ປິດຊຸດອົບຮົມ-ຫັດແອບທະຫານພັນທະ

  ໂຮງຮຽນການທະຫານທ້ອງຖິ່ນ ທະຫານແຂວງບໍລິຄຳໄຊ ປິດຊຸດອົບຮົມ-ຫັດແອບທະຫານພັນທະຊຸດທີ 30 ປະຈຳປີ 2020 ຂຶ້ນໃນ ອາທິດ ຜ່ານມານີ້ທີ່ໂຮງຮຽນດັ່ງກ່າວໂດຍພາຍໃຕ້ການເປັນປະທານ ຂອງທ່ານ ພັນໂທ ພິດາວັນ ພີມເຮືອງສີ ຄະນະພັກກອງບັນຊາການຫົວໜ້າຫ້ອງເສນາທິການທະຫານແຂວງບໍລິຄຳໄຊ, ມີແຂກຖືກເຊີນ, ພະແນກການກ່ຽວຂ້ອງ ແລະທະຫານພັນທະເຂົ້າຮ່ວມ.

    ໃນພິທີ ທ່ານ ພັນໂທ ສິດປະເສີດ ວົງຫາລາດ ຫົວໜ້າການເມືອງໂຮງຮຽນການທະຫານທ້ອງຖິ່ນທະຫານແຂວງບໍລິຄໍາໄຊໄດ້ລາຍງານຜົນສຳເລັດຂອງຊຸດອົບຮົມ -ຫັດແອບຄັ້ງນີ້ຊຶ່ງໄດ້ເລີ່ມເປີດອົບຮົມໃນວັນທີ 29 ມັງກອນ 2020 ມີນັກຮຽນທະຫານພັນ ທະເຂົ້າຮຽນທັງໝົດ 146 ຄົນ ຍິງ 25 ຄົນ, ເນື້ອໃນທີ່ນຳມາອົບຮົມຫັດແອບໃນຄັ້ງນີ້, ປະກອບມີ 3 ພາກຄື: ພາກການເມືອງປະກອບມີ 7 ບົດ ຜົນໄດ້ຮັບ 88%, ພາກພະລາທິການປະກອບມີ 3 ບົດ ຜົນໄດ້ຮັບ 83%, ພາກການທະຫານປະກອບມີ 21 ບົດ ຜົນໄດ້ຮັບ 87%, ຈາກນັ້ນ, ຍັງໄດ້ປະກາດເລື່ອນຊັ້ນ ll ຂຶ້ນຊັ້ນ l ມີຈຳນວນ 146 ຄົນ, ມອບໃບຢັ້ງຢືນຊຸດອົບຮົມຈຳນວນ 146 ຄົນ.

 ທ່ານ ພັນໂທ ພິດາວັນ ພີມເຮືອງສີ ຍັງໄດ້ມີຄຳເຫັນໂອ້ລົມຊຶ່ງທ່ານໄດ້ຍ້ອງຍໍຊົມເຊີຍຜົນສຳເລັດຂອງຊຸດອົບຮົມ-ຫັດແອບໃນຄັ້ງນີ້, ພ້ອມທັງໄດ້ຮຽກຮ້ອງໃຫ້ທະຫານພັນທະເອົາໃຈໃສ່ຄົ້ນຄວ້າເຊື່ອມຊຶມແນວທາງນະໂຍບາຍຂອງພັກ, ກົດໝາຍຂອງລັດ ແລະ ຂໍ້ກຳນົດກົດລະບຽບຂອງກອງທັບໃຫ້ເລິກເຊິ່ງ, ຍົກສູງສະຕິລະວັງຕົວ, ມີຄວາມຮັບຜິດຊອບກຽມພ້ອມສູ້ຮົບຕະຫຼອດເວລາ, ສືບຕໍ່ຮັກສາຄວາມສາມັກຄີພາຍໃນກອງທັບ ແລະພໍ່ແມ່ປະຊາຊົນໃຫ້ແໜ້ນແຟ້ນ, ເອົາໃຈໃສ່ຝຶກຝົນຫຼໍ່ຫຼອມຕົນເອງທາງດ້ານຄຸນສົມບັດສິນທຳປະຕິວັດໃຫ້ໄດ້ດີ, ນຳເອົາບົດຮຽນທີ່ໄດ້ຮຽນໄປຈັດຕັ້ງປະຕິບັດ ແລະຜັນຂະຫຍາຍເຂົ້າໃນໜ້າທີ່ວຽກງານຂອງຕົນໃຫ້ເກີດດອກອອກຜົນ.

ຂ່າວ: ນາງ ນ້ອຍ ບານທະວົງ

แชร์