1 ເດືອນ ເຈົ້າໜ້າທີ່ຢຶດໄມ້ເຖື່ອນ 2.05 ພັນແມັດກ້ອນ

   ຕະຫຼອດໄລຍະຜ່ານມາຂະແໜງການກ່ຽວຂ້ອງກະຊວງກະສິກຳ ແລະປ່າໄມ້ ນັບແຕ່ສູນກາງລົງຮອດທ້ອງຖິ່ນໄດ້ເອົາໃຈໃສ່ໃນການຈັດຕັ້ງປະຕິບັດວຽກງານຂອງຕົນ ແລະເອົາໃຈໃສ່ລົງເຜີຍແຜ່ກົດໝາຍວ່າດ້ວຍປ່າໄມ້, ກົດໝາຍວ່າດ້ວຍສັກນໍ້າ-ສັດປ່າໃຫ້ປະຊາຊົນຢູ່ເຂດຄຸ້ມຄອງປ່າໄມ້ ແລະນຳໃຊ້ມາດຕະການຕ້ານປາກົດການຫຍໍ້ທໍ້ຢ່າງເຂັ້ມງວດທັງນີ້ກໍ່ເພື່ອເຮັດໃຫ້ປາກົດການຫຍໍ້ທໍ້ໃນວຽກກະສິກຳ ແລະປ່າໄມ້ມີເກີດຂຶ້ນຫຼຸດໜ້ອຍຖອຍລົງເທື່ອລະກ້າວ.

   ຢ່າງໃດກໍ່ຕາມເຖິງຈະມີຄວາມພະຍາມພຽງແຕ່ກໍຍັງມີການລັກລອບຕັດໄມ້ຢູ່ເປັນປະຈຳຄືໃນໄລຍະ 1 ເດືອນຜ່ານມາຕາມຂໍ້ມູນຈາກກະຊວງກະສິກຳ ແລະປ່າໄມ້ເປີດ ເຜີຍໃຫ້ຮູ້ວ່າ: ເຈົ້າໜ້າທີ່ສາມາດຢຶດໄມ້ຜິດຕໍ່ກົດໝາຍວ່າດ້ວຍປ່າໄມ້ບໍລິມາດທັງໝົດ 2.056,75 ແມັດກ້ອນ ແລະ ນໍ້າໜັກ 3.685 ກິໂລກຣາມ ໃນນັ້ນມີປະເພດໄມ້ພິເສດຈໍານວນ 2.611 ທ່ອນຕໍ່ຕັບຕໍ່ໂຕ,ບໍລິມາດ 1.046,867 ແມັດກ້ອນ ແລະຈຳນວນ 409 ໂຕ,ນໍ້າໜັກ 3.431 ກິໂລກຣາມ,ປະເພດໄມ້ຄຸ້ມຄອງ 1,2,3 ຈຳນວນ 1.334 ທ່ອນຕໍ່ໂຕຕໍ່ເສັ້ນ, ບໍລິມາດ 1.009,88 ແມັດກ້ອນ ແລະຈຳນວນ 39 ໂຕ, ນໍ້າໜັກ 254 ກິໂລກຣາມ. 

   ສາມາດກວດກາການບຸກລຸກທີ່ດິນປ່າໄມ້ ຈໍານວນ 93,49 ເຮັກຕາ ໃນນັ້ນບຸກລຸກທີ່ດິນເຂດປ່າສະຫງວນ ຈໍານວນ 91,59 ເຮັກຕາ. ມີໄຟໄໝ້ລາມປ່າເກີດຂຶ້ນຢູ່ ເຂດປ່າຜະລິດຈໍານວນ 1,90 ເຮັກຕາ ສາມາດກວດກາພາຫະນະທີ່ນໍາໃຊ້ເຂົ້າໃນການກະທໍາຜິດກ່ຽວກັບກົດໝາຍວ່າດ້ວຍປ່າໄມ້ ມີລົດ 4 ລໍ້ຂຶ້ນໄປ ຈໍານວນ14 ຄັນ.

   ນອກນັ້ນຍັງສາມາດຍຶດສັດປ່າຈໍານວນ 39 ໂຕ, ນໍ້າໜັກ 145 ກິໂລກຣາມ ໃນນັ້ນມີຊີວິດ ຈໍານວນ 2 ໂຕ (ປ່ອຍຄືນສູ່ທຳມະຊາດ) (ສໍາລັບສັດທີ່ບໍ່ມີຊີວິດແມ່ນໄດ້ ຈູດທຳລາຍ), ສັງລວມຄະດີກ່ຽວກັບໄມ້ 41 ຄະດີ, ໃນນັ້ນກໍາລັງດຳເນີນການສືບສວນ-ສອບສວນ 28 ຄະດີ ໃນນັ້ນຢຶດໄມ້ 1.887,38 ແມັດກ້ອນ (ໜຶ່ງພັນແປດຮ້ອຍແປດສິບເຈັດຈຸດສາມຮ້ອຍແປດສິບຫ້າແມັດກ້ອນ), 350 ກິໂລກຣາມ ແລະ 55 ຫຼາ, ເຕົາຖ່ານ 12 ເຕົາ ແລະໂຕະຊອຍ 1 ເຄື່ອງ, ຢຶດເຄື່ອງຈັກ 3 ເຄື່ອງ, ເລື່ອຍວົງເດືອນ 1 ອັນ, ໃບເລື່ອຍ 6 ອັນ, ຜູ້ລະເມີດ ທັງໝົດ 60 ຄົນ. ແກ້ໄຂທາງແພ່ງມີ 13 ຄະດີ, ປັບໃໝເປັນເງິນຈຳນວນ 338.520.304 ກີບ, ຢຶດໄມ້ໄດ້ 61,952 ແມັດກ້ອນ (ຫົກສິບເອັດຈຸດເກົ້າຮ້ອຍຫ້າສິບສອງແມັດກ້ອນ) ຜູ້ລະເມີດທັງໝົດ 13 ຄົນ.

   ສໍາລັບຄະດີສັດນໍ້າ ແລະສັດປ່າມີ 9 ຄະດີ (ກຳລັງດຳເນີນ) ໃນນັ້ນ ຢຶດຜະລິດຕະພັນງາຊ້າງ ແລະສັດປ່າອື່ນໆ ຈໍານວນ 123,495 ກິໂລ, ບີກະທິງ 1 ອັນ, ຊ້າງຖືກຂ້າງ 3 ໂຕ, ຜູ້ຖືກຫາທັງໝົດ 14 ຄົນ.

แชร์