ເຝົ້າລະວັງ ແລະຊອກຫາຜູ້ຕິດໂຄວິດໃນທ່າບຸກ

   ກອງປະຊຸມລະຫວ່າງນາຍົກລັດຖະມົນຕີ ແລະຄະນະສະເພາະກິດ ຄັ້ງວັນ ທີ 17 ພຶດສະພາ 2021 ກ່ຽວກັບການສືບຕໍ່ຈັດຕັ້ງປະຕິບັດຄຳສັ່ງ ສະບັບເລກທີ 15/ນຍ, ລົງວັນທີ 21 ເມສາ 2021 ນັບຕັ້ງແຕ່ວັນທີ 6 ພຶດສະພາ 2021 (ຮອບ II ໄລຍະ 2) ຮອດ 16 ພຶດສະພາ 2021 ໂດຍລວມສະພາບການລະບາດຢູ່ຫຼາຍ ແຂວງມີທ່າອ່ຽງຫຼຸດລົງ, ແຕ່ຈຳນວນຜູ້ຕິດເຊື້ອຢູ່ນະຄອນຫຼວງວຽງຈັນ (ນວ), ແຂວງບໍ່ແກ້ວ ແລະແຂວງຈຳປາສັກມີທ່າອ່ຽງທີ່ຍັງສູງຢູ່ (ຢູ່ຈຳປາສັກເປັນກໍລະນີນຳເຂົ້າ) ຊຶ່ງເລີ່ມແຕ່ວັນທີ 13 ພຶດສະພາ 2021 ເປັນຕົ້ນມາ, ຢູ່ ນວ ມີຜູ້ຕິດເຊື້ອເພີ່ມຂຶ້ນ ແລະ ແຜ່ກະຈາຍອອກໃນຊຸມຊົນໂດຍສະເພາະຢູ່ກຸ່ມຄົນໃກ້ຊິດ-ພາຍໃນຄອບຄົວ, ມາຮອດວັນທີ 16 ພຶດສະພາ2021 ມີຜູ້ຕິດເຊື້ອສະສົມທັງໝົດ 1.591 ຄົນ (ຕິດເຊື້ອໃໝ່21ຄົນໃນນັ້ນຢູ່ ນວ 11 ຄົນ, ຈຳປາສັກ 7 ຄົນ ແລະສະ ຫວັນນະເຂດ 3 ຄົນ); ປິ່ນປົວຫາຍດີ 574 ຄົນ, ຍັງນອນຕິດຕາມ ຢູ່ສະຖານທີ່ປິ່ນປົວ 1.015 ຄົນ, ເສຍຊີວິດ 2 ຄົນ.

   ປະຈຸບັນຫຼາຍແຂວງໄດ້ປະຕິບັດມາດຕະການປິດການເຂົ້າອອກເມືອງ, ຕັ້ງຈຸດກວດກາພາຍໃນແຂວງ ແລະ ລະຫວ່າງແຂວງ. ສະເພາະ ນວ ນັບຕັ້ງແຕ່ວັນທີ 13 ພຶດສະພາ 2021 ເປັນຕົ້ນມາໄດ້ນຳໃຊ້ມາດຕະການປິດການເຂົ້າອອກບ້ານ ຫຼືກຸ່ມບ້ານທີ່ມີຜູ້ຕິດເຊື້ອ ແລະເຝົ້າລະວັງເຂດໃກ້ຄຽງຢ່າງໃກ້ຊິດ; ສືບຕໍ່ໂຄສະນາເຜີຍແຜ່ ມາດຕະການຕ່າງໆທີ່ລັດຖະບານກໍ່ຄືຄະນະສະເພາະກິດວາງອອກຢ່າງເປັນປົກກະຕິ ໂດຍໄດ້ຖະແຫຼງຂ່າວປະຈຳວັນກ່ຽວກັບສະພາບການລະບາດ, ພ້ອມທັງຊີ້ແຈງແກ້ ໄຂຂ່າວທີ່ບໍ່ມີມູນຄວາມຈິງ, ແຈ້ງນະໂຍບາຍແລະມາດຕະການເພື່ອແກ້ໄຂຜົນກະທົບຂອງການລະບາດພະຍາດໂຄວິດ-19 ຕໍ່ເສດຖະກິດ, ນະໂຍບາຍດ້ານເງິນຕາ, ລະບຽບການດ້ານຂົນສົ່ງສິນຄ້າ ແລະອື່ນໆ;ກວດກາສະຖານບັນເທິງ;ລາດຕະເວນຕາມຊາຍແດນບໍ່ໃຫ້ມີການລັກລອບຂ້າມແດນກໍລະນີພົບເຫັນກໍ່ນຳສົ່ງໄປເກັບຕົວຢ່າງຫາເຊື້ອພະຍາດ ແລະຈຳກັດບໍລິເວນ.

