ງົວຕາຍກະທັນຫັນຫຼາຍໂຕ

 ວັນທີ 16 ພຶດສະພາ 2021 ນີ້ມີງົວຂອງປະຊາຊົນບ້ານສີທາດ ເມືອງຕົ້ນເຜິ້ງ ແຂວງບໍ່ແກ້ວ ລົ້ມຕາຍແບບກະທັນຫັນພ້ອມກັນຫຼາຍໂຕຕາມການລົງກວດກາຕົວຈິງຂອງເຈົ້າໜ້າທີ່ກ່ຽວຂ້ອງຈຶ່ງໄດ້ຮູ້ວ່າເປັນງົວຂອງ ທ້າວ ບຸນຕານ ວົງປັນຍາ ປະຊາຊົນບ້ານດັ່ງກ່າວ.

ຕາມການສຳພາດເຈົ້າຂອງງົວໃຫ້ຮູ້ວ່າ: ກ່ອນໜ້າທີ່ງົວຈະລົ້ມຕາຍແບບກະທັນຕົນເອງ ແລະຄອບຄົວໄດ້ເອົາປຸ໋ຍກາເຮືອໃບປະສົມນໍ້າໃຫ້ງົວກິນໃນອັດຕາສ່ວນນໍ້າ 3 ຖັງ ປະສົມກັບປຸ໋ຍ ປະມານ 1 ກິໂລ ຊຶ່ງຜ່ານມາຕົນກໍໄດ້ປະສົມໃຫ້ງົວກິນເປັນປະຈໍາແຕ່ກໍ່ບໍ່ປາກົດເປັນຫຍັງສູດໃນການປະສົມນີ້ແມ່ນໄດ້ບົດຮຽນມາຈາກຊ່ອງຢູທູບວ່າການເອົາປຸ໋ຍປະສົມນໍ້າໃຫ້ງົວກິນເຮັດໃຫ້ງົວຕຸ້ຍດີ ແລະໃຫຍ່ໄວຈຶ່ງໄດ້ນໍາມາໃຊ້ກັບສັດລ້ຽງຂອງຕົນໂດຍສະເພາະແມ່ນງົວ.

   ມາຮອດຕອນທ່ຽງຂອງວັນທີ 16 ພຶດສະພາ ຈຶ່ງເກີດເຫດການບໍ່ຄາດຄິດຂຶ້ນມີງົວຂອງຕົນລົ້ມຕາຍແບບກະທັນຫັນຈໍານວນ 6 ໂຕ ຊຶ່ງສາເຫດອາດເກີດຈາກການ ເອົາປຸ໋ຍປະສົມນໍ້າໃຫ້ງົວກິນບວກກັບສະພາບອາກາດຮ້ອນອົບເອົ້າແດ່ຈຶ່ງເຮັດໃຫ້ງົວລົ້ມຕາຍ.

  ຕໍ່ກັບເຫດການນີ້ທ້າວ ບຸນຕານ ເຈົ້າຂອງງົວ ຍັງໄດ້ກ່າວຝາກເປັນບົດຮຽນເຖິງຜູ້ທີ່ລ້ຽງສັດໃຫຍ່ໂດຍສະເພາະງົວ ແລະຄວາຍວ່າບໍ່ຄວນເອົາເປັນແບບຢ່າງການເອົາປຸ໋ຍປະສົມນໍ້າໃຫ້ສັດລ້ຽງກິນອາດເຮັດໃຫ້ສັດລ້ຽງຕາຍດັ່ງທີ່ໄດ້ເກີດກັບງົວຂອງຕົນຊຶ່ງເປັນຄວາມເສຍຫາຍຫຼາຍລ້ານກິບ.

ຂ່າວ: ສ ປັນຍາທອງ 

แชร์