ເຊກອງ ຮຽກຮ້ອງປະຊາຊົນປະຕິບັດຄໍາສັ່ງ 15/ນຍ ຢ່າງເຂັ້ມງວດ

   ທ່ານ ດຣ. ນາງ ລໍາພັນ ໄຊຄໍາມີ ຮອງຫົວໜ້າພະແນກສາທາລະນະສຸກແຂວງ, ຫົວໜ້າກອງເລຂາຄະນະສະເພາກິດຂັ້ນແຂວງໃຫ້ຮູ້ໃນວັນທີ 17 ພຶດສະພາວ່າ: ສະພາບການໂດຍລວມຂອງແຂວງໃນປະຈຸບັນແມ່ນຢູ່ໃນໄລຍະທີ່ມີການເຝົ້າລະວັງ, ຄວບຄຸມ, ສະກັດກັ້ນ ແລະແກ້ໄຂການລະບາດຂອງພະຍາດໂຄວິດ-19 ສະນັ້ນຈຶ່ງຂໍຮຽກຮ້ອງມາຍັງປະຊາຊົນທຸກຄົນເອົາໃຈໃສ່ປະຕິບັດຄໍາສັ່ງ 15/ນຍ, ລົງວັນທີ 21 ເມສາ 2021 ແລະມາດຕະການຕ່າງໆຢ່າງເຂັ້ມງວດເພື່ອສະກັດກັ້ນການແຜ່ລະບາດຂອງພະຍາດດັ່ງກ່າວ.

   ທ່ານ ດຣ. ນາງລໍາພັນ ໄຊຄໍາ ມີໄດ້ກ່າວຕື່ມອີກວ່າ: ຜ່ານການປະເມີນດ້ານຄວາມສ່ຽງ ຫຼືການລະບາດຂອງພະຍາດເຫັນໄດ້ວ່າ: ແຂວງເຊກອງກໍ່ຍັງມີແນວໂນມ ຫຼືມີຄວາມສ່ຽງສູງເພາະເປັນແຂວງທີ່ມີຊາຍແດນຕິດຈອດໃກ້ຄຽງກັບແຂວງທີ່ມີການຕິດເຊື້ອ ແລະແຜ່ລະບາດເປັນວົງກວ້າງ, ການຂົນສົ່ງສິນຄ້າ ແລະການໄປມາຫາສູ່ຂອງປະຊາຊົນໃນຂອບເຂດຊາຍແດນລະຫວ່າງປະເທດ, ລະຫວ່າງແຂວງຕໍ່ແຂວງຈໍານວນໜຶ່ງກໍ່ຍັງມີການໄປມາຫາສູ່ກັນຢູ່, ແຕ່ແນວໃດກໍ່ດີເພື່ອເປັນການຕ້ານ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຈຶ່ງຂໍຮຽກຮ້ອງມາຍັງອົງການປົກຄອງເມືອງ ແລະ ອົງການປົກຄອງບ້ານຕະຫຼອດຮອດປະຊາຊົນບັນດາເຜົ່າໃນທົ່ວແຂວງໃຫ້ສືບຕໍ່ປະຕິບັດຄໍາສັ່ງ 15 ຂອງນາຍົກລັດຖະມົນຕີ, ຄໍາສັ່ງແນະນໍາເພີ່ມເຕີມຂອງທ່ານເຈົ້າແຂວງ ແລະ ແຈ້ງການຕ່າງໆຂອງຄະນະສະເພາະກິດ ວາງອອກຢ່າງເຂັ້ມງວດ, ທັງນີ້ກໍ່ເພື່ອເປັນການປ້ອງກັນຕົນເອງບໍ່ໃຫ້ຕິດເຊື້ອພະຍາດຕ່າງໆໄດ້.

ຂ່າວ: ແກ້ວໄຊຍະວົງ

• 19/05/2021