໄທຜ່ານຂົວມິດຕະພາບ 1 ແລະໄດ້ເຂົ້າຈຳກັດບໍລິເວນຢູ່ສູນຫຼັກ 27 ໃນນະຄອນຫຼວງວຽງຈັນຄົບກຳນົດ 14 ວັນ ກວດບໍ່ພົບເຊື້ອ ແລະອອກຈາກສູນຈຳກັດບໍລິເວນເໝົາລົດຮ່ວມກັບໝູ່ອີກ 10 ຄົນເດີນທາງໄປຍັງແຂວງອຸດົມໄຊ ແລະໄປຈຳກັດບໍລິເວນຢູ່ແຂວງຜົນກວດພົບເຊື້ອ ແລະອີກ 1 ກໍລະນີແມ່ນຄົນແຂວງຫຼວງພະບາງ ທີ່ມີຄວາມຈຳເປັນເດີນທາງໄປແຂວງອຸດົມໄຊໃນວັນທີ່ 14 ພຶດສະພາ 2021 ແລະໄດ້ເຂົ້າກັກໂຕເກັບຕົວຢ່າງຜົນກວດພົບເຊື້ອ.

แชร์