   ສຳລັບມາດຕະການດ້ານການແພດແມ່ນໄດ້ເຮັດວຽກຮ່ວມກັບ ຊ່ຽວຊານ ສສ ຫວຽດນາມ ແລະ ສປ ຈີນ ໃນການຄວບຄຸມແລະແກ້ໄຂການລະບາດຂອງພະຍາດໂຄ ວິດ-19; ຕິດຕາມເຝົ້າລະວັງຢ່າງໃກ້ຊິດສະພາບການລະບາດຢູ່ ນວ ແລະບັນດາແຂວງທົ່ວປະເທດ; ຕິດຕາມທ່າອ່ຽງຂອງການລະບາດໃນທົ່ວໂລກ ແລະບັນດາປະເທດໃກ້ຄຽງ; ປະເມີນຄວາມສ່ຽງສະພາບການລະບາດໃນທົ່ວປະເທດ ແລະບາງແຂວງທີ່ມີຄວາມສ່ຽງສູງໂດຍຈັດຕັ້ງເປັນປົກກະຕິໃນທຸກອາທິດ ແລະເຮັດການປະເມີນດ່ວນ ເມື່ອມີຄວາມຈຳເປັນ; ໄດ້ເຂັ້ມງວດກັ່ນກອງບຸກຄົນທີ່ເດີນທາງເຂົ້າມາປະເທດພ້ອມທັງເກັບຕົວຢ່າງທຸກຄົນ ແລະຖືກຈຳກັດບໍລິເວນເປັນເວລາ 14 ວັນ; ສຸມໃສ່ຄົ້ນຫາຜູ້ ຕິດເຊື້ອ ແລະ ຕິດຕາມຜູ້ສຳຜັດໃກ້ຊິດພ້ອມທັງປະຫວັດການເຄື່ອນໄຫວຂອງພວກກ່ຽວຢູ່ເຂດທີ່ມີການລະບາດໃນຊຸມຊົນທັງຢູ່ ນວ ແລະ ບັນດາແຂວງໂດຍຂະຫຍາຍ ການເກັບຕົວຢ່າງກວດຫາເຊື້ອພະຍາດໂຄວິດ-19 ແລະຄົ້ນຫາກໍລະນີຜູ້ຕິດເຊື້ອໃນທ່າບຸກເມື່ອພົບການລະບາດເປັນຈຸ້ມຢູ່ໃນຄອບຄົວ, ບ້ານທີ່ສ່ຽງ ແລະຊຸມຊົນ, ບັນດາກະຊວງ-ອົງການ ແລະສະຖານທີ່ສ່ຽງຕ່າງໆ; ມີມາດຕະການປິດການເຂົ້າ-ອອກຂອງບ້ານທີ່ມີລາຍງານກໍລະນີຕິດເຊື້ອເພື່ອໃຫ້ປະຊາຊົນຢູ່ແຕ່ໃນບ້ານ, ຈຳກັດການແຜ່ເຊື້ອລະຫວ່າງບຸກຄົນໃຫ້ຢູ່ໃນວົງແຄບໃນໄລຍະ 14 ວັນ.

   ຂະນະດຽວກັນ; ກໍ່ໄດ້ສົ່ງຄະນະວິຊາການພ້ອມດ້ວຍອຸປະກອນການແພດ ແລະອື່ນໆຊ່ວຍບັນດາແຂວງທີ່ມີການລະບາດໃນວົງກວ້າງຢູ່ຊຸມຊົນເຮັດໃຫ້ຈຳນວນການຊອກຄົ້ນຫາຜູ້ຕິດເຊື້ອມີທ່າອ່ຽງດີຂຶ້ນ, ເກັບຕົວຢ່າງເພີ່ມຂຶ້ນ ແລະຄວາມສາມາດໃນການກວດກໍ່ມີຄວາມຊັດເຈນຂຶ້ນສາມາດກວດວິເຄາະຫາເຊື້ອໃນທົ່ວປະເທດສູງສຸດເຖິງ 9.600 ຕົວຢ່າງຕໍ່ວັນ. ໃນນັ້ນ, ຂັ້ນສູນກາງມີ 4 ຫ້ອງວິເຄາະໃຫຍ່ສາມາດກວດໄດ້ 4.800 ຕົວຢ່າງ/ວັນ ແລະຂັ້ນແຂວງສາມາດກວດໄດ້ 4.800 ຕົວຢ່າງຕໍ່ວັນ. ສຳລັບເຄື່ອງກວດຢູ່ແຂວງມີ 5 ແຂວງນຳໃຊ້ເຄື່ອງກວດ RT-PCR. ນອກນີ້, ທຸກແຂວງມີເຄື່ອງຈິນເອກສເປີດ (Ge ne X-pert) ແລະເຄື່ອງກວດຫາເຊື້ອເຄື່ອນທີ່ (Mobile PCR); ສຸມໃສ່ປິ່ນປົວຜູ້ຕິດເຊື້ອຢູ່ພາກສະໜາມ, ຕິດຕາມ ແລະ ປະເມີນອາການຄົນເຈັບຢ່າງໃກ້ຊິດຕໍ່ເນື່ອງ ແລະອື່ນໆ ໂດຍພື້ນຖານມີຄວາມ ພ້ອມດ້ານອຸປະກອນການແພດ, ຢາປິ່ນປົວ, ມີທີມແພດເປັນທິມຫຼັກໃນການປິ່ນປົວ1.202 ຄົນ, ທີມສຳຮອງ 1.082 ຄົນ ແລະມີທີມສະໜັບສະໜູນ 680 ຄົນ; ພ້ອມນັ້ນ,ໄດ້ອະນາໄມແລະຂ້າເຊື້ອຢູ່ສະຖານທີ່ບໍລິການສາທາລະນະສຸກໂດຍສະເພາະໂຮງໝໍທຸກຂັ້ນ ແລະໂຮງໝໍພາກສະໜາມ,ສະຖານທີ່ເກັບຕົວຢ່າງ ແລະສະຖານທີ່ບໍລິການສັກວັກແຊງກັນພະຍາດ;ສະຖານທີ່ສາທາລະນະຊຸມຊົນ ແລະ ສະຖານທີ່ອື່ນໆທີ່ມີຄວາມສ່ຽງ. ນອກນີ້ໄດ້ກໍາຈັດຂີ້ເຫຍື້ອຕິດເຊື້ອ ແລະ ບໍາບັດນໍ້າເປື້ອນໃນສະ ຖານທີ່ປິ່ນປົວຄົນເຈັບຕິດເຊື້ອພະຍາດ ແລະສູນຈໍາກັດບໍລິເວນ; ສິ່ງສຳຄັນຮອດວັນທີ 1 ພຶດສະພາ 2021, ໄດ້ສັກວັກແຊງໃຫ້ກຸ່ມເປົ້າໝາຍ ແລະ ປະຊາຊົນທົ່ວໄປໃນທົ່ວປະເທດໂດສທີ 1 ໄດ້ 493.481 ຄົນ ແລະໂດສທີ 2 ໄດ້ 89.266 ຄົນ.

   ໃນໄລຍະດຽວກັນ, ກໍ່ມີຂໍ້ຄົງຄ້າງຈຳນວນໜຶ່ງໂດຍສະເພາະມີບາງກໍລະນີທີ່ກວດພົບວ່າຕິດເຊື້ອພະຍາດແຕ່ຍັງບໍ່ສາມາດນໍາມາປິ່ນປົວໄດ້ເນື່ອງຈາກເວລາມາກວດບໍ່ໃຫ້ຂໍ້ມູນຈະແຈ້ງ, ບາງຈຳນວນພົບເຫັນແຕ່ບໍ່ຢາກເຂົ້າມາປິ່ນປົວຢູ່ໂຮງໝໍ, ຈຶ່ງໄດ້ໃຊ້ເວລາ ແລະນຳເອົາພວກກ່ຽວເຂົ້າໂຮງໝໍ; ມີຜູ້ຕິດເຊື້ອຈໍານວນໜຶ່ງເຂົ້າມາຢູ່ສະຖານທີ່ປິ່ນປົວບໍ່ປະຕິບັດຕາມມາດຕະການທີ່ແພດ-ໝໍວາງອອກ; ສຳລັບຜູ້ຕິດເຊື້ອທີ່ປິ່ນປົວດີແລ້ວ ແລະສືບຕໍ່ຈຳກັດບໍລິເວນຕົນເອງຢູ່ເຮືອນບໍ່ປະຕິບັດຕາມມາດຕະການ ຢ່າງເຄັ່ງຄັດ; ພະນັກງານ, ທະຫານ, ຕຳຫຼວດ, ປະຊາຊົນ, ຜູ້ປະກອບການທຸລະກິດຈຳນວນໜຶ່ງລະເຫຼີງ, ບໍ່ເອົາໃຈໃສ່ປະຕິບັດບັນດາມາດຕະການທີ່ຄະນະສະເພາະກິດວາງອອກເຊັ່ນ: ຍັງມີສະພາບການສັນຈອນຢູ່ຕາມທ້ອງຖະໜົນຈຳນວນຫຼາຍ, ການກວດກາຜູ້ເດີນທາງເຂົ້າ-ອອກຢູ່ພາຍໃນ, ລະຫວ່າງແຂວງຍັງບໍ່ເຄັ່ງຄັດ, ຕັ້ງກຸ່ມຊຸມແຊວ ແລະອື່ນໆ; ມີຜູ້ເຂົ້າເມືອງຜິດກົດໝາຍຢູ່ ນວ ແລະແຂວງຈຳນວນໜຶ່ງ;ມີບາງທ້ອງຖິ່ນອອກລະບຽບການຄຸ້ມຄອງການເຂົ້າອອກເມືອງເຄັ່ງເກີນໄປສ້າງຄວາມ ຫຍຸ້ງຍາກໃຫ້ແກ່ການຂົນສົ່ງສິນຄ້າລະຫວ່າງແຂວງ; ຫຼາຍສູນຈຳກັດບໍລິເວນບໍ່ໄດ້ມາດຕະຖານ, ບໍ່ເອກະພາບ ແລະບໍ່ພຽງພໍ, ມີຜູ້ຈຳກັດບໍລິເວນຢູ່ສູນ, ຢູ່ໂຮງໝໍແລະຢູ່ເຮືອນ.

ໂດຍ: ຣັດສະໝີ ດວງສັດຈະ

แชร์