ດາຣາພົງ ກັບແນວຄວາມຄິດໃໝ່ໃນການດຳເນີນທຸລະກິດຍຸກປະຈຸບັນ

ແນ່ນອນແມ່ຍິງຫຼາຍໆຄົນອາດເຄີຍຄິດວ່າການເຮັດທຸລະກິດ ແລະການເບິ່ງແຍງຄອບຄົວໄປນຳເປັນສິ່ງທີ່ຫຍຸ້ງຍາກ ແລະທ້າທາຍສົມຄວນຊຶ່ງໃນຄວາມ ເປັນຈິງກໍນັບວ່າຫຍຸ້ງຍາກ ແລະຈະເຮັດແນວໃດໃຫ້ວຽກທີ່ຫຍຸ້ງຍາກນັ້ນກາຍເປັນເລື່ອງງ່າຍ, ໂດຍວິທີຮັບມືຄືການປັບທັດສະນະຄະຕິໃຫ້ເຂົ້າກັບວຽກ, ພ້ອມທັງເບິ່ງວ່າເປັນຄວາມທ້າທາຍເພື່ອທົດສອບຄວາມເຂັ້ມແຂງ ແລະຄວາມສາມາດຂອງເຮົາ, ນີ້ແມ່ນທັດສະນະຂອງທ່ານ ນາງ ດາຣາພົງ ຍຸຕິທຳ ນັກທຸລະກິດຍິງຜູ້ຫຼາກຫຼາຍຄວາມສາມາດເບິ່ງເຫັນໄດ້ໃນການເຮັດທຸລະກິດໃນປະຈຸບັນ.

  ທ່ານ ນາງ ດາຣາພົງ ຍຸຕິທຳ ຜູ້ອຳ ນວຍການບໍລິສັດ ESDS Co.,Ltd, ຜູ້ອຳນວຍການສູນພາສາອັງກິດ English House ແລະຮອງຜູ້ອຳນວຍການບໍລິສັດ Waste Pro Collection ໃຫ້ສໍາພາດກັບທີມ ຂ່າວໜັງສືພິມເສດຖະກິດ-ສັງຄົມເນື່ອງໃນໂອກາດວັນແມ່ຍິງສາກົນຄົບຮອບ 109 ປີ ວ່າ: ຕ້ອງຍອມຮັບວ່າປະຈຸບັນນັກທຸລະກິດແມ່ຍິງຢູ່ລາວນັບມື້ມີຕົວເລກສູງຂຶ້ນເລື້ອຍໆ, ທັງທີ່ຄວາມເປັນຈິງການເຮັດທຸລະກິດ ແລະການເບິ່ງແຍງຄອບຄົວໄປນຳເປັນສິ່ງທີ່ຫຍຸ້ງຍາກຫຼາຍສຳລັບແມ່ຍິງ,ແຕ່ກໍເຊື່ອວ່າແມ່ຍິງຫຼາຍຄົນກໍຄົງເບິ່ງວ່າການເຮັດທຸລະກິດເປັນຄວາມທ້າທາຍອີກແບບໜຶ່ງເພາະແມ່ຍິງມີຄວາມສາມາດພິເສດທີ່ສາມາດເຮັດ ຫຼາຍໆວຽກພ້ອມກັນໄດ້ ເພື່ອຈຸດປະສົງ ດຽວເທົ່ານັ້ນຄື ຢາກໃຫ້ຄອບຄົວມີຄວາມສຸກ ແລະສ້າງຖານຄອບຄົວທີ່ເຂັ້ມແຂງໃນອະນາຄົດ, ເພາະສະນັ້ນຈຶ່ງບໍ່ແປກໃຈທີ່ຜູ້ຍິງຈະກ້າວເຂົ້າມາມີບົດບາດຫຼາຍຂຶ້ນໃນເວທີການເປັນຜູ້ປະກອບການຍິງຊຶ່ງສ່ວນໜຶ່ງແມ່ນມາຈາກພັກ-ລັດ ໃຫ້ໂອກາດ ແລະການເບິ່ງເຫັນໂອກາດຂອງ ເຂົາເຈົ້າ, ພ້ອມທັງໝູນໃຊ້ໃຫ້ຖືກກັບການປ່ຽນແປງຂອງການພັດທະນາປະເທດນັ້ນເອງ ຫຼື ເວົ້າອີກຢ່າງໜຶ່ງວ່າແມ່ຍິງລາວໃນຍຸກນີ້ມີຄວາມສາມາດສູງ, ມີຜົນງານດີ ແລະມີວິໄສທັດທີ່ກ້າວໄກໃນການບໍລິຫານກິດຈະການໃຫ້ຈະເລີນກ້າວ ໜ້າໄດ້.

  ປະຈຸບັນໂອກາດການເຮັດທຸລະກິດຢູ່ລາວມີຫຼາຍ, ແຕ່ກໍຄືຮູ້ແລ້ວວ່າແມ່ຍິງລາວຫຼາຍຄົນຍັງມີພັນທະຫຼາຍຢ່າງ ແລະ ທັງເປັນສິ່ງທ້າທາຍສຳລັບເຂົາເຈົ້າຊຶ່ງ ບໍ່ວ່າຍຸກໃດໆກໍຕາມ, ແຕ່ເຊື່ອວ່າສິ່ງໜຶ່ງທີ່ເຂົາເຈົ້າຄວນຄຳນຶງຄືຄວາມເໝາະສົມ, ເລື່ອງໂອກາດ, ສິ່ງທ້າທາຍ ແລະຄວາມເປັນໄປໄດ້ຢູ່ໃນປະເທດເຮົາ, ທັງນີ້ ກໍເພາະປະເທດເຮົາເປັນປະເທດທີ່ກຳລັງພັດທະນາຫາກຄຳນຶງລະອຽດໝັ້ນໃຈວ່າແມ່ຍິງລາວຫຼາຍຄົນຈະເຫັນໂອກາດ ແລະເລີ່ມເຮັດທຸລະກິດໄດ້ຕະຫຼອດ, ດັ່ງ ນັ້ນສຳລັບຜູ້ຍິງທີ່ຄິດຈະເລີ່ມເຮັດທຸລະກິດສິ່ງສຳຄັນຄືການຄົ້ນພົບຕົນເອງກ່ອນວ່າມັກສິ່ງໃດກໍເຮັດໃນສິ່ງທີ່ມັກໃຫ້ເກີດປະໂຫຍດບໍ່ແມ່ນເຮັດຕາມກະແສສັງ ຄົມ ຫຼື ເຫັນໂອກາດແລ້ວຢາກເຮັດໂດຍບໍ່ໄດ້ສຶກສາເຖິງຄວາມເປັນໄປໄດ້, ສະນັ້ນນັກທຸລະກິດມືໃໝ່ຄວນຄຳນຶງເຖິງຄວາມເປັນໄປໄດ້ກ່ອນໃນການເຮັດທຸລະ ກິດລວມທັງການເບິ່ງຫາໂອກາດ, ຄວາມເປັນໄປໄດ້, ສິ່ງທ້າທາຍ, ຄວາມມັກ ແລະ ການລົງມືເຮັດຮັບຮອງວ່າທ່ານຈະເປັນຜູ້ໜຶ່ງທີ່ປະສົມຜົນສຳເລັດທາງທຸ ລະກິດ ແລະຊີວິດຄອບຄົວກໍຈະດີຂຶ້ນແນ່ນອນ, ທ່ານ ນາງ ດາຣາພົງ ຍຸຕິທຳ.

ຂ່າວ: ພິມພອນ    

แชร